चिखलदरा तालुक्यातील रायपुर येथील निवासी आदिवासी आश्रमशाळेत माध्यमिकच्या विद्यार्थ्यांना शिकवण्यासाठी एकही शिक्षक उपलब्ध नसल्याचे धक्कादायक वास्तव समोर आले आहे. शाळेतील एकूण २४ मंजूर पदांपैकी तब्बल १४ पदे रिक्त आहेत, ज्यामुळे आदिवासी विद्यार्थ्यांचे शिक्षण वाऱ्यावर असल्याचे चित्र आहे. ‘खोज’ संस्थेचे ॲड. बंड्या साने यांनी या गंभीर शैक्षणिक अनुशेषाकडे लक्ष वेधले आहे. त्यांनी आदिवासी विकास विभागाचे अपर आयुक्त ते थेट विभागीय आयुक्त यांच्या स्तरावर प्रत्यक्ष भेटी देऊन आणि पत्रव्यवहार करून ही पदे भरण्याची मागणी केली आहे. आदिवासी विद्यार्थ्यांना सोयीचे शिक्षण मिळावे या उद्देशाने शासनाने काही वर्षांपूर्वी रायपुर येथे ही निवासी आश्रमशाळा सुरू केली होती, जिथे प्राथमिक आणि माध्यमिक असे दोन्ही वर्ग भरवले जातात. यावर्षीच्या नोंदीनुसार, शाळेत १२१ मुले आणि ११२ मुली असे एकूण २३३ विद्यार्थी शिक्षण घेत आहेत. मात्र, प्रत्यक्षात विद्यार्थ्यांची उपस्थिती सहसा ७५ टक्क्यांच्या वर जात नाही. शिक्षकांची अनुपलब्धता आणि इतर सुविधांचा अभाव हेच या कमी उपस्थितीमागचे मुख्य कारण असल्याचे स्थानिकांचे म्हणणे आहे. शासकीय सूत्रानुसार, माध्यमिक विभागासाठी ७ शिक्षकांची आवश्यकता असताना एकही शिक्षक उपलब्ध नाही. त्याचप्रमाणे, प्राथमिक विभागासाठी ६ शिक्षकांची गरज असताना केवळ एकच शिक्षक कार्यरत आहे. अशा प्रकारे, दोन्ही विभागांमध्ये एकूण १२ शिक्षकांची पदे रिक्त आहेत. याव्यतिरिक्त, एक स्वयंपाकी आणि एक चौकीदार ही दोन पदेही भरलेली नाहीत. या आश्रमशाळेत कला, क्रीडा आणि संगणक विभागासाठी प्रत्येकी एक शिक्षक मंजूर असतानाही, या तिन्ही विभागांमध्ये एकही शिक्षक नाही. चार बहुउद्देशीय कर्मचाऱ्यांपैकी केवळ एकच कार्यरत आहे, तर मुला-मुलींच्या देखभालीसाठी आवश्यक असलेले नर्सचे एक पदही रिक्त आहे. या गंभीर परिस्थितीबाबत आदिवासी विकास विभागाचे अपर आयुक्त गोलाईत यांच्याशी संपर्क साधण्याचा प्रयत्न केला असता, ते उपलब्ध होऊ शकले नाहीत.
Source link
रायपुर आश्रम शाळेत माध्यमिकला एकही शिक्षक नाही:24 पैकी 14 पदे रिक्त, आदिवासी विद्यार्थ्यांचे शिक्षण वाऱ्यावर
