दर्यापूरच्या करतखेड येथील रहिवासी नागेश वावरे यांनी तहसील कार्यालयात आत्मदहनाचा प्रयत्न केला. रॉयल्टीवर वाळूची वाहतूक करत असताना तहसीलदार डॉ. रवींद्रकुमार कानडजे आणि महसूल अधिकाऱ्यांनी त्यांचा ट्रॅक्टर नदीच्या बाहेर पकडून जप्त केला. ट्रॅक्टर सोडण्यासाठी दंडाच्या नावाखाली ६० हजार रुपयांची मागणी केल्याने संतप्त झालेल्या वावरे यांनी अंगावर डिझेल ओतून हे पाऊल उचलले. यावेळी येवदा आणि दर्यापूर पोलीस स्टेशनच्या कर्मचाऱ्यांनी वेळीच सतर्कता बाळगली. त्यांच्या समयसूचकतेमुळे मोठा अनर्थ टळला. या घटनेमुळे तहसील कार्यालयाच्या परिसरात काही काळ तणावाचे वातावरण निर्माण झाले होते, जे पोलीस आणि महसूल अधिकाऱ्यांच्या हस्तक्षेपानंतर शांत झाले. वावरे यांच्या म्हणण्यानुसार, त्यांनी वाळू वाहतुकीबाबतची सर्व कागदपत्रे संबंधित अधिकाऱ्यांपुढे पुरावे म्हणून सादर केली होती. तरीही महसूल अधिकाऱ्यांनी ट्रॅक्टर सोडला नाही, त्यामुळे अखेरीस संतप्त होऊन त्यांनी हे आत्मघातकी पाऊल उचलले. करतखेड येथील सरपंचांनीही तहसीलदारांवर गंभीर आरोप केले आहेत. या संदर्भात तहसीलदार डॉ. कानडजे यांनी सांगितले की, नागेश वावरे यापूर्वीही गाढवांच्या माध्यमातून वाळूचा अवैध व्यवसाय करत होते. जेव्हा त्यांचा ट्रॅक्टर पकडला, तेव्हा तो नियमांचे उल्लंघन करत होता. त्यामुळे त्याचा ट्रॅक्टर तहसील कार्यालयात जप्त करून नियमानुसार दंड ठोठावण्यात आला. तालुक्यात महसूल प्रशासनाने वाळू घाटांचे लिलाव केले आहेत आणि वाळू उपशासाठी वेळेचे बंधन घालून दिले आहे. मात्र, काही व्यावसायिक या नियमांचे पालन करत नाहीत. त्यामुळे प्रशासनाला त्यांच्याविरुद्ध कारवाई करावी लागते, असे दिव्य मराठीच्या विश्लेषणात म्हटले आहे.
Source link
दर्यापूर तहसीलमध्ये वाळू व्यवसायिकाचा आत्मदहनाचा प्रयत्न:ट्रॅक्टर जप्त केल्याने संताप, पोलिसांमुळे अनर्थ टळला
