अमरावती जिल्हा परिषद शिक्षक सहकारी बँकेची वार्षिक सर्वसाधारण सभा रविवार, १६ ऑगस्ट रोजी दुपारी १.३० वाजता होणार आहे. अमरावती येथील कठोरा चौक जकात नाका-रहाटगाव रिंग रोडवरील अंशुमन पॅलेस (श्रीनिवास कॉलनी) येथे ही सभा आयोजित करण्यात आली आहे. बँकेच्या आर्थिक आणि प्रशासकीय कामकाजाशी संबंधित १२ महत्त्वाच्या विषयांवर या सभेत चर्चा करून निर्णय घेतले जातील. या सभेत सन २०२४-२५ च्या वार्षिक अहवालास आणि सन २०२५-२६ च्या अंदाजपत्रकास मंजुरी देण्यावर विचार होईल. तसेच, लेखापरीक्षकांच्या अहवालावर चर्चा करून तो स्वीकारणे आणि मागील वर्षाच्या लेखापरीक्षणातील दोष दुरुस्ती अहवालावर विचार करून स्वीकृती देणे हे विषयही अजेंड्यावर आहेत. याशिवाय, सन २०२६-२७ करिता वैधानिक लेखापरीक्षकांसाठी नियुक्ती करणे व त्यांचे मानधन निश्चित करणे, महाराष्ट्र राज्य सहकारी संस्था अधिनियमातील तरतुदीनुसार बँकेच्या कामकाजाचा आढावा घेणे आणि सभासदांच्या प्रशिक्षणाबाबत विचारविनिमय करणे हे मुद्देही सभेत मांडले जातील. बँकेच्या कर्जावरील व्याजदर, लाभांश, विभागातील महसूल कर्मचाऱ्यांना सभासदत्व बहाल करणे, मुख्यालय इमारतीचे बांधकाम, बुलढाणा शाखा सुरू करणे, संचालक मंडळाची संख्या वाढवणे आणि उच्च शिक्षणासाठी कर्ज उपलब्ध करणे अशा विविध विषयांवर चर्चा करून ठराव मंजूर केले जातील. मुख्यालयाचे बांधकाम आणि महसूल विभागातील कर्मचाऱ्यांना सभासदत्व देण्यावरून वाद होण्याची शक्यता वर्तवली जात आहे. सध्याच्या संचालक मंडळाची ही शेवटची आमसभा असल्याने तिला विशेष महत्त्व प्राप्त झाले आहे. या सभेकडे बँकेच्या सभासदांसह सहकारी क्षेत्रातील सर्वांचे लक्ष लागले आहे. संचालक मंडळाने सर्व सभासदांना या सभेला उपस्थित राहण्याचे आवाहन केले आहे.
Source link
जि.प. शिक्षक बँकेची आमसभा 16 ऑगस्टला:12 विषयांवर चर्चा, वादाची शक्यता
