जिल्ह्याच्या चांदूर रेल्वे तालुक्यातील श्री क्षेत्र सावंगा (विठोबा) येथे ज्येष्ठ मास अमावस्येचे औचित्य साधून विविध धार्मिक व आध्यात्मिक कार्यक्रमांचे आयोजन करण्यात आले आहे. श्री विठोबा संस्थान उर्फ श्रीकृष्ण अवधूत बुवा संस्थानच्या वतीने हे कार्यक्रम पार पडणार आहेत. परिसरात सध्या भक्तीचे वातावरण निर्माण झाले आहे. संस्थानच्या वतीने १५ जून, सोमवार रोजी सायंकाळी ५ वाजता संस्थान परिसरात अत्यंत भक्तिमय वातावरणात ‘चंदन उटी उत्सव’ साजरा करण्यात येणार आहे. या धार्मिक सोहळ्यानंतर बाहेरगावाहून येणाऱ्या भाविक भक्तांसह समस्त ग्रामस्थांसाठी संस्थानच्या अन्नदान समितीच्या वतीने भव्य महाप्रसादाचे (भंडारा) आयोजन करण्यात आले आहे. गेल्या महिनाभरापासून १६ मे ते १५ जून दरम्यान अधिक मासानिमित्त मंदिरात अखंड जागृती भजन-मांड कार्यक्रम सुरू आहे. या कार्यक्रमाचा सांगता सोहळा, म्हणजेच ‘मांड वाढवा’ कार्यक्रम १६ जून रोजी मंगळवारी सकाळी ९:०० वाजता पार पडेल. महाराजांच्या पवित्र अरज व आरतीने, भजनाच्या गजरात, विश्वस्त मंडळ व भाविक भक्तांच्या उपस्थितीत हा सोहळा होईल. या अखंड भजनाच्या मांडीमध्ये महिनाभर दैनंदिन दिवसपाळीत निस्वार्थ भावनेने सेवा देणाऱ्या सर्व सेवाधारी भजनकार भाविकांचा संस्थानच्या वतीने सन्मानपत्र देऊन विशेष सत्कार करण्यात येणार आहे. या सर्व धार्मिक, सांस्कृतिक व आध्यात्मिक कार्यक्रमांचा लाभ घेण्यासाठी परिसरातील तसेच दूरवरून येणाऱ्या भाविक-भक्तांनी मोठ्या संख्येने उपस्थित राहावे. तन-मन-धनाने सहकार्य करावे. असे आवाहन संस्थानचे अध्यक्ष पुंजाराम नेमाडे, उपाध्यक्ष कृपासागर राऊत, सचिव अशोक सोनवाल तसेच विश्वस्त विनायक पाटील, वसंत शेंडे, गोविंद राठोड, फुलसिंग राठोड, चरणदास कांडलकर, प्रविण कुकडकर, लक्ष्मण राठोड, वैभव मानकर, स्वप्निल चौधरी आणि संस्थानच्या सर्व कर्मचाऱ्यांनी केले. एसटी बसेसची व्यवस्था भाविकांना सावंगा विठोबा येथे जाण्यासाठी चांदूर रेल्वे तसेच अमरावतीहून एसटी बसेसची व्यवस्था करण्यात आली आहे. यामुळे भाविकांना खासगी वाहनाने जास्त पैसे देऊन सावंगा विठोबा येथे जावे लागणार नाही. भाविक भक्तांची गैरसोय होऊ नये म्हणून राज्यच नव्हे तर देशभरातून येणाऱ्या भाविकांसाठी ही सोय केली जाते. यामुळे त्यांना अमरावतीहून थेट सावंगा विठोबा, सावंगा विठोबा ते अमरावती अशी ये-जा करण्याची सुविधा मिळते.
Source link
सावंगा विठोबा नगरी भक्तीत लीन:‘चंदन उटी’ उत्सवाची रेलचेल सुरु, सेवाधारी भजनकारांचा सत्कार, मांड वाढवा कार्यक्रमही होणार
