पुण्यात विचित्र अपघात:कारचा दरवाजा उघडल्याने दुचाकीस्वार रस्त्यावर फेकला गेला; दुहेरी धडकेत जागीच मृत्यू

पुण्यात एका छोट्याशा निष्काळजीपणामुळे निष्पाप दुचाकीस्वाराला आपला जीव गमवावा लागल्याची अत्यंत दुर्दैवी आणि धक्कादायक घटना घडली आहे. रस्त्याच्या कडेला उभ्या असलेल्या कारच्या चालकाने पाठीमागे न पाहता अचानक दरवाजा उघडल्याने हा अनर्थ घडला. नेमका अपघात कसा झाला? पुण्यातील लष्कर पोलिस ठाण्याच्या हद्दीतील एका अरुंद रस्त्यावर हा विचित्र अपघात झाला. एक कार रस्त्याच्या कडेला उभी होती आणि त्याच वेळी सूर्यकांत बिडकर हे त्यांच्या दुचाकीवरून तिथून जात होते. रस्ता मोकळा असल्याने ते पुढे जात असतानाच, कारच्या ड्रायव्हिंग सीटवर बसलेल्या चालकाने पाठीमागून येणाऱ्या वाहनांचा कोणताही अंदाज न घेता अचानक कारचा दरवाजा उघडला. दुहेरी धडक आणि जागीच मृत्यू दरवाजा अचानक उघडल्यामुळे सूर्यकांत बिडकर यांना सावरण्याची संधीच मिळाली नाही आणि त्यांची दुचाकी थेट त्या दरवाजाला जाऊन जोरात धडकली. या धडकेची तीव्रता इतकी मोठी होती की, ते थेट रस्त्यावर फेकले गेले. दुर्दैव म्हणजे, ते खाली पडताच त्याच वेळी विरुद्ध दिशेने येणाऱ्या दुसऱ्या एका वाहनाचीही त्यांना जोरदार धडक बसली. या भीषण अपघातात बिडकर यांच्या डोक्याला जबर मार लागला आणि रक्तस्राव झाल्याने त्यांचा जागीच दुर्दैवी मृत्यू झाला. पोलिसांची कारवाई सुरू एका क्षणाच्या चुकीने आणि निष्काळजीपणामुळे हसतखेळत कुटुंबातील व्यक्ती गेल्याने बिडकर कुटुंबावर दुःखाचा डोंगर कोसळला आहे. या धक्कादायक घटनेनंतर सूर्यकांत बिडकर यांच्या कुटुंबीयांनी लष्कर पोलीस ठाण्यात रीतसर तक्रार दाखल केली आहे. पोलिसांनी या तक्रारीची दखल घेत घटनेची नोंद केली असून, अपघाताला कारणीभूत ठरलेल्या कारची आणि चालकाची सखोल चौकशी सुरू केली आहे. वाहनचालकांनी गाडीचा दरवाजा उघडताना पाठीमागे पाहणे किती गरजेचे आहे, हे या दुर्दैवी घटनेतून पुन्हा एकदा समोर आले आहे. संबंधित बातमी वाचा.. पुण्यात रस्ते अपघातांचे सत्र: शहराच्या विविध भागांत झालेल्या 5 वेगवेगळ्या अपघातांत 5 जणांचा बळी पुणे शहरात विविध भागांत झालेल्या रस्ते अपघातांमध्ये पाच जणांचा मृत्यू झाला आहे. याप्रकरणी संबंधित वाहनचालकांविरुद्ध पाच स्वतंत्र गुन्हे दाखल करण्यात आले आहेत. विश्रामबाग, उत्तमनगर, नांदेड सिटी, नऱ्हे आणि खडकी पोलीस ठाण्यांच्या हद्दीत या घटना घडल्या आहेत. टिळक रस्त्यावर भरधाव कारने दुचाकीला धडक दिल्याने ८० वर्षीय रवींद्र अनंत जोशी (आनंदनगर) गंभीर जखमी झाले होते. उपचारादरम्यान त्यांचा मृत्यू झाला. त्यांचे पुत्र रोहित जोशी यांनी विश्रामबाग पोलीस ठाण्यात फिर्याद दिली असून, पोलीस उपनिरीक्षक एन. भंडारे पुढील तपास करत आहेत. सविस्तर वाचा



Source link