पुणे आणि पिंपरी-चिंचवडमध्ये पोलिसांनी दोन वेगवेगळ्या कारवाया करत सराईत गुन्हेगारांकडून देशी बनावटीची पिस्तूलं जप्त केली आहेत. या प्रकरणी दोन आरोपींना अटक करण्यात आली असून, त्यांच्याकडून पिस्तूल, काडतुसे, मोबाईल आणि दुचाकीसह इतर मुद्देमाल हस्तगत करण्यात आला आहे. पहिल्या घटनेत, पिंपरी-चिंचवडमधील सराईत गुन्हेगार सुशील तानाजी गायकवाड (वय ३९, रा. दत्तनगर झोपडपट्टी, चिंचवड) याला गुन्हे शाखेने अटक केली. पुणे-सोलापूर रस्त्यावरील थेऊर फाटा परिसरातून त्याला ताब्यात घेण्यात आले. त्याच्याकडून एक देशी बनावटीचे पिस्तूल, चार जिवंत काडतुसे, एक मोबाईल आणि एक दुचाकी असा एकूण मुद्देमाल जप्त करण्यात आला. गायकवाड याच्याविरुद्ध यापूर्वी गंभीर स्वरूपाचे दोन गुन्हे दाखल आहेत आणि तो गुन्हा दाखल झाल्यापासून फरार होता. गुन्हे शाखेच्या युनिट सहामधील सहायक पोलीस निरीक्षक संतोष कदम यांना गायकवाडकडे पिस्तूल असल्याची माहिती मिळाली होती. त्यानंतर पोलीस उपायुक्त गौहर हसन आणि सहायक आयुक्त राजेंद्र मुळीक यांच्या मार्गदर्शनाखाली पोलीस निरीक्षक संतोष शेटे यांच्या पथकाने सापळा रचून त्याला पकडले. या पथकात सहायक निरीक्षक कदम, उपनिरीक्षक आशिष जाधव, ज्ञानेश्वर शिर्के, तानाजी देशमुख, श्रीकांत पांडुळे, बाळासाहेब सकटे, अमित कांबळे आणि अमित सस्ते यांचा समावेश होता. दुसऱ्या घटनेत, पर्वती परिसरातून अनिकेत बापू कसबे (वय २५, रा. राजीव गांधीनगर, दांडेकर पूल, पर्वती) या सराईत गुन्हेगाराला पोलिसांनी अटक केली. त्याच्याकडून एक देशी बनावटीचे पिस्तूल आणि एक जिवंत काडतूस जप्त करण्यात आले. पर्वती पोलीस ठाण्याचे पथक गस्त घालत असताना कसबे याच्याकडे पिस्तूल असल्याची माहिती मिळाली. त्यानंतर सहायक आयुक्त गजानन पवार यांच्या मार्गदर्शनाखाली वरिष्ठ पोलीस निरीक्षक राजेंद्र सहाणे, गुन्हे शाखेच्या निरीक्षक अनिता हिवरकर यांच्या पथकाने सापळा रचून त्याला पकडले. या कारवाईत सहायक निरीक्षक विशाल राऊत, उपनिरीक्षक प्रकाश खिलारी, प्रकाश मरगजे, अमोल दबडे, अमित चिव्हे आणि रणजीत घाडगे यांनी सहभाग घेतला.
Source link
दोन सराईत आरोपींकडून पिस्तूल जप्त:पुणे आणि पिंपरी-चिंचवडमध्ये पोलिसांची कारवाई
