ज्येष्ठ अभिनेते नाना पाटेकर यांनी ‘शहरी जीवनाने आपले हळवेपण हिरावून घेतले आहे’ असे मत व्यक्त केले. ‘ही चंद्रचुऱ्याची नक्षी’ या ज्येष्ठ लेखक अनंत सामंत यांच्या पुस्तकाच्या प्रकाशन सोहळ्यात ते बोलत होते. गेल्या काही वर्षांपासून निसर्गाच्या सान्निध्यात राहत असल्याने त्यांना आता शहरातील माणसे, उंच इमारती आणि मोठ्या गाड्यांची भीती वाटू लागली आहे, असे पाटेकर म्हणाले. ही जाणीव वेदनादायी असल्याचे त्यांनी नमूद केले. विदिशा विचार मंच आणि कोहिनूर कट्टा यांच्या संयुक्त विद्यमाने कोहिनूर ग्रुपच्या सहकार्याने हा प्रकाशन सोहळा आयोजित करण्यात आला होता. कर्वे रस्त्यावरील स्वा. सावरकर अध्यासन केंद्रात हा कार्यक्रम पार पडला. रोहन प्रकाशनातर्फे प्रकाशित ‘ही चंद्रचुऱ्याची नक्षी’ हे अनंत सामंत यांचे पुस्तक यावेळी प्रकाशित झाले. यावेळी व्यासपीठावर कोहिनूर ग्रुपचे चेअरमन कृष्णकुमार गोयल, प्रसिद्ध कवी संदीप खरे, प्रसिद्ध अभिनेत्री नेहा जोशी, विदिशा विचार मंचच्या संस्थापक-संचालक ममता क्षेमकल्याणी आणि समन्वयक पंकज क्षेमकल्याणी उपस्थित होते. अनंत सामंत हे वाचकाला झपाटून टाकणारे लेखक आहेत, असे नाना पाटेकर म्हणाले. त्यांच्या लेखनातील निसर्गाची रूपे कल्पनाशक्तीच्या पलीकडची असून, ‘ही चंद्रचुऱ्याची नक्षी’ या पुस्तकात त्यांनी अनेक वैयक्तिक अनुभव लिहिले आहेत. त्यांनी कायम लिहित राहावे, अशी अपेक्षाही पाटेकर यांनी व्यक्त केली. संदीप खरे यांनी यावेळी बोलताना सांगितले की, अनंत सामंत यांचे लेखन वैयक्तिक असले तरी त्याला वैश्विक गाभा आहे. त्यांच्या लेखनातील संवेदनशीलता त्यांच्या वास्तविक जीवनालाही समृद्ध करणारी आहे. कृष्णकुमार गोयल यांनी पुस्तकाचा प्रकाशन सोहळा अभिवाचनाने करण्याची कल्पना चांगली असल्याचे म्हटले. पुस्तक हे एक सशक्त माध्यम असून, अनंत सामंत यांच्यासारख्या लेखकांमुळे ते पुन्हा सिद्ध होते. त्यांचे ‘एम टी आयवा मारू’ हे पुस्तक आजही वाचकांच्या पसंतीस उतरले असून, ‘ही चंद्रचुऱ्याची नक्षी’ हे नवीन पुस्तकही वाचकांना आवडेल, असा विश्वास त्यांनी व्यक्त केला. कार्यक्रमाचे प्रास्ताविक आणि सूत्रसंचालन विदिशा विचार मंचच्या संस्थापक-संचालक ममता क्षेमकल्याणी यांनी केले. यावेळी प्रसिद्ध कवी संदीप खरे आणि प्रसिद्ध अभिनेत्री नेहा जोशी यांनी ‘ही चंद्रचुऱ्याची नक्षी’ या पुस्तकातील निवडक भागांचे अभिवाचन केले.
Source link
'ही चंद्रचुऱ्याची नक्षी' पुस्तकाचे प्रकाशन:शहरी जीवनाने हळवेपण हिरावले, ज्येष्ठ अभिनेते नाना पाटेकर यांचे मत
