रुग्णालयातील कर्मचाऱ्यांशी गैरवर्तन केल्याने जाब विचारणाऱ्या एकाला मारहाण करण्यात आल्याची घटना हडपसर भागात घडली. या प्रकरणी हडपसर पोलिसांनी महिलेसह सात जणांविरुद्ध गुन्हा दाखल केला. याबाबत रमीत राकेश गुप्ता (वय ३५, सध्या रा. मगरपट्टा सिटी, हडपसर, मूळ रा. जिंदल ग्लोबल सिटी, सोनीपत, हरयाणा) यांनी हडपसर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, एका महिलेसह नातेवाईकांविरुद्ध गुन्हा दाखल करण्यात आला. पोलिसांनी दिलेल्या माहितीनुसार, गुप्ता यांचे नातेवाईक हडपसर भागातील एका रुग्णालयात उपचार घेत आहेत. ३ ऑक्टोबर रोजी फिर्यादी आणि त्यांचे मित्र सकाळी सातच्या सुमारास रुग्णालयातील बिलिंग विभागात पैसे भरण्यासाठी थांबले होते. त्यावेळी एक बुरखा परिधान केलेली महिला आणि तिचे नातेवाईक बिलिंग विभागात आले होते. रुग्णालयातील बिलावरुन ते बिलिंग विभागातील कर्मचाऱ्यांशी वाद घालत होते. आरोपी रुग्णालयाच्या आवारात शिवीगाळ करत होते. बिलिंग विभागात रांगेत थांबलेले गुप्ता यांनी आरोपींना शिवीगाळ करु नका, तसेच रुग्णालयातील कर्मचाऱ्यांशी गैरवर्तन करु नका, असे सांगितले. या कारणावरुन आरोपी चिडले. आरोपींनी गुप्ता यांना शिवीगाळ करुन मारहाण केली. मारहाणीच्या प्रकारानंतर गुप्ता यांनी पोलिसांकडे तक्रार दिली. वरिष्ठ पोलीस निरीक्षक हेमंत पाटील यांनी घटनास्थळी भेट दिली.बेकायदा जमाव जमविणे, तसेच मारहाण केल्या प्रकरणी सात आरोपींविरुद्ध गुन्हा दाखल करण्यात आला आहे. या प्रकरणी महिलेसह, तिचे नातेवाईक इब्राहिम शेख, मुन्ना शेख, गुड्डू शेख, खलिजा शेख यांच्यासह सात जणांविरुद्ध गुन्हा दाखल करण्यात आला आहे. पोलीस उपनिरीक्षक एन फाटे तपास करत आहेत. पोलिसांचा खबरी असल्याचा आरोप करुन दहशत माजविण्याचा प्रकार- तरुणाला कोयत्याच्या दांड्याने मारहाण पोलिसांचा खबरी असल्याचा आरोप करुन टोळक्याने एका तरुणाला कोयत्याच्या दांड्याने मारहाण केली. टोळक्याने दहशत माजविल्याची घटना लोहगाव येथील विमानतळ परिसरात घडली. या प्रकरणी जाहिद शेख (रा. बर्मा शेल, लोहगाव रस्ता), मोहन उर्फ तम्मा यांच्याविरुद्ध गुन्हा दाखल करण्यात आला. याबाबत सतीश रमेश टिळे (वय २५, रा. साई कृपा सोसायटी, सोमनाथनगर, वडगाव शेरी) याने विमानतळ पोलीस ठाण्यात फिर्याद दिली आहे. पोलिसांनी दिलेल्या माहितीनुसार, ३ ऑक्टोबर रोजी दुपारी साडेतीनच्या सुमारास तक्रारदार तरुण पुणे विमानतळाजवळील एरोमाॅल परिसरात मोकळ्या जागेत थांबला होता. त्या वेळी आरोपी तेथे आले. ‘तू पोलिसांचा खबरी आहे’, असा आरोप करुन आरोपींनी तरुणाला शिवीगाळ केली. तरुणाला शिवीगाळ केल्यानंतर त्याच्या डोक्यात कोयत्याचा दांडा मारला. कोयत्याचा दांडा मारल्याने तरुण जखमी झाला. त्यानंतर आरोपींनी परिसरात दहशत माजविली. तरुणाला जीवे मारण्याची धमकी देऊन आरोपी पसार झाले. पोलीस उपनिरीक्षक एन गाडे तपास करत आहेत.
Source link
हडपसरमध्ये बिलिंगवरून वाद चिघळला:रुग्णालय कर्मचाऱ्यांना शिवीगाळ, सात जणांवर गुन्हा
