बारामती तालुक्यात पुन्हा एकदा विमान दुर्घटनेची घटना घडल्याने परिसरात खळबळ उडाली आहे. गोजुबावी गावाच्या हद्दीत रेडबर्ड कंपनीचे एक शिकाऊ विमान कोसळल्याची माहिती समोर आली आहे. ही घटना सुमारे अर्ध्या तासापूर्वी घडली असून अपघाताची माहिती मिळताच स्थानिक नागरिकांनी घटनास्थळी धाव घेतली. अचानक झालेल्या या दुर्घटनेमुळे परिसरात काही काळ भीतीचे वातावरण निर्माण झाले होते. मिळालेल्या प्राथमिक माहितीनुसार, हे विमान प्रशिक्षणासाठी वापरले जात होते. उड्डाणादरम्यान अचानक तांत्रिक बिघाड झाल्याचा अंदाज व्यक्त केला जात असून त्यानंतर विमान नियंत्रणाबाहेर जाऊन खाली कोसळले. दुर्घटनेनंतर परिसरात मोठा आवाज झाल्याने नागरिक घाबरून बाहेर आले. घटनेची माहिती मिळताच पोलिस आणि संबंधित यंत्रणांनी घटनास्थळी धाव घेत परिस्थितीचा आढावा घेण्यास सुरुवात केली आहे. दरम्यान, या अपघातात वैमानिक सुरक्षित असल्याची प्राथमिक माहिती समोर आली आहे. दुर्घटनेनंतर तातडीने बचावकार्य सुरू करण्यात आले असून वैमानिकाला कोणतीही गंभीर दुखापत झालेली नसल्याचे सांगितले जात आहे. मात्र विमान कोसळण्यामागचे नेमके कारण अद्याप स्पष्ट झालेले नाही. या घटनेमुळे बारामती परिसरात पुन्हा एकदा विमान सुरक्षेचा मुद्दा चर्चेत आला असून संबंधित यंत्रणांकडून सखोल चौकशी केली जाणार असल्याची माहिती मिळत आहे. आम्ही हे सातत्याने अपडेट करत आहोत…
Source link
बारामतीत पुन्हा विमान दुर्घटना:रेडबर्डचं ट्रेनिंग एअरक्राफ्ट कोसळल्याने परिसरात भीतीचं वातावरण
