भारतीय जनता पक्षाचे नवनिर्वाचित राष्ट्रीय अध्यक्ष नितीन नबीन यांचे पक्षाध्यक्षपदाची धुरा सांभाळल्यानंतर बुधवारी प्रथमच मुंबईत आगमन झाले. सध्या राज्यभर सुरू असलेल्या गणेशोत्सवाच्या उत्साहपूर्ण वातावरणात त्यांनी महाराष्ट्राचे आराध्य दैवत श्री सिद्धिविनायक आणि प्रसिद्ध ‘लालबागचा राजा’ यांचे दर्शन घेऊन बाप्पाचा आशीर्वाद घेतला. नबीन यांच्या या पहिल्यावहिल्या मुंबई दौऱ्यात राज्याचे मुख्यमंत्री देवेंद्र फडणवीस हे त्यांच्यासोबत उपस्थित होते. मुंबईत दाखल होताच मुख्यमंत्री फडणवीस यांनी नितीन नबीन यांचे जंगी स्वागत केले. राज्याच्या या सर्वात मोठ्या सणासाठी दिलेल्या आमंत्रणाचा स्वीकार केल्याबद्दल मुख्यमंत्र्यांनी त्यांचे विशेष आभार मानले. “गणेशोत्सव आणि शिवजयंती हे महाराष्ट्राचे सांस्कृतिक प्राण आहेत. नबीन यांच्या उपस्थितीमुळे कार्यकर्त्यांमध्ये आणि गणेशभक्तांमध्ये नवचैतन्य निर्माण झाले आहे,” असे सांगतानाच, गेल्या 12 वर्षांत पंतप्रधान नरेंद्र मोदी यांच्या नेतृत्वाखाली देशात सांस्कृतिक पुनरुज्जीवनाचे पर्व सुरू असल्याचे मुख्यमंत्र्यांनी आवर्जून नमूद केले. बाप्पाचे दर्शन घेतल्यानंतर नितीन नबीन यांनी संपूर्ण देश आणि महाराष्ट्राच्या प्रगतीसाठी साकडे घातले. “छत्रपती शिवाजी महाराजांच्या पावन भूमीत गणेशोत्सवादरम्यान येण्याचे भाग्य मला लाभले असून, देशाच्या आर्थिक व सामाजिक विकासात महाराष्ट्राचे योगदान नेहमीच अग्रगण्य राहिले आहे,” अशी भावना त्यांनी व्यक्त केली. ‘जय भवानी, जय शिवाजी’चा जयघोष हा भारताच्या समृद्ध संस्कृतीचा खरा आत्मा असल्याचे सांगत, दर्शन आटोपल्यानंतर त्यांनी मुख्यमंत्र्यांच्या ‘वर्षा’ या शासकीय निवासस्थानी सदिच्छा भेट दिली. दरम्यान, लालबागच्या राजाच्या दर्शनाला गणेशभक्तांची मोठी गर्दी उसळलीय. पाच तासाहून अधिक रांगेत उभे राहूनही गणेशभक्तांना दर्शनाच्यावेळी पोलिसांकडून धक्काबुक्की करण्यात येतेय. लालबागच्या राजासमोर आलेल्या गणेशभक्तांना बंदोबस्ताला असलेले पोलिस अक्षरशः ढकलून धक्के मारून बाहेर काढत आहेत. त्यामुळे गणेशभक्तांमध्ये पोलिसांच्या विरोधात मोठा रोष निर्माण झाला आहे. कित्येक तास रांगेत उभे राहूनही लालबागच्या राजाच्या दर्शनावेळी पोलिस गणेशभक्तांना करत असलेल्या धक्काबुक्कीचा सर्वच क्षेत्रातून निषेध व्यक्त होत आहे.
Source link
भाजपचे राष्ट्रीय अध्यक्ष नितीन नबीन यांचा पहिला मुंबई दौरा:'लालबागच्या राजा'चे घेतले दर्शन; देशाच्या आणि राज्याच्या प्रगतीसाठी बाप्पासमोर घातले साकडे
