प्रभाग क्रमांक १ मध्ये कंत्राटदार कंपनीकडे कार्यरत असलेल्या अनेक स्वच्छता कर्मचाऱ्यांना मे महिन्याचे वेतन अजूनही न मिळाल्याने संतप्त कर्मचाऱ्यांनी बुधवारी (दि. १७) सकाळी कामबंद आंदोलन केले. वेतनाच्या प्रश्नाकडे प्रशासनाचे दुर्लक्ष होत असल्याचा आरोप करत कर्मचाऱ्यांनी कामावर हजर होऊन प्रत्यक्ष काम करण्यास नकार दिला. प्रभाग क्रमांक १ मध्ये कोणार्क कंपनीचे सुमारे ७० स्वच्छता कर्मचारी कार्यरत आहेत. यापैकी काही कर्मचाऱ्यांचे वेतन अदा करण्यात आले असले तरी बहुतांश कर्मचारी अद्यापही वेतनापासून वंचित आहेत. एक महिना पूर्ण होऊन दुसऱ्या महिन्याची १७ तारीख उजाडली. तरीही वेतन न मिळाल्याने कर्मचाऱ्यांमध्ये तीव्र नाराजी निर्माण झाली आहे. बुधवारी सकाळी कर्मचारी नेहमीप्रमाणे हजेरीसाठी उपस्थित झाले. मात्र वेतन न मिळाल्याने त्यांनी काम करण्यास स्पष्ट नकार दिला. या प्रकरणाची गंभीर दखल घेत प्रभागाचे नगरसेवक गुड्डू धर्माळे यांनी सकाळीच मनपा आयुक्त वर्षा ठाकूर यांच्याशी दूरध्वनीवर संपर्क साधला. त्यांनी परिस्थितीची माहिती दिली. आयुक्तांनी लवकरच या प्रश्नावर तोडगा काढण्याचे आश्वासन दिले. त्यामुळे गुरुवारी प्रभाग क्रमांक १ मधील स्वच्छता सेवा नियमित राहणार की नाही, याबाबत साशंकता व्यक्त केली जात आहे. स्वच्छता कर्मचाऱ्यांच्या कामबंद आंदोलनाचा परिणाम परिसरातील स्वच्छतेवर होण्याची शक्यता आहे. नागरिकांच्या आरोग्याचा प्रश्नही ऐरणीवर आला आहे. वेतन वेळेवर मिळायलाच पाहिजे; निर्णय घ्यावा नागरिकांकडून तक्रारी आल्यानंतर आम्ही स्वच्छता कर्मचाऱ्यांना हक्काने स्वच्छतेविषयी कामे सांगत असतो. ती कामे कर्मचारी करतात. त्यामुळे त्यांना वेळेवर वेतन मिळणे अपेक्षित आहे. वेतन न मिळाल्याने त्यांनी काम बंद केले. यासंदर्भात मी सकाळी साडेसहा वाजताच मनपा आयुक्तांना फोन करून माहिती दिली होती. – गुड्डू धर्माळे, नगरसेवक.
Source link
वेतनच मिळाले नाही; प्रभाग क्रमांक 1 मधील स्वच्छता कर्मचारी संपावर:17 जून उजाडली तरीही अनेक कर्मचारी वंचित
