गणेशोत्सव हा आनंद, उत्साह आणि सामाजिक एकोप्याचा सण असल्याने या उत्सवाला गालबोट लागेल, असे कोणतेही कृत्य गणेश मंडळांनी करू नये. शासनाच्या निर्देशानुसार डीजेचा दणदणाट आणि तीव्र लेझर लाईटचा वापर टाळून पारंपरिक वाद्यांच्या निनादात गणेशोत्सव साजरा करावा. प्रत्येक मंडळाने सामाजिक बांधिलकी जपत रक्तदान शिबिरांचे आयोजन करावे, असे आवाहन करमाड पोलिस ठाण्याचे निरीक्षक सम्राटसिंग राजपूत यांनी केले. रविवारी करमाड पोलिस ठाण्यात आयोजित शांतता समितीच्या बैठकीत ते बोलत होते. यावेळी पोलिस निरीक्षक राजपूत म्हणाले की, गणेश मंडळांनी रस्त्यावर ध्वनिक्षेपक लावून वाहतुकीस अडथळा निर्माण करू नये. मिरवणुकीत लेझर लाईटच्या तीव्र प्रकाशामुळे वाहनचालकांच्या दृष्टीवर परिणाम होऊन अपघाताचा धोका निर्माण होतो. तसेच परिसरात वीजतारा लोंबकळत असल्याने अती उंच गणेशमूर्तींमुळे दुर्घटनेची शक्यता असते. त्यामुळे मंडळांनी उंच मूर्ती बसविणे टाळावे आणि मिरवणूक मार्गाची पूर्वपाहणी करून सुरक्षेची दक्षता घ्यावी. या बैठकीस सहायक पोलीस निरीक्षक गोकूळ ठाकूर, सोपान डकले, शाम ढवळे, संतोष टिमकीकर, माजी सरपंच दत्ताभाऊ उकर्डे, गणेश मुळे, रवीकुमार कुलकर्णी, रामू उकर्डे, डॉ. जिजा कोरडे, गजानन मते, हारून मिर्झा, दुर्गेश जैस्वाल यांच्यासह पदाधिकारी उपस्थित होते. गणेश मंडळांनी सामाजिक दायित्व जपावे गणेशोत्सवाच्या माध्यमातून सामाजिक उपक्रमांना चालना देण्याची मोठी संधी असते. त्यामुळे मंडळांनी रक्तदान शिबिर, आरोग्य तपासणी आणि स्वच्छता अभियान यांसारखे उपक्रम राबवून सामाजिक दायित्व जपावे. रक्तदान शिबिरात उत्स्फूर्त सहभाग घेणाऱ्या गणेश मंडळांना पोलीस प्रशासनाच्या वतीने प्रशस्तीपत्र देऊन गौरविण्यात येईल, अशी घोषणाही त्यांनी केली. दरम्यान, ध्वनिप्रदूषण करणे, लेझर लाईटचा वापर करणे किंवा सुरक्षेच्या नियमांचे उल्लंघन करणाऱ्यांवर कडक कायदेशीर कारवाई करण्यात येईल, असा इशारा प्रशासनाने दिला आहे.
Source link
गणेश मंडळांनो, डीजेचा दणदणाट टाळा, रक्तदानाचा आदर्श घडवा- पोनि. राजपूत
