मुंबईतील राम मंदिर पूर्व परिसरात सार्वजनिक शौचालयात विषारी वायूच्या संपर्कात आल्याने दोन तरुणांचा दुर्दैवी मृत्यू झाल्याची धक्कादायक घटना समोर आली आहे. या घटनेची गंभीर दखल घेत राष्ट्रीय मानवाधिकार आयोगाने (NHRC) बृहन्मुंबई महानगरपालिका (BMC), महाराष्
.
घटना काय आहे?
मिळालेल्या माहितीनुसार, २७ सप्टेंबर २०२६ रोजी राम मंदिर पूर्व येथील मृणालताई गोरे पुलाजवळ, पारशी पंचायत गेटसमोरील एका सार्वजनिक शौचालयात ही दुर्घटना घडली. प्रभाकर धानीवार (वय २४ वर्षे) आणि भाविन देसाई (वय १८ वर्षे) हे दोन तरुण शौचालयात गेले असता तेथील विषारी वायू श्वासोच्छवासाद्वारे शरीरात गेल्याने त्यांचा मृत्यू झाला.
स्थानिक नागरिकांच्या माहितीनुसार, परिसरात मोठ्या प्रमाणात तीव्र रासायनिक दुर्गंधी पसरली होती. या शौचालयाजवळ धोकादायक रासायनिक कचरा (Hazardous waste) बेकायदेशीरपणे टाकण्यात आल्याचा संशय व्यक्त केला जात असून, यामुळेच विषारी वायू तयार झाला असावा असा प्राथमिक अंदाज आहे.
मानवाधिकार आयोगाची कडक कारवाई
याप्रकरणी भोपाळ येथील डॉ. दिव्यांश द्विवेदी यांनी मानवाधिकार आयोगाकडे तक्रार दाखल केली होती. या तक्रारीवर ७ ऑक्टोबर २०२६ रोजी मानवाधिकार आयोगाचे सन्माननीय सदस्य श्री प्रियंक कानूनगो यांच्या अध्यक्षतेखालील पीठाने सुनावणी घेत घटनेची दखल घेतली.
आयोगाने स्पष्ट केले आहे की, सार्वजनिक सुरक्षेतील निष्काळजीपणा आणि प्रशासकीय त्रुटींमुळे नागरिकांच्या मानवाधिकारांचे उल्लंघन झाले आहे.
दोन आठवड्यांत अहवाल देण्याचे आदेश
मानवाधिकार आयोगाने ‘मानवाधिकार संरक्षण कायदा, १९९३’ च्या कलम १२ अंतर्गत खालील अधिकाऱ्यांना नोटीस जारी केली आहे:
१. महानगरपालिका आयुक्त (BMC)
२. पोलीस आयुक्त, मुंबई
३. सदस्य सचिव, महाराष्ट्र प्रदूषण नियंत्रण मंडळ (MPCB)
या सर्व संस्थांना या प्रकरणाची सखोल चौकशी करून पुढील दोन आठवड्यांच्या आत सविस्तर अहवाल सादर करण्याचे निर्देश देण्यात आले आहेत. या घटनेत मृत्युमुखी पडलेल्या तरुणांच्या मृत्यूचे अचूक कारण, विषारी रसायनाचा शोध, प्रशासकीय अधिकाऱ्यांचा निष्काळजीपणा आणि जबाबदार घटकांवर कडक कारवाई करण्याची मागणी केली जात आहे.
