जून महिना निम्मा उलटून गेल्यानंतरही मराठवाड्यात पावसाने हजेरी लावलेली नाही. धाराशिव वगळता उर्वरित मराठवाड्याला पावसाची प्रतीक्षा आहे. छत्रपती संभाजीनगर जिल्ह्यात केवळ १७.४ टक्के पावसाची नोंद झाली आहे. मराठवाड्यात ७ जूनच्या आसपास मान्सूनचे आगमन होते. त्यापूर्वी २५ मेनंतर रोहिणी नक्षत्रात पूर्व मोसमी पावसाच्या सरी हजेरी लावतात. त्यामुळे मराठवाड्यात पेरण्यांना सुरुवात होते. या वर्षी मात्र मराठवाड्यात अद्याप पावसाचे आगमन झालेले नाही. मराठवाड्याच्या सीमेवरील सोलापूर जिल्ह्यात मान्सून ८ जून रोजी दाखल झाला. त्यानंतर त्याची वाटचाल थांबलेली आहे. सोलापूर जिल्ह्यालगत असलेल्या धाराशिव जिल्ह्यात आतापर्यंतच्या सरासरीएवढा पाऊस झाला. मात्र, उर्वरित मराठवाड्याला पावसाची प्रतीक्षा आहे. पेरण्या खोळंबल्या मराठवाड्यात पाऊस नसल्यामुळे खरिपाच्या पेरण्या खोळंबल्या आहेत. विभागात खरिपाचे २२ लाख ८१ हजार ८२१ हेक्टर क्षेत्र आहे. आतापर्यंत ६ हजार ७१३ हेक्टरवर पेरण्या झाल्याची नोंद कृषी विभागाकडे आहे. त्यापैकी ४ हजार ८२१ हेक्टर क्षेत्र कापसाचे आहे. गेल्या वर्षी जूनच्या पहिल्या पंधरवड्याच्या शेवटी विभागात २४ हजार ७८६ हेक्टरवर पेरण्या केल्या होत्या. संभाजीनगर, जालना, परभणीत निम्म्यापेक्षा कमी पाऊस मराठवाड्यात २०२५मध्ये पावसाने दमदार हजेरी लावली होती. १९ जूनपर्यंत विभागात ६४.९ मिलिमीटर पाऊस पडला होता. सरासरीच्या तुलनेत हे प्रमाण ७६.४ टक्के होते. विशेष म्हणजे छत्रपती संभाजीनगर जिल्ह्यात सरासरीच्या तुलनेत १०४ टक्के, तर धाराशिव जिल्ह्यात १०८.५ टक्के पाऊस पडला होता. जालना व लातूर जिल्ह्यांत ७५ टक्क्यांपेक्षा जास्त, तर बीड, नांदेड जिल्ह्यांत ६० टक्क्यांपेक्षा जास्त पावसाची नोंद होती. परभणी जिल्ह्यांत सर्वात कमी ४५.७ टक्के पाऊस पडला होता. धाराशिव वगळता उर्वरित मराठवाड्यात यंदा गेल्या वर्षीच्या तुलनेत उलट स्थिती आहे.
Source link
पावसाकडे डोळे:मराठवाड्यातील 8 पैकी 7 जिल्ह्यांकडे पावसाची पाठ, विभागात आतापर्यंत सरासरीच्या 48.5 टक्के पाऊस
