TMC rebels’ letter out, names of 19 MPs in it, rebel MPs will meet Lok Sabha Speaker

पश्चिम बंगाल विधानसभा निवडणुकीत पराभवानंतर टीएमसीमधील फूट शुक्रवारी उघडपणे समोर आली. शुक्रवारी समोर आलेल्या पत्रात पक्षाच्या १९ खासदारांनी सभागृहात स्वतंत्र बसण्याची व्यवस्था मागितली होती. पत्र १८ मे रोजी लिहिले गेले होते, म्हणजेच बंगालच्या निकालानंतर १४ दिवसांनी. पत्रामध्ये शताब्दी रॉय, सायोनी घोष, युसूफ पठाण, रचना बॅनर्जी, जून मालिया व पार्थ भौमिक यांच्या नावांचा समावेश आहे.

बंडखोर खासदार जगदीश वर्मा बसुनिया यांनी टीएमसी नेतृत्वावर हल्लाबोल केला. ते म्हणाले, पक्षामध्ये ना बोलण्यास जागा आहे, ना ऐकण्यास. पक्षप्रमुख ममता बॅनर्जी आणि खासदार अभिषेक बॅनर्जी स्थानिक नेते आणि संघटनेचे मत घेत नाहीत. बसुनिया यांनी आरोप केला की निवडणुकीत उमेदवारांचा निर्णय कन्सल्टन्सी फर्मनुसार घेतला.

स्वाक्षरी प्रकरण : सीआयडीचे अभिषेकना पुन्हा समन्स

बनावट दस्तऐवज प्रकरणातील चौकशीवर असमाधानी असलेल्या केंद्रीय गुप्तचर संस्थेने (सीआयडी) टीएमसी नेते अभिषेक बॅनर्जी यांना १४ जून रोजी पुन्हा हजर राहण्यासाठी समन्स बजावले आहे.

वाद संपला, अभिषेक-ममता नकली गट: भाजप

भाजपने म्हटले की दस्तऐवज सिद्ध करतो की काकोली घोष दस्तीदार यांच्या नेतृत्वाखालील गटच खरा टीएमसी आहे. भाजप प्रवक्ते शहजाद पूनावाला म्हणाले की ममता-अभिषेक बनावट टीएमसीचे प्रतिनिधित्व करत आहेत. पूनावाला यांनी दावा केला की ६५-७० आमदार व काही राज्यसभा खासदारही याच गटासोबत आहेत.

गद्दारांनी राजीनामा देऊन भाजपकडून लढावे: मोइत्रा

टीएमसी खासदार महुआ मोइत्रा यांनी बंडखोर खासदारांवर हल्लाबोल केला आहे. त्या म्हणाल्या, सर्व १९ बंडखोर खासदार चुकीचे संविधान वाचत आहेत. ९१ व्या संविधान दुरुस्ती, २००३ नंतर स्वतंत्र गटाची तरतूद संपली आहे. सर्व १९ गद्दारांनी राजीनामा देऊन भाजपकडून निवडणूक लढली पाहिजे.