मुंबईत वरिष्ठ पोलीस निरीक्षकाचा गाडीतच मृत्यू:पिंपरीत ड्रग्ज तस्कराचा पाठलाग करताना हवालदाराला हार्ट अटॅक; दोन पोलिसांचा कर्तव्यावर असताना मृत्यू

मुंबई आणि पिंपरी-चिंचवडमध्ये कर्तव्य बजावत असताना दोन पोलीस अधिकाऱ्यांचा हृदयविकाराच्या तीव्र झटक्याने मृत्यू झाल्याच्या घटनांनी पोलीस दलात शोककळा पसरली आहे. मुंबईतील कुरार पोलीस ठाण्याचे वरिष्ठ पोलीस निरीक्षक सुशील कुमार गायकवाड यांचा कामावर येत असताना गाडीतच मृत्यू झाला. दुसरीकडे, पिंपरी-चिंचवडमध्ये अमली पदार्थांची विक्री करणाऱ्या संशयितांचा पाठलाग करताना 38 वर्षीय पोलीस हवालदार जावेद बागसिराज यांची प्राणज्योत मालवली. अवघ्या काही दिवसांच्या अंतराने घडलेल्या या घटनांमुळे पोलिसांच्या कामाचा ताण, ड्युटीचे स्वरूप आणि आरोग्याच्या प्रश्नांबाबत पुन्हा चर्चा सुरू झाली आहे. मुंबईत वरिष्ठ पोलीस निरीक्षकाची गाडीतच प्राणज्योत मालवली मुंबईतील कुरार पोलीस ठाण्याचे वरिष्ठ पोलीस निरीक्षक सुशील कुमार गायकवाड यांचे कर्तव्यावर येत असताना निधन झाले. ते नवी मुंबईतील उलवे परिसरात वास्तव्यास होते. नेहमीप्रमाणे घरातून पोलीस ठाण्याकडे येत असताना प्रवासादरम्यान त्यांना अस्वस्थ वाटू लागले. त्यानंतर त्यांनी सोबत असलेल्या चालक आणि ऑपरेटरला प्रकृती ठीक नसल्याचे सांगितले. ‘मला बरं वाटत नाही, गाडीतच थोडा आराम करतो. मला उशी द्या,’ असे त्यांनी सहकाऱ्यांना सांगितले. त्यानंतर ते गाडीतच झोपले. मात्र, पोलीस ठाण्यात पोहोचल्यानंतरही ते उठले नाहीत. चालकाने त्यांना आवाज दिला आणि हाताने हलवून उठवण्याचा प्रयत्न केला. तरीही त्यांच्याकडून कोणताही प्रतिसाद मिळाला नाही. त्यांची प्रकृती गंभीर असल्याचे लक्षात येताच चालक आणि ऑपरेटरने तातडीने त्यांना मालाडमधील पठाणवाडी परिसरातील डीएनए रुग्णालयात दाखल केले. मात्र, डॉक्टरांनी त्यांना मृत घोषित केले. गायकवाड यांचा मृत्यू हृदयविकाराच्या तीव्र झटक्याने झाल्याची माहिती समोर आली आहे. त्यांच्या अचानक निधनामुळे मुंबई पोलीस दलात हळहळ व्यक्त केली जात आहे. डीसीपींच्या वाढदिवसाच्या कार्यक्रमानंतर घरी गेले होते मिळालेल्या माहितीनुसार, सुशील कुमार गायकवाड यांनी आदल्या दिवशी संध्याकाळी पोलीस उपायुक्त गजानन राजमाने यांच्या वाढदिवसाच्या कार्यक्रमाला हजेरी लावली होती. त्यानंतर ते उलवे येथील घरी गेले. दुसऱ्या दिवशी सकाळी कर्तव्यावर येताना त्यांची प्रकृती बिघडली आणि पोलीस ठाण्यात पोहोचण्यापूर्वीच त्यांचा मृत्यू झाला. गायकवाड यांना अवघ्या सात महिन्यांपूर्वी पोलीस निरीक्षक पदावरून वरिष्ठ पोलीस निरीक्षकपदी पदोन्नती मिळाली होती. त्याचप्रमाणे या महिन्याच्या सुरुवातीला वरिष्ठ पोलीस निरीक्षक शिवाजी जाधव यांचाही मृत्यू झाल्याची माहिती समोर आली आहे. त्यामुळे अल्पावधीत दोन वरिष्ठ अधिकाऱ्यांच्या निधनामुळे पोलीस दलातील कर्मचाऱ्यांच्या आरोग्याचा आणि कामाच्या स्वरूपाचा मुद्दा चर्चेत आला आहे. वरिष्ठांचा दबाव आणि कामाच्या ताणाची चर्चा पोलीस दलात कायदा व सुव्यवस्था राखण्याबरोबरच अनेक प्रशासकीय आणि क्षेत्रीय जबाबदाऱ्या पार पाडाव्या लागतात. हद्दीतील फेरीवाले, अतिक्रमणे, एसआरए, एमएमआरडीए, वन विभागाशी संबंधित विषय आणि इतर कामांचा पाठपुरावा करावा लागतो. या जबाबदाऱ्यांमुळे काही पोलीस अधिकाऱ्यांवर अतिरिक्त ताण येत असल्याची चर्चा पोलीस वर्तुळात सुरू आहे. वरिष्ठ अधिकाऱ्यांकडून विविध कामांचा सातत्याने आढावा घेतला जात असल्याने काही अधिकारी तणावाखाली काम करत असल्याची नाराजीही व्यक्त होत आहे. मात्र, गायकवाड यांच्या मृत्यूमागे कामाचा ताण किंवा वरिष्ठांचा दबाव हेच कारण असल्याचे अधिकृतपणे सिद्ध झालेले नाही. त्यांच्या मृत्यूचे नेमके वैद्यकीय कारण आणि त्यासंबंधीची अधिकृत माहिती महत्त्वाची ठरणार आहे. पिंपरी-चिंचवडमध्ये ड्रग्ज तस्कराचा पाठलाग करताना हवालदाराचा मृत्यू मुंबईतील घटनेनंतर पिंपरी-चिंचवडमधील पोलीस हवालदार जावेद बागसिराज यांच्या निधनाची घटनाही चर्चेत आली आहे. अमली पदार्थांची विक्री रोखण्यासाठी कारवाई करत असताना त्यांना हृदयविकाराचा तीव्र झटका आला. 38 वर्षीय जावेद बागसिराज हे गुन्हे शाखेच्या अमली पदार्थविरोधी पथकात कार्यरत होते. रविवारी, 25 ऑक्टोबरच्या रात्री संत तुकारामनगर परिसरात ही घटना घडली. या भागात दोन संशयित एमडी (मेफेड्रॉन) या अमली पदार्थाच्या विक्रीसाठी येणार असल्याची माहिती पोलिसांना मिळाली होती. त्यानुसार बागसिराज यांनी वरिष्ठ अधिकाऱ्यांना माहिती दिली. त्यानंतर अमली पदार्थविरोधी पथकाने संबंधित परिसरात सापळा रचला. एका संशयिताला पकडले; दुसरा पळून जाताना पाठलाग पोलिसांनी सापळा रचलेल्या ठिकाणी संशयित आल्यानंतर पथकाने कारवाई केली. यावेळी एका संशयिताला पकडण्यात पोलिसांना यश आले. मात्र, त्याच्यासोबत असलेला दुसरा संशयित पोलिसांच्या तावडीतून सुटून पळू लागला. त्याला पकडण्यासाठी जावेद बागसिराज यांनी पाठलाग सुरू केला. कर्तव्य बजावत असताना धावत असतानाच त्यांना अचानक छातीत तीव्र वेदना जाणवू लागल्या. काही क्षणांतच ते जमिनीवर कोसळले. हा प्रकार लक्षात येताच त्यांच्या सहकाऱ्यांनी तातडीने मदत केली आणि त्यांना पिंपरीतील यशवंतराव चव्हाण स्मृती रुग्णालयात दाखल केले. रुग्णालयात त्यांच्यावर उपचार सुरू करण्यात आले. मात्र, उपचारादरम्यान त्यांना हृदयविकाराचा दुसरा तीव्र झटका आला. डॉक्टरांच्या प्रयत्नांनंतरही त्यांना वाचवता आले नाही. कर्तव्य बजावताना झालेल्या या अकाली मृत्यूमुळे पिंपरी-चिंचवड पोलीस दलावर शोककळा पसरली आहे. 2010 मध्ये पोलीस दलात भरती; अमली पदार्थविरोधी पथकात काम जावेद बागसिराज यांचे कुटुंब मूळचे कर्नाटकातील होते. त्यांच्या वडिलांनी पुण्यात स्थलांतर केल्यानंतर जावेद यांचा जन्म पुण्यात झाला. 2010 मध्ये ते पुणे शहर पोलीस दलात भरती झाले. सुरुवातीची सुमारे आठ वर्षे त्यांनी हडपसर आणि मुंढवा पोलीस ठाण्यांमध्ये सेवा बजावली. 2018 मध्ये पिंपरी-चिंचवड पोलीस आयुक्तालय स्वतंत्रपणे स्थापन झाल्यानंतर ते या पोलीस दलात रुजू झाले. पिंपरी पोलीस ठाण्यात सेवा बजावल्यानंतर त्यांची गुन्हे शाखेत नियुक्ती झाली. त्यानंतर ते अमली पदार्थविरोधी पथकात कार्यरत होते. अमली पदार्थांची विक्री आणि तस्करी रोखण्यासाठी सुरू असलेल्या कारवायांमध्ये ते सक्रियपणे सहभागी होत होते. दोन लहान मुलांसह कुटुंबीयांवर दुःखाचा डोंगर जावेद बागसिराज यांच्या पश्चात आई-वडील, भाऊ, पत्नी, 12 वर्षांची मुलगी आणि 7 वर्षांचा मुलगा असा परिवार आहे. कुटुंबाचा आधार असलेल्या जावेद यांच्या अचानक निधनामुळे त्यांच्या कुटुंबावर दुःखाचा डोंगर कोसळला आहे. सोमवारी, 26 ऑक्टोबर रोजी पुण्यातील कसबा पेठ येथील कब्रस्तानात त्यांचा शासकीय इतमामात दफनविधी करण्यात आला. पोलिसांच्या आरोग्याचा प्रश्न पुन्हा ऐरणीवर मुंबईतील वरिष्ठ पोलीस निरीक्षक सुशील कुमार गायकवाड आणि पिंपरी-चिंचवडमधील हवालदार जावेद बागसिराज यांच्या मृत्यूच्या घटनांनी पोलीस कर्मचाऱ्यांच्या आरोग्याचा प्रश्न पुन्हा ऐरणीवर आणला आहे. पोलिसांना अनेकदा अनियमित वेळेत काम करावे लागते. कायदा व सुव्यवस्था राखणे, गुन्ह्यांचा तपास, आरोपींचा शोध, अचानक उद्भवणाऱ्या परिस्थितीला सामोरे जाणे आणि वरिष्ठांकडून सोपवण्यात येणाऱ्या जबाबदाऱ्या पार पाडणे, अशा अनेक आघाड्यांवर त्यांना काम करावे लागते. या पार्श्वभूमीवर पोलिसांना पुरेशी विश्रांती, नियमित आरोग्य तपासणी, तणाव व्यवस्थापन आणि आवश्यक वैद्यकीय सुविधा मिळण्याची गरज अधोरेखित होत आहे. मात्र, या दोन्ही मृत्यूंचे कारण कामाचा ताणच असल्याचा निष्कर्ष काढता येत नाही. वैद्यकीय तपासणी आणि अधिकृत माहितीच्या आधारेच मृत्यूचे नेमके कारण स्पष्ट होऊ शकते. कर्तव्य बजावत असताना दोन पोलीस कर्मचाऱ्यांचा झालेला मृत्यू हा त्यांच्या कुटुंबीयांसाठी मोठा आघात आहे. त्याचवेळी, पोलीस दलातील कामाच्या परिस्थितीचा आणि कर्मचाऱ्यांच्या आरोग्याचा गांभीर्याने विचार करण्याची गरज या घटनांमुळे पुन्हा अधोरेखित झाली आहे. हेही वाचा… मंत्रिमंडळाचे 12 मोठे निर्णय:दुष्काळग्रस्त दीड कोटी शेतकऱ्यांना दिवाळीपूर्वी 5 हजार अग्रीम, दिव्यांगांसाठी 1 टक्का निधी, ई-व्हेईकलसाठी अनुदान राज्य मंत्रिमंडळाच्या मंगळवारी (२७ ऑक्टोबर) झालेल्या बैठकीत शेतकरी, दिव्यांग व्यक्ती, जलसंपदा विभाग, औद्योगिक विकास आणि हवाई वाहतूक यांसह विविध क्षेत्रांशी संबंधित महत्त्वाचे निर्णय घेण्यात आले. राज्यातील ३०४ दुष्काळग्रस्त तालुक्यांतील शेतकऱ्यांना दिवाळीपूर्वी प्रत्येकी ५ हजार रुपयांचे अग्रीम देण्यास मंजुरी देण्यात आली आहे. सविस्तर वाचा…



Source link