Headlines

पवई तलावात 180 मीटर लांबीचा भव्य म्युझिकल फाउंटन:छत्रपती शिवाजी महाराजांचा इतिहास आणि महाराष्ट्राच्या संस्कृतीचे होणार दर्शन




मुंबईतील पवई तलावाच्या सौंदर्यात आता आणखी भर पडणार आहे. तलावाच्या परिसरात उभारण्यात आलेला 180 मीटर लांबीचा अत्याधुनिक म्युझिकल फाउंटन मुंबईकरांसह देश-विदेशातील पर्यटकांसाठी नवे आकर्षण ठरणार आहे. या म्युझिकल फाउंटनच्या माध्यमातून महाराष्ट्राची संस्कृती, संतपरंपरा, मराठ्यांचा देदीप्यमान इतिहास, छत्रपती शिवाजी महाराजांचा पराक्रम आणि मुंबईची गौरवशाली गाथा आधुनिक तंत्रज्ञानाच्या माध्यमातून सादर केली जाणार आहे. हा मुंबईकरांसाठी अभिमानाचा क्षण असल्याचे प्रतिपादन कॅबिनेट मंत्री मंगल प्रभात लोढा यांनी केले. तसेच पवई तलावाचे नैसर्गिक सौंदर्य जपण्यासोबतच तलावाच्या स्वच्छतेवरही विशेष लक्ष दिले जाणार असल्याचे त्यांनी स्पष्ट केले. पवई तलाव येथील गणेश घाटावर उभारण्यात आलेल्या ‘लाईट, साउंड आणि म्युझिकल फाउंटन शो’चे उद्घाटन रविवारी (22 नोव्हेंबर) सायंकाळी कॅबिनेट मंत्री मंगल प्रभात लोढा यांच्या हस्ते करण्यात आले. या उद्घाटन सोहळ्याला नागरिकांनी मोठी गर्दी केली होती. यावेळी मुंबई उपनगरचे जिल्हाधिकारी सौरभ कटियार, म्हाडाच्या स्लम बोर्डाचे मुख्य अधिकारी सतीश भारतीय यांच्यासह म्हाडा आणि महानगरपालिकेचे अधिकारी उपस्थित होते. महाराष्ट्राचा इतिहास आणि संस्कृती आधुनिक तंत्रज्ञानातून उलगडणार या म्युझिकल फाउंटनचे सर्वात मोठे वैशिष्ट्य म्हणजे यामधून महाराष्ट्राच्या ऐतिहासिक आणि सांस्कृतिक वारशाचे दर्शन घडणार आहे. छत्रपती शिवाजी महाराजांचा पराक्रम, मराठ्यांचा देदीप्यमान इतिहास, महाराष्ट्राची संतपरंपरा आणि राज्याची समृद्ध संस्कृती यांचा समावेश या शोमध्ये करण्यात आला आहे. प्रकाश, संगीत, पाण्याचे कारंजे आणि अत्याधुनिक दृश्य परिणाम यांच्या माध्यमातून हा इतिहास प्रेक्षकांसमोर भव्य स्वरूपात मांडला जाणार आहे. त्यामुळे मनोरंजनासोबतच महाराष्ट्राच्या इतिहासाची आणि सांस्कृतिक वारशाची माहितीही पर्यटकांना मिळणार आहे. याबाबत बोलताना मंत्री मंगल प्रभात लोढा म्हणाले की, सुमारे 180 मीटर लांबीचा हा अत्याधुनिक म्युझिकल फाउंटन देशातील सर्वात मोठ्या फाउंटन्सपैकी एक ठरणार आहे. मुंबईकरांसाठी हा अभिमानाचा क्षण असून, या माध्यमातून महाराष्ट्राचा गौरवशाली इतिहास जगासमोर मांडण्याचा प्रयत्न करण्यात आला आहे. मुंबईकरांसह देश-विदेशातून येणाऱ्या पर्यटकांनी या शोचा आनंद घ्यावा, असे आवाहनही त्यांनी केले. संगीतमय कारंजे, वॉटर स्क्रीन आणि फायर जेट्सचे आकर्षण या प्रकल्पांतर्गत जागतिक दर्जाचा मल्टिमीडिया लाईट अँड साउंड शो साकारण्यात आला आहे. यामध्ये संगीतमय कारंजे, वॉटर स्क्रीन आणि फायर जेट्स यांसारख्या अत्याधुनिक सुविधांचा समावेश आहे. पाण्याच्या पडद्यावर प्रकाशाच्या साहाय्याने विविध दृश्ये साकारली जाणार आहेत. संगीताच्या तालावर उंच उडणारे कारंजे, रंगीबेरंगी प्रकाशयोजना आणि आगीच्या जेट्समुळे हा शो अधिक आकर्षक होणार आहे. विशेष दृश्य परिणामांच्या माध्यमातून तीन वेगवेगळे चित्रपट सादर केले जाणार आहेत. या चित्रपटांमधून इतिहास, संस्कृती आणि महाराष्ट्राच्या वारशाचे दर्शन घडणार आहे. त्यामुळे लहान मुलांपासून ज्येष्ठ नागरिकांपर्यंत सर्वांसाठी हा शो मनोरंजनाचा एक वेगळा अनुभव ठरण्याची अपेक्षा आहे. दररोज 30 लाख लिटर पाण्यात हवामिश्रण होण्यास मदत या म्युझिकल फाउंटनचे वैशिष्ट्य केवळ मनोरंजनापुरते मर्यादित नाही, तर त्याचे काही पर्यावरणीय फायदेही अपेक्षित आहेत. फाउंटनमध्ये तलावातील पाण्याचे एरेशन अर्थात हवामिश्रण करण्याची व्यवस्था करण्यात आली आहे. या प्रक्रियेमुळे दररोज सुमारे 30 लाख लिटर पाण्यात हवा मिसळण्यास मदत होणार आहे. परिणामी पाण्यातील विरघळलेल्या ऑक्सिजनचे प्रमाण वाढण्यास हातभार लागू शकतो. याशिवाय पाण्याच्या बाष्पीभवनामुळे परिसरात थंडावा निर्माण होण्यास आणि स्थानिक तापमान कमी होण्यासही मदत होण्याची अपेक्षा व्यक्त केली जात आहे. पवई तलावाच्या स्वच्छतेवरही विशेष लक्ष म्युझिकल फाउंटनमुळे पवई तलावाच्या पर्यटनमूल्यात वाढ होणार असली, तरी तलावाचे नैसर्गिक सौंदर्य आणि पर्यावरण जपणेही महत्त्वाचे आहे. यासाठी तलावाच्या स्वच्छतेवर विशेष लक्ष दिले जाणार असल्याचे मंत्री मंगल प्रभात लोढा यांनी सांगितले. पर्यटन विकासासोबतच तलावाचे संवर्धन आणि परिसराची स्वच्छता राखण्यावरही भर देण्यात येणार आहे. दरम्यान, उद्घाटनानंतर म्युझिकल फाउंटनचा पहिला शो पाहण्यासाठी नागरिकांनी मोठी गर्दी केली होती. प्रकाश, संगीत, पाण्याचे कारंजे आणि महाराष्ट्राच्या इतिहासाचा अनोखा संगम अनुभवण्यासाठी नागरिक उत्सुक दिसले. आधुनिक तंत्रज्ञानाच्या माध्यमातून महाराष्ट्राचा ऐतिहासिक आणि सांस्कृतिक वारसा सादर करणारा हा प्रकल्प मुंबईच्या पर्यटन नकाशावर पवई तलावाला नवी ओळख मिळवून देणारा ठरेल, अशी अपेक्षा व्यक्त केली जात आहे. हेही वाचा….. रॅपिडोच्या दुचाकी प्रवासी वाहतुकीविरोधात मनसेसह रिक्षा संघटना आक्रमक:उद्या संपूर्ण महाराष्ट्रात रिक्षा बंद आंदोलनाची हाक महाराष्ट्रात उद्या (23 नोव्हेंबर) रिक्षा बंद आंदोलनाची हाक देण्यात आली आहे. रॅपिडोच्या माध्यमातून सुरू असलेल्या दुचाकीवरील प्रवासी वाहतुकीला विरोध करण्यासाठी राज्यातील रिक्षा संघटना एकवटल्या आहेत. महाराष्ट्र नवनिर्माण सेना आणि सर्वपक्षीय रिक्षा वाहतूक संघटनांनी या आंदोलनाला पाठिंबा दिला आहे. त्यामुळे उद्या राज्यातील विविध शहरांमध्ये रिक्षा सेवा विस्कळीत होण्याची शक्यता आहे. या आंदोलनाचा परिणाम मुंबई, पुणे, नाशिक, छत्रपती संभाजीनगर आणि नागपूरसह अन्य शहरांमध्ये जाणवू शकतो. सविस्तर वाचा…..



Source link

Leave a Reply

Your email address will not be published. Required fields are marked *