वेकोलिच्या (WCL) खाणींमध्ये स्थानिक भूमिपुत्रांना 80 टक्के रोजगार मिळावा यासाठी काढलेल्या आंदोलनादरम्यान पोलीस प्रशासन आणि तहसीलदारांविरोधात अत्यंत प्रक्षोभक, अश्लील वक्तव्ये करून धमकावणे शिवसेना आमदार बच्चू कडू यांच्या चांगलेच अंगलट आले आहे. या प्रकरणाच्या फॉरेन्सिक तपासणीसाठी घुग्गुस पोलिसांनी आमदार बच्चू कडू यांना थेट नोटीस बजावली असून, 26 ऑक्टोबर रोजी स्वतः पोलीस ठाण्यात हजर राहून आवाजाचे नमुने देण्याचे कडक निर्देश दिले आहेत. पोलिसांच्या या कारवाईमुळे बच्चू कडू यांच्या अडचणींमध्ये मोठी वाढ झाली आहे. स्थानिक तरुणांच्या रोजगाराच्या मुद्द्यावरून 18 ऑक्टोबर रोजी (रविवार) चंद्रपूर जिल्ह्यातील घुग्गुस येथे बच्चू कडू यांच्या नेतृत्वाखाली मोर्चाचे आयोजन करण्यात आले होते. मात्र, विनापरवानगी काढलेला हा मोर्चा आणि त्यामध्ये शासकीय अधिकाऱ्यांवर केलेली आक्षेपार्ह टिप्पणी आता कडू यांच्यासाठी डोकेदुखी ठरली आहे. 26 ऑक्टोबरला ठाण्यात हजर व्हा; आवाजाच्या नमुन्यांची फॉरेन्सिक पडताळणी घुग्गुस पोलिसांनी बजावलेल्या कायदेशीर नोटीसनुसार, मोर्चादरम्यान बच्चू कडू यांनी केलेल्या भाषणाचे व्हिडिओ आणि ऑडिओ रेकॉर्डिंग पोलिसांच्या ताब्यात आले आहेत. या भाषणातील आवाज बच्चू कडू यांचाच आहे की नाही, हे न्यायवैद्यक प्रयोगशाळेमार्फत तांत्रिकदृष्ट्या सिद्ध करण्यासाठी पोलिसांना त्यांच्या मूळ आवाजाचे नमुने नोंदवून घेणे आवश्यक आहे. यासाठी बच्चू कडू यांना येत्या 26 ऑक्टोबर रोजी घुग्गुस पोलीस ठाण्यात प्रत्यक्ष उपस्थित राहण्याचे फर्मान बजावण्यात आले आहे. ही प्रक्रिया पूर्ण झाल्यानंतर भाषणाचा फॉरेन्सिक अहवाल न्यायालयात पुरावा म्हणून सादर केला जाणार आहे. नेमकं प्रकरण काय? वेकोलि प्रशासनावर दबाव आणण्यासाठी आयोजित करण्यात आलेल्या या आंदोलनात नियमांचे उल्लंघन झाल्याचा ठपका ठेवण्यात आला आहे. घुग्गुस परिसरातील स्थानिक प्रकल्पग्रस्त आणि भूमिपुत्रांना वेकोलिच्या नोकऱ्यांमध्ये 80 टक्के प्राधान्य द्यावे, या प्रमुख मागणीसाठी 18 ऑक्टोबर रोजी हा मोर्चा काढण्यात आला होता. विनापरवानगी जमाव अन् अधिकाऱ्यांना धमक्या या मोर्चासाठी प्रशासनाकडून कोणतीही रीतसर पूर्वपरवानगी घेण्यात आली नव्हती. असे असतानाही बेकायदेशीर जमाव जमवण्यात आला. इतकेच नव्हे, तर भाषणादरम्यान बच्चू कडू यांनी कर्तव्य बजावणाऱ्या स्थानिक पोलीस अधिकाऱ्यांवर आणि तहसीलदारांवर अत्यंत प्रक्षोभक, अश्लील व अपमानकारक भाषेत हल्ला चढवत त्यांना धमकावले होते. बच्चू कडूंसह 6 जणांवर गंभीर गुन्हे दाखल; BNS च्या 6 कलमांचा समावेश या बेधडक वक्तव्यानंतर घुग्गुस पोलिसांनी तात्काळ कठोर पावले उचलत आमदार बच्चू कडू यांच्यासह एकूण 6 पदाधिकाऱ्यांवर विविध गंभीर कलमान्वये गुन्हे नोंदवले आहेत. आमदार बच्चू कडू (रा. बेलोरा, अचलपूर, अमरावती), मुकेश मनोजराव जीवतोडे (लोकसभा संघटक, रा. वरोरा), रोशन राजाराम हरबडे (रा. नांदा फाटा, कोरपना), अमोल नथ्थूजी मांढरे (रा. घुग्गुस), नथ्थू भाऊराव नवले (रा. नकोडा, घुग्गुस) व सतीश बीडकर (रा. गडचांदूर). यांच्यावर भारतीय न्याय संहिता (BNS) 2023 मधील कलम 190, 191(2), 296, 223, 224, 351(2) तसेच महाराष्ट्र पोलीस कायदा 1951 च्या कलम 135 अंतर्गत हा गुन्हा दाखल करण्यात आला आहे. आता 26 ऑक्टोबर रोजी बच्चू कडू घुग्गुस पोलीस ठाण्यात हजर राहून आपले व्हॉईस सॅम्पल देतात का आणि पोलीस या प्रकरणात त्यांना अटक करणार की कायदेशीर नोटीस देऊन सोडणार, याकडे संपूर्ण विदर्भाचे लक्ष लागले आहे. ————————————————————– हेही वाचा… SITची नाटकं बंद करा, आधी 500 कोटींचा FIR दाखल करा: ऑडिओ क्लिपवरून राऊतांचा सरकारवर घणाघात, म्हणाले- डुप्लिकेट चाणक्याचे दिवस संपले मराठा आरक्षण आंदोलक मनोज जरांगे पाटील यांनी उघड केलेल्या ऑडिओ क्लिपवरून शिवसेना उद्धव बाळासाहेब ठाकरे गटाचे नेते संजय राऊत यांनी आज पत्रकार परिषद घेत राज्य सरकार आणि तपास यंत्रणांवर जोरदार हल्लाबोल केला. तसेच, या प्रकरणाची एसआयटी किंवा फॉरेन्सिक चौकशी करण्याऐवजी आधी एफआयआर दाखल करावा, असेही त्यांनी स्पष्ट केले. येथे वाचा संपूर्ण बातमी
Source link
तहसीलदार अन् पोलिसांवरील प्रक्षोभक भाषण भोवले:बच्चू कडूंना आता द्यावे लागणार व्हॉईस सॅम्पल; घुग्गुस पोलिसांची 26 ऑक्टोबरला हजर राहण्याची नोटीस
