गोकुळ निवडणुकीत महायुतीचा एकतर्फी विजय होईल:90 टक्के ठराव आमच्याकडे, महाडिकांचा सतेज पाटलांना टोला

गोकुळ दूध संघाच्या आगामी निवडणुकीच्या पार्श्वभूमीवर कोल्हापुरातील राजकीय वातावरण चांगलेच तापले आहे. महायुतीतील चारही घटक पक्ष एकत्रितपणे निवडणूक लढवणार असून, गोकुळमधील तब्बल 90 टक्के ठराव महायुतीकडे असल्याचा दावा भाजपचे खासदार धनंजय महाडिक यांनी केला आहे. त्यामुळे आगामी निवडणुकीत महायुतीचा एकतर्फी विजय होईल, असा विश्वास त्यांनी व्यक्त केला. गोकुळ निवडणुकीच्या तयारीसाठी महायुतीच्या नेत्यांची मुंबईत महत्त्वाची बैठक होणार आहे. या बैठकीला पालकमंत्री चंद्रकांत पाटील, मंत्री हसन मुश्रीफ, आमदार प्रकाश आबिटकर यांच्यासह महायुतीतील प्रमुख नेते उपस्थित राहणार आहेत. बैठकीनंतर महायुतीच्या अधिकृत पॅनेलची घोषणा केली जाण्याची शक्यता आहे. कोल्हापुरात पत्रकारांशी बोलताना महाडिक यांनी गोकुळ निवडणुकीसह काँग्रेसचे आंदोलन आणि एमपीएससी विद्यार्थ्यांच्या प्रश्नावरही भूमिका मांडली. सतेज पाटलांच्या आरोपांकडे लक्ष देण्याची गरज नाही गोकुळ निवडणुकीत मुख्यमंत्री देवेंद्र फडणवीस यांचा हस्तक्षेप असल्याचा आरोप विरोधकांकडून केला जात आहे. यावर धनंजय महाडिक यांनी हे आरोप फेटाळून लावले. गोकुळच्या निवडणुकीत मुख्यमंत्र्यांचा कोणताही हस्तक्षेप नसल्याचे त्यांनी स्पष्ट केले. गेल्या निवडणुकीच्या वेळी राज्यात महाविकास आघाडीचे सरकार होते. त्यावेळीही गोकुळच्या पॅनेलची घोषणा मुंबईतूनच करण्यात आली होती. त्यामुळे मुंबईत बैठक घेऊन पॅनेल निश्चित करण्याची परंपरा आताची नसून मागील निवडणुकीपासूनच असल्याचे महाडिक यांनी सांगितले. महायुतीमध्ये सध्या चार प्रमुख पक्ष एकत्र आहेत. त्यामुळे राज्याचे प्रमुख म्हणून मुख्यमंत्र्यांचा सल्ला घेणे स्वाभाविक असल्याचे त्यांनी म्हटले. काँग्रेसचे नेते सतेज पाटील यांच्याकडून होणाऱ्या आरोपांवर फारसे लक्ष देण्याची गरज नसल्याचा टोला महाडिक यांनी लगावला. गोकुळच्या मागील निवडणुकीतील पराभवाच्या नैराश्यातूनच सतेज पाटील आरोप करत असल्याचा दावा त्यांनी केला. 90 टक्के ठराव महायुतीकडे असल्याचा दावा गोकुळच्या आगामी निवडणुकीत महायुतीतील सर्व घटक पक्ष एकत्रितपणे मैदानात उतरतील, असे महाडिक यांनी सांगितले. दूध उत्पादक संस्था आणि मतदारांचा मोठा पाठिंबा महायुतीला असल्याचा दावा करत त्यांनी सुमारे 90 टक्के ठराव महायुतीकडे असल्याचे म्हटले. मुंबईतील बैठकीत जागावाटप आणि पॅनेलमधील उमेदवारांबाबत चर्चा होणार आहे. त्यानंतर महायुतीच्या अधिकृत पॅनेलची घोषणा केली जाईल. उपलब्ध राजकीय समीकरण पाहता गोकुळमध्ये महायुतीचा विजय निश्चित असल्याचा विश्वास महाडिक यांनी व्यक्त केला. मोदींच्या 25 वर्षांच्या राजकीय प्रवासानिमित्त ‘सेवाज्योत यात्रा’ पंतप्रधान नरेंद्र मोदी यांच्या राजकीय प्रवासाला 25 वर्षे पूर्ण होत असल्याच्या पार्श्वभूमीवर भाजपकडून ‘सेवाज्योत यात्रा’ आयोजित केली जाणार असल्याची माहितीही महाडिक यांनी दिली. 7 ऑक्टोबर 2001 रोजी नरेंद्र मोदी यांनी गुजरातच्या मुख्यमंत्रीपदाची शपथ घेतली होती. त्यानंतर 26 मे 2014 रोजी त्यांनी देशाच्या पंतप्रधानपदाची सूत्रे स्वीकारली. या 25 वर्षांच्या राजकीय प्रवासात मोदी सरकारने गरीब आणि सामान्य नागरिकांसाठी विविध योजना राबवल्याचा दावा महाडिक यांनी केला. सरकारच्या योजनांमुळे 25 कोटी नागरिक दारिद्र्यरेषेबाहेर आले, 12 कोटी कुटुंबांना गॅस कनेक्शन मिळाले, 4 कोटी लाभार्थ्यांना आवास योजनेतून घरे मिळाली, तर 80 कोटी नागरिकांना मोफत धान्याचा लाभ मिळत असल्याचे महाडिक यांनी सांगितले. राहुल गांधींच्या आंदोलनावरही टीका काँग्रेस नेते राहुल गांधी यांच्या नेतृत्वाखाली सुरू असलेल्या आंदोलनावरही महाडिक यांनी टीका केली. ईव्हीएम आणि निवडणूक प्रक्रियेबाबत काँग्रेसकडून सातत्याने प्रश्न उपस्थित केले जात आहेत. मात्र, या मुद्द्यांवर जनतेने काँग्रेसची भूमिका यापूर्वीच नाकारली असल्याचा दावा त्यांनी केला. काँग्रेसकडून एसआयआर म्हणजेच विशेष मतदार यादी पुनरिक्षणाच्या प्रक्रियेला विरोध केला जात आहे. मात्र, अशी प्रक्रिया यापूर्वीही अनेक वेळा झाली असून काँग्रेसच्या सत्ताकाळातही ती राबवण्यात आली होती, असे महाडिक यांनी सांगितले. काँग्रेस सत्तेत असताना ही प्रक्रिया योग्य आणि भाजप सत्तेत असताना चुकीची, अशी भूमिका घेणे योग्य नसल्याचे त्यांनी म्हटले. काँग्रेसचे आंदोलन हे जनतेमध्ये वेगळे चित्र निर्माण करण्याचा प्रयत्न असल्याचा आरोप करत महाडिक यांनी या आंदोलनाला ‘फेक नॅरेटिव्ह’ असल्याचे म्हटले. अशा प्रकारच्या आंदोलनांना जनता फारसा प्रतिसाद देणार नाही, असा दावाही त्यांनी केला. एमपीएससी विद्यार्थ्यांच्या मागण्यांवर सरकारची भूमिका काय? एमपीएससी विद्यार्थ्यांच्या आंदोलनाच्या मुद्द्यावर बोलताना महाडिक यांनी सरकार विद्यार्थ्यांच्या पाठीशी असल्याचे सांगितले. पेपरफुटीचा प्रकार समोर आला असून, या प्रकरणात काही जणांना अटकही करण्यात आली आहे. त्यामुळे विद्यार्थ्यांवर अन्याय झाल्याचे त्यांनी मान्य केले. विद्यार्थ्यांनी केलेल्या 12 मागण्यांपैकी बहुतांश मागण्या सरकारने आधीच मान्य केल्या असल्याचे महाडिक यांनी सांगितले. तसेच संपूर्ण प्रकरणाची चौकशी करण्यासाठी मुख्यमंत्र्यांनी उच्चस्तरीय समिती स्थापन केली आहे. या समितीचा अहवाल आल्यानंतर दोषी आढळणाऱ्या व्यक्तींवर निलंबनासह कठोर कारवाई केली जाईल, असे त्यांनी स्पष्ट केले. राज्य सरकार विद्यार्थ्यांच्या बाजूने असून त्यांच्या आंदोलनाला आवश्यक ते सहकार्य केले जात असल्याचेही महाडिक यांनी सांगितले. एकूणच, गोकुळ निवडणुकीच्या पार्श्वभूमीवर महायुतीने आपली ताकद दाखवण्याची तयारी सुरू केली असून, सतेज पाटील यांच्या नेतृत्वाखालील विरोधकांच्या आरोपांना महाडिक यांनी प्रत्युत्तर दिले आहे. आता मुंबईतील बैठकीनंतर महायुतीचे अधिकृत पॅनेल जाहीर झाल्यानंतर गोकुळमधील निवडणुकीचे चित्र अधिक स्पष्ट होणार आहे. हेही वाचा… MPSC आंदोलनाचा सातवा दिवस:महाज्योतीच्या गोंधळामुळे रोहित पवारांचा संताप, म्हणाले- आता एमपीएससी अध्यक्षांसह मंत्री अतुल सावेंचाही राजीनामा घ्या पुण्यातील आंबेगाव बुद्रुक येथील परीक्षा केंद्रावर महाज्योतीच्या स्कॉलरशिप परीक्षेदरम्यान मोठा गोंधळ झाल्याचे समोर आले आहे. परीक्षा केंद्रावर संगणक उपलब्ध नसल्याने विद्यार्थिनींना परीक्षा देता आली नसल्याचा दावा करण्यात आला. सकाळी ९ ते ११ अशी परीक्षेची वेळ असतानाही सुमारे दोन तास विद्यार्थिनी परीक्षा केंद्राबाहेर थांबल्या होत्या. अखेर परीक्षा रद्द करण्यात आल्याने विद्यार्थिनींमध्ये संतापाचे वातावरण निर्माण झाले. सविस्तर वाचा….



Source link