राहाता तालुक्यात उघडकीस आलेल्या अवैध गर्भलिंग निदान चाचणी व बेकायदेशीर गर्भपात प्रकरणाने गंभीर वळण घेतले आहे. या रॅकेटचे धागेदोरे आता नाशिक जिल्ह्यातील निफाडपर्यंत पोहोचले आहे. पोलिसांनी तेथून आणखी दोघांना अटक केली. विशेष म्हणजे, या संपूर्ण आंतर जिल्हा रॅकेटमध्ये आतापर्यंत तब्बल 18 आरोपी पोलिसांच्या जाळ्यात अडकले आहेत. त्यात 6 डॉक्टरांचा समावेश असल्याने वैद्यकीय वर्तुळात मोठी खळबळ उडाली आहे. लोणी (ता. राहाता) पोलिस ठाण्यात सुरुवातीला या प्रकरणी गुन्हा दाखल करण्यात आला होता. सुरुवातीच्या कारवाईत नेवासा येथील डॉ. भणगे, दोन एजंट आणि सहा कुटुंबीय अशा नऊ जणांना अटक करून एक पोर्टेबल सोनोग्राफी मशीन आणि तीन चारचाकी वाहने जप्त करण्यात आली होती. पोलिस तपासाची व्याप्ती वाढल्यानंतर ढगे नामक आरोपीकडून दुसरे पोर्टेबल सोनोग्राफी मशीन जप्त केले. त्यानंतर श्रीरामपूर येथील डॉ.कुटे व डॉ. शेख यांना बेकायदेशीर चाचण्या आणि गर्भपात केल्याच्या आरोपाखाली अटक करण्यात आली. तपास पुढे सरकल्यावर पुणे येथील दोन डॉक्टर आणि वैद्यकीय साहित्य विक्री करणाऱ्या एका व्यक्तीला अटक करण्यात आली; हे आरोपी बेकायदेशीररीत्या सोनोग्राफी मशीन विकत असल्याचे उघड झाले. त्यानंतर वडगाव मावळ येथील मारुती ढोरे याच्याकडूनही अवैध मशीन जप्त करण्यात आले. वैज्ञानिक पद्धतीने तपास सुरू असताना, पुण्यातील आरोपींकडून नाशिक जिल्ह्यातील निफाड येथील दोघांनी बेकायदेशीर सोनोग्राफी मशीन खरेदी केल्याचे निष्पन्न झाले. श्रीरामपूरचे अप्पर पोलिसअधीक्षक सोमनाथ वाकचौरे यांच्या विशेष पथकाने पहाटे निफाड परिसरातून डॉ.कुणाल प्रभाकर वल्टे (वय 33),सागर शांताराम उल्हाळ (वय 25)यांना ताब्यात घेतले. डॉ. वल्टे हे बीएएमएस डॉक्टर असून करंजगाव येथे दवाखाना चालवितात. ते आधी अटक झालेल्या डॉ. भणगे यांचे वर्गमित्र आहेत. तर उल्हाळ हा नांदूरमधमेश्वर येथील रहिवासी असून त्याची ब्लड टेस्टिंग लॅब आहे. डॉ.वल्टे यांनी बेकायदेशीर मशीन याच लॅबमध्ये लपवून ठेवण्यासाठी दिले होते. न्यायालयाने या दोन्ही आरोपींना चार दिवसांची पोलीस कोठडी सुनावली. या संपूर्ण कारवाईत वेगवेगळ्या जिल्ह्यांतून एकूण 4 बेकायदेशीर सोनोग्राफी मशिन्स आणि 3 चारचाकी वाहने जप्त करण्यात आली आहेत. जिल्हा पोलिस अधीक्षक एम.सुदर्शन, अप्पर पोलिस अधीक्षक सोमनाथ वाकचौरे यांच्या मार्गदर्शनाखाली डीवायएसपी भारतीव सहाय्यक पोलिस निरीक्षक आठरे या प्रकरणाचा पुढील सखोल तपास करत आहेत.
Source link
शिर्डी लिंगनिदान, गर्भपात रॅकेटचे धागेदोरे नाशिकपर्यंत:निफाडमधून दोघांना अटक, रॅकेटमध्ये आतापर्यंत 18 आरोपी गजाआड; त्यात 6 डॉक्टरांचा समावेश
