राजकीय विरोधकांवर टीका करताना मुद्द्यांपेक्षा वैयक्तिक आरोप आणि आक्षेपार्ह शब्दांचा वापर वाढत असल्याचे चित्र सोलापूरच्या राजकारणात पाहायला मिळत आहे. काँग्रेसच्या खासदार प्रणिती शिंदे आणि भाजपचे आमदार देवेंद्र कोठे यांच्यात सुरू झालेल्या शाब्दिक संघर्षाने आता वेगळेच वळण घेतले आहे. ‘लबाड लांडगा’, ‘महागाढव’ ते थेट ‘कुत्रा’ अशा शब्दांचा वापर करत दोन्ही पक्षांच्या नेत्यांनी एकमेकांवर निशाणा साधला आहे. या वक्तव्यांमुळे सोलापुरातील राजकीय वातावरण चांगलेच तापले असून, काँग्रेस कार्यकर्त्यांनी आमदार देवेंद्र कोठे यांच्या विरोधात आंदोलन करत संताप व्यक्त केला. सोलापुरातील भाजप आणि काँग्रेसमधील संघर्ष केवळ राजकीय आरोप-प्रत्यारोपांपुरता मर्यादित राहिलेला नाही. नेत्यांकडून एकमेकांना दिल्या जाणाऱ्या उपमा आणि वापरल्या जाणाऱ्या भाषेमुळे हा वाद आता वैयक्तिक पातळीवर पोहोचला आहे. खासदार प्रणिती शिंदे यांनी भाजपच्या भूमिकेवर टीका करताना ‘लबाड लांडगा’ असा उल्लेख केला होता. त्यांच्या या टीकेला प्रत्युत्तर देताना आमदार देवेंद्र कोठे यांनी शिंदे यांच्यासाठी ‘महागाढव’ हा शब्द वापरला. या वक्तव्यामुळे काँग्रेसमध्ये नाराजी पसरली आणि कार्यकर्त्यांनी रस्त्यावर उतरून निषेध नोंदवला. प्रणिती शिंदेंच्या टीकेने वादाची ठिणगी सोलापुरात भाजपकडून काढण्यात येणाऱ्या मोर्चाच्या पार्श्वभूमीवर खासदार प्रणिती शिंदे यांनी सत्ताधारी भाजपवर जोरदार टीका केली होती. भाजपकडून लोकशाही आणि संविधानाच्या रक्षणाबाबत केल्या जाणाऱ्या दाव्यांवर प्रश्न उपस्थित करत त्यांनी भाजपच्या भूमिकेवर निशाणा साधला. ‘लबाड लांडगा ढोंग करतोय, लोकशाही वाचवण्याचं सोंग करतोय,’ अशा शब्दांत त्यांनी भाजप नेत्यांवर टीका केली होती. विशेषतः मंत्री जयकुमार गोरे यांच्यावरही त्यांनी निशाणा साधला होता. भाजप एकीकडे रामराज्याचे स्वप्न दाखवत असताना दुसरीकडे स्वतःचे सरकार वाचवण्यासाठी मोर्चे काढण्याची वेळ आल्याची टीका त्यांनी केली होती. राज्यात अराजकता नसल्याचा दावा करणाऱ्यांनी मोर्चा काढणे हास्यास्पद असल्याचेही त्या म्हणाल्या होत्या. या वक्तव्यामुळे भाजपच्या स्थानिक नेत्यांमध्ये नाराजी निर्माण झाली होती. उजनी धरणातील पाण्यावरूनही भाजपला घेरले दरम्यान, उजनी धरण परिसरात प्रस्तावित डेटा सेंटरचा मुद्दाही प्रणिती शिंदे यांनी उपस्थित केला होता. या प्रकल्पामुळे परिसरातील शेतकऱ्यांच्या जमिनी जाण्याची आणि शेतमजुरांच्या रोजगारावर परिणाम होण्याची भीती त्यांनी व्यक्त केली. डेटा सेंटरच्या माध्यमातून रोजगारनिर्मितीचे आश्वासन दिले जात असले, तरी प्रत्यक्षात शेतकरी आणि स्थानिक नागरिकांची फसवणूक होण्याची शक्यता असल्याचा आरोप त्यांनी केला. डेटा सेंटरसाठी मोठ्या प्रमाणात पाणी वळविण्यात आल्यास शेतीच्या पाण्याचा प्रश्न गंभीर होऊ शकतो. शेतकऱ्यांना महिन्यातून एकदाच पाणी मिळण्याची परिस्थिती निर्माण होऊ शकते, असा दावाही त्यांनी केला. त्यामुळे विकासाच्या नावाखाली शेतकऱ्यांच्या हिताकडे दुर्लक्ष केले जात असल्याचा आरोप करत त्यांनी भाजपला लक्ष्य केले. या मुद्द्यामुळे सोलापुरातील राजकारणात आधीच वातावरण तापले होते. देवेंद्र कोठेंचे प्रत्युत्तर; प्रणिती शिंदेंना ‘महागाढव’ म्हटले प्रणिती शिंदे यांच्या टीकेनंतर भाजप आमदार देवेंद्र कोठे यांनीही आक्रमक भूमिका घेतली. त्यांनी खासदार प्रणिती शिंदे यांच्यावर टीका करताना ‘महागाढव’ अशी उपमा दिली. लोकप्रतिनिधींनी राजकीय मतभेद व्यक्त करताना कोणती भाषा वापरावी, यावरून या वक्तव्याची चर्चा सुरू झाली. कोठे यांच्या या विधानामुळे काँग्रेस कार्यकर्ते आक्रमक झाले. सोलापुरात काँग्रेस कार्यकर्त्यांनी एकत्र येत देवेंद्र कोठे यांच्या विरोधात निदर्शने केली. यावेळी जोरदार घोषणाबाजी करण्यात आली. कोठे यांच्या वक्तव्याचा निषेध करत कार्यकर्त्यांनी त्यांच्यावरही आक्षेपार्ह शब्दांत टीका केली. त्यामुळे दोन्ही पक्षांमधील संघर्ष आणखी वाढला. चेतन नरोटेंकडून ‘कुत्रा’ असा उल्लेख; कोठेंचेही प्रत्युत्तर या आंदोलनादरम्यान काँग्रेसचे शहराध्यक्ष चेतन नरोटे यांनी देवेंद्र कोठे यांच्यावर निशाणा साधला. त्यांनी कोठे यांचा उल्लेख थेट ‘कुत्रा’ असा केल्याने वादात आणखी भर पडली. नरोटे यांच्या या वक्तव्यामुळे भाजप आमदार देवेंद्र कोठे संतप्त झाले. त्यांनीही नरोटे यांना लक्ष्य करत ‘हरामखोर’, ‘नालायक’ आणि ‘नीच’ अशा शब्दांत प्रत्युत्तर दिले. इतकेच नाही, तर ‘पांढऱ्या पायाचा असल्याने तुझ्यामुळेच सोलापुरात काँग्रेस पक्ष संपला,’ अशी बोचरी टीकाही कोठे यांनी केली. त्यामुळे काँग्रेस आणि भाजपमधील हा वाद आता केवळ दोन नेत्यांमधील राहिलेला नसून, दोन्ही पक्षांच्या कार्यकर्त्यांमध्येही त्याचे पडसाद उमटताना दिसत आहेत. विधानसभा निवडणुकीपासून संघर्ष अधिक तीव्र 2024 च्या महाराष्ट्र विधानसभा निवडणुकीत सोलापूर शहर मध्य मतदारसंघात भाजपचे देवेंद्र कोठे यांनी विजय मिळवला होता. या निवडणुकीत काँग्रेसला मोठा धक्का बसला. त्यानंतर सोलापूरच्या स्थानिक राजकारणात प्रणिती शिंदे आणि देवेंद्र कोठे यांच्यातील राजकीय संघर्ष अधिक ठळकपणे समोर येऊ लागला. एकीकडे प्रणिती शिंदे या काँग्रेसच्या खासदार म्हणून भाजपच्या धोरणांवर आणि स्थानिक कारभारावर टीका करत आहेत, तर दुसरीकडे आमदार देवेंद्र कोठे हेही त्यांच्या टीकेला आक्रमकपणे प्रत्युत्तर देत आहेत. त्यामुळे सोलापुरातील राजकीय संघर्ष सातत्याने चर्चेत आहे. विकासाच्या मुद्द्यांऐवजी वैयक्तिक टीकेची चर्चा सोलापुरात सध्या उजनी धरणातील पाणी, प्रस्तावित डेटा सेंटर, शेतकऱ्यांचे प्रश्न, रोजगार आणि स्थानिक विकास असे अनेक महत्त्वाचे विषय चर्चेत आहेत. मात्र, या मुद्द्यांवर होणाऱ्या राजकीय चर्चेपेक्षा नेत्यांच्या एकमेकांवरील वैयक्तिक टीकेचीच अधिक चर्चा होताना दिसत आहे. ‘लबाड लांडगा’, ‘महागाढव’ आणि ‘कुत्रा’ अशा शब्दांमुळे सोलापूरच्या राजकारणातील वातावरण चांगलेच तापले आहे. आता या शाब्दिक युद्धाला पूर्णविराम मिळणार की भाजप आणि काँग्रेसमधील आरोप-प्रत्यारोपांची धार आणखी वाढणार, याकडे सोलापूरकरांचे लक्ष लागले आहे. हेही वाचा…. मुश्रीफांचा नवा फॉर्म्युला शेतकऱ्यांना अमान्य:ऊसदराची बैठक फिस्कटली, राजू शेट्टी 4,200 रुपयांवर तोडग्यास तयार ऊसदराच्या प्रश्नावरून कोल्हापूर जिल्ह्यात सुरू असलेल्या शेतकरी आंदोलनाचा तिढा अद्याप सुटलेला नाही. उसाला प्रतिटन 4,500 रुपये दर मिळावा, या मागणीसाठी स्वाभिमानी शेतकरी संघटनेचे संस्थापक राजू शेट्टी यांच्या नेतृत्वाखाली सुरू असलेले आंदोलन तिसऱ्या दिवशीही कायम आहे. आंदोलनाची तीव्रता वाढत असतानाच ऊसदरावर तोडगा काढण्यासाठी कोल्हापूर जिल्हाधिकारी कार्यालयात मंत्री हसन मुश्रीफ यांच्या उपस्थितीत बैठक घेण्यात आली. मात्र, या बैठकीत कोणताही अंतिम निर्णय होऊ शकला नाही. कारखानदारांनी दिलेला प्रस्ताव आणि शेतकरी संघटनेची भूमिका यामध्ये एकमत न झाल्याने चर्चा निष्फळ ठरली. सविस्तर वाचा….
Source link
‘लबाड लांडगा’ ते ‘महागाढव’, ‘कुत्रा’:प्राण्यांच्या उपमा देत सोलापुरात राजकीय नेत्यांची एकमेकांवर टीका, भाजप-काँग्रेसमधील वाद चिघळला
