अमरावती जिल्ह्यातील अचलपूर-परतवाडा परिसरात उघडकीस आलेल्या लैंगिक शोषण प्रकरणाने राज्यात खळबळ उडवली आहे. या प्रकरणात आतापर्यंत समोर आलेल्या आठ व्हिडिओंमधील सर्व पीडित तरुणी मुस्लिम समाजातील असल्याची माहिती पोलीस तपासातून समोर आली आहे. राज्य अल्पसंख्याक आयोगाचे अध्यक्ष प्यारे खान यांनी ही बाब स्पष्ट करत आरोपींवर कठोर कारवाईची मागणी केली आहे. नागपुरात माध्यमांशी बोलताना प्यारे खान यांनी या गंभीर प्रकरणातील मुख्य आरोपी अयानचे घर पाडून त्याची संपत्ती जप्त करण्याची मागणी केली. त्याचबरोबर, या प्रकरणाला कोणताही धार्मिक रंग देऊ नये, असे आवाहनही त्यांनी केले. ‘हा गुन्हा मानवी संवेदनांना हादरा देणारा आहे. याकडे धर्माच्या चौकटीतून न पाहता, कायद्याच्या चौकटीतून कठोर कारवाई होणे गरजेचे आहे,’ असे ते म्हणाले. या संदर्भात अचलपूर येथून राज्य अल्पसंख्याक आयोगाकडे अधिकृत तक्रार दाखल करण्यात आली आहे. या पार्श्वभूमीवर, आयोगाची एक विशेष टीम उद्या अचलपूर आणि परतवाडा येथे भेट देऊन घटनास्थळी सखोल चौकशी करणार आहे. यामध्ये पीडित मुलींची स्थिती, तपासाची प्रगती आणि स्थानिक प्रशासनाची भूमिका यांचा आढावा घेतला जाईल. पोलिसांनी आतापर्यंत मिळालेल्या पुराव्यांच्या आधारे तपास वेगाने सुरू केला असून, आणखी व्हिडिओ किंवा पुरावे समोर येण्याची शक्यता आहे. या प्रकरणातील आरोपींना कठोर शिक्षा व्हावी, अशी मागणी सर्व स्तरातून होत आहे. स्थानिक नागरिकांमध्ये संतापाचे वातावरण असून, महिलांच्या सुरक्षेबाबत पुन्हा एकदा प्रश्नचिन्ह निर्माण झाले आहे. प्रशासनाने तातडीने ठोस पावले उचलून पीडितांना न्याय मिळवून द्यावा आणि अशा घटना पुन्हा घडू नयेत यासाठी कडक उपाययोजना कराव्यात, अशी अपेक्षा व्यक्त केली जात आहे.
Source link
अचलपूर लैंगिक शोषण:आठही पीडित मुली मुस्लिम समाजातील; अल्पसंख्याक आयोगाकडून कठोर कारवाईची मागणी
