उपमुख्यमंत्री अजित पवार यांच्या विमान अपघात दुर्घटनेच्या तपासाला आता नवे वळण मिळण्याची शक्यता निर्माण झाली आहे. आमदार रोहित पवार यांनी शुक्रवारी पुणे येथील महाराष्ट्र राज्य गुन्हे अन्वेषण विभाग (सीआयडी) कार्यालयाला भेट दिली. या भेटीदरम्यान त्यांनी या विमान अपघाताच्या अनुषंगाने काही अत्यंत महत्त्वाचे मुद्दे तपास अधिकाऱ्यांसमोर उपस्थित केले आहेत. सीआयडीने या नव्या मुद्द्यांची दखल घेतली असून, आगामी तपासामध्ये त्यांचा प्रामुख्याने अंतर्भाव केला जाईल, असे अधिकृतरीत्या स्पष्ट केले आहे. पुणे सीआयडीच्या जनसंपर्क अधिकाऱ्यांनी दिलेल्या माहितीनुसार, आमदार रोहित पवार यांनी यापूर्वी देखील या अपघातप्रकरणी वेळोवेळी काही महत्त्वाचे मुद्दे मांडले होते, ज्यांच्या अनुषंगाने पोलिसांनी योग्य प्रकारे तपास केला आहे. सध्या या संपूर्ण संवेदनशील प्रकरणाचा तपास योग्य दिशेने आणि गतीने सुरू असल्याचे सीआयडीकडून सांगण्यात आले आहे. या तपासाचा मुख्य उद्देश या अपघातामागे कोणताही फौजदारी कट-कारस्थान, निष्काळजीपणाने केलेले वर्तन, बेकायदेशीर अकृत्य किंवा थेट घातपाताचा प्रयत्न होता का, हे शोधून काढणे हा आहे. हा तपास अत्यंत तांत्रिक स्वरूपाचा असल्याने गुन्हे अन्वेषण विभाग देशातील प्रमुख विमान वाहतूक आणि न्यायवैद्यक संस्थांशी सातत्याने संपर्कात आहे. यामध्ये ‘विमान अपघात तपास विभाग’, ‘नागरी विमान वाहतूक महासंचालनालय’आणि ‘फॉरेन्सिक सायन्स लॅबोरेटरी’ यांसारख्या नामांकित संस्थांचा समावेश असून, त्यांच्याकडून आवश्यक असणाऱ्या विविध तांत्रिक अहवालांचा पाठपुरावा सीआयडीकडून वेगाने केला जात आहे. रोहित पवार यांच्या या भेटीमुळे या प्रकरणाची राजकीय वर्तुळात पुन्हा एकदा जोरदार चर्चा सुरू झाली आहे.
Source link
अजित पवारांच्या विमान अपघात प्रकरणी रोहित पवारांची CID ला भेट:महत्त्वाचे मुद्दे तपास अधिकाऱ्यांसमोर केले उपस्थित
