पुण्यातील हडपसरजवळील वडाचीवाडी परिसरातून एक अत्यंत धक्कादायक आणि चटका लावणारी घटना उघडकीस आली आहे. सासरच्या मंडळींकडून होणाऱ्या सततच्या शारीरिक व मानसिक छळाला कंटाळून एका 24 वर्षीय उच्चशिक्षित महिला आयटी इंजिनिअरने राहत्या घरी गळफास लावून आपली जीवनयात्रा संपवली. गुरुवारी रात्री घडलेल्या या घटनेमुळे परिसरात तीव्र संताप व्यक्त केला जात आहे. लग्नाला अवघे 4 महिने अन् घडला अनर्थ वैष्णवी ओंकार गिसरे (वय 24, रा. वृंदावन सोसायटी, वडाचीवाडी, पुणे) असे आत्महत्या केलेल्या नवविवाहितेचे नाव आहे. या दुर्दैवी प्रकरणी तिचे वडील प्रवीण रघुनाथ जरांडे (वय 51, रा. कोडीत खुर्द, ता. पुरंदर, जि. पुणे) यांनी काळेपडळ पोलीस ठाण्यात धाव घेत तक्रार नोंदवली आहे. पतीसह सासू-सासऱ्यांवर गुन्हा दाखल वडिलांनी दिलेल्या तक्रारीवरून काळेपडळ पोलिसांनी वैष्णवीचा पती ओंकार संजय गिसरे (वय 28), सासरे संजय महादेव गिसरे (वय 49) आणि सासू रुपाली संजय गिसरे (वय 42, सर्व रा. वृंदावन सोसायटी, वडाचीवाडी, पुणे) यांच्याविरुद्ध हुंडा प्रतिबंधक कायद्यासह आत्महत्येस प्रवृत्त केल्याप्रकरणी गुन्हा दाखल केला आहे. 45 लाखांचा खर्च अन् 10 तोळे सोन्याची भेट, तरीही अतिरिक्त दीड लाखांची हाव पोलिसांनी दिलेल्या माहितीनुसार, वैष्णवी आणि ओंकार यांचा विवाह 9 मे 2026 रोजी पार पडला होता. लग्नादरम्यान मुलीच्या माहेरच्यांनी सुमारे 45 लाख रुपये खर्च केले होते, तसेच 10 तोळे सोनेही आहेर म्हणून दिले होते. मात्र, लग्नानंतर काही दिवसांतच सासरच्या मंडळींची हाव वाढली. नवीन चारचाकी गाडी खरेदी करण्यासाठी माहेरहून आणखी 5 लाख रुपये घेऊन येण्यासाठी वैष्णवीवर सतत दबाव आणला जात होता. या कारणावरून तिला शारीरिक व मानसिक त्रास दिला जात होता. अखेर सासरच्या सततच्या छळाला कंटाळून गुरुवारी रात्री वैष्णवीने घरातील पंख्याला गळफास लावून टोकाचे पाऊल उचलले. या घटनेचा पुढील तपास काळेपडळ पोलीस करत आहेत.
Source link
सून नाही तर पैशांची खाण हवी होती?:पुण्यात महिला IT इंजिनिअरची थरारक आत्महत्या; लग्नात 10 तोळे सोने दिले, 45 लाखांचा खर्च केला, पण चारचाकीसाठी छळ
