‘गणेशोत्सव – महाराष्ट्राचा राज्य उत्सव’ विशेष टपाल आवरणाचे प्रकाशन:केंद्रीय मंत्री मुरलीधर मोहोळ म्हणाले, पुणेकरांना अपेक्षित असाच उत्सव साजरा करू

केंद्रीय सहकारिता आणि नागरी विमान वाहतूक राज्यमंत्री मुरलीधर मोहोळ यांनी पुणेकरांना अपेक्षित असाच गणेशोत्सव साजरा करण्याची ग्वाही दिली आहे. पुणे श्रमिक पत्रकार संघात टपाल विभागातर्फे आयोजित कार्यक्रमात ते बोलत होते. यावेळी ‘गणेशोत्सव – महाराष्ट्राचा राज्य उत्सव’ या विषयावरील विशेष टपाल आवरणाचे त्यांच्या हस्ते प्रकाशन करण्यात आले. मोहोळ म्हणाले की, पुण्याचा गणेशोत्सव हा कार्यकर्त्यांसाठी अभिमानाचा विषय असला तरी तो मुळात पुणेकरांचा आहे. गणेशोत्सव आणि लोकसहभाग या वेगळ्या गोष्टी असू शकत नाहीत. त्यामुळे सर्वसामान्य पुणेकरांचा सहभाग वाढवून हा उत्सव खऱ्या अर्थाने ‘लोकोत्सव’ म्हणून अधिक व्यापक केला जाईल. पुण्याच्या ऐतिहासिक गणेशोत्सव परंपरेची नोंद टपालाच्या माध्यमातून देशभर पोहोचवण्यासाठी मोहोळ यांनी ही संकल्पना पोस्ट खात्याकडे मांडली होती. या कार्यक्रमाला आमदार हेमंत रासने, महापौर मंजुषा नागपुरे, टपाल विभागाचे मुख्य पोस्टमास्तर जनरल रामचंद्र जायभाये, पुणे विभागाच्या पोस्टमास्तर जनरल प्रीती अग्रवाल, टपाल सेवा संचालक अभिजित बनसोडे आणि पुणे श्रमिक पत्रकार संघाचे अध्यक्ष उमेश शेळके उपस्थित होते. मोहोळ यांनी लोकमान्य बाळ गंगाधर टिळकांनी सार्वजनिक गणेशोत्सवाला समाजजागृतीचे माध्यम बनवल्याचे सांगितले. काळानुसार उत्सवाचे स्वरूप बदलले असले तरी, पुण्याच्या गणेशोत्सवाचा मूळ आत्मा लोकसहभाग हाच आहे. हा उत्सव केवळ मंडळांचा किंवा कार्यकर्त्यांचा नसून संपूर्ण पुणेकरांचा आहे, असे त्यांनी स्पष्ट केले. महाराष्ट्र शासनाने गणेशोत्सवाला ‘राज्य महोत्सवा’चा दर्जा देऊन या परंपरेचा गौरव केला आहे. त्यासाठी मोहोळ यांनी आमदार हेमंत रासने आणि मुख्यमंत्री देवेंद्र फडणवीस यांच्या नेतृत्वाखालील तत्कालीन राज्य सरकारचे अभिनंदन केले. राज्यपातळीवरील सन्मानानंतर आता विशेष टपाल आवरणाच्या माध्यमातून पुण्याच्या गणेशोत्सवाची परंपरा देशपातळीवर पोहोचत आहे, असेही ते म्हणाले. पंतप्रधान नरेंद्र मोदी यांच्या ‘विकास आणि विरासत’ या भूमिकेचा उल्लेख करत मोहोळ म्हणाले की, २०२४७ पर्यंत विकसित भारत घडवताना विकासासोबत सांस्कृतिक वारशाचे जतनही महत्त्वाचे आहे. पुण्याचा गणेशोत्सव हा आपल्या समृद्ध सांस्कृतिक वारशाचा महत्त्वाचा भाग आहे. या परंपरेचे जतन करून ती नव्या पिढीपर्यंत पोहोचवण्याचे काम आपल्याला करायचे आहे.



Source link