2027-28 च्या सिंहस्थ कुंभमेळ्यासाठी नाशिक आणि त्र्यंबकेश्वर परिसराचा भूकंपाचा अभ्यास सुरू झाला आहे. भारतीय भूवैज्ञानिक सर्वेक्षण विभागाचे (जीएसआय) पथक हा अभ्यास करत असून, अहवाल डिसेंबरअखेर सादर होणार आहे. कुंभमेळ्यात देशभरातून सुमारे 2 कोटी 25 लाख भाविक आणि साधू-महंत येण्याचा अंदाज आहे. त्यांच्या सुरक्षेसह नव्याने उभारल्या जाणाऱ्या पायाभूत सुविधांचा विचार करून राज्य शासनाच्या विनंतीवरून हा अभ्यास सुरू करण्यात आला आहे. नाशिक जिल्ह्याचा पश्चिम भाग सह्याद्रीच्या पर्वतरांगांमध्ये येतो. हा भाग भूगर्भातील हालचालींच्या दृष्टीने संवेदनशील मानला जातो. यंदा जुलै आणि ऑगस्टमध्ये जिल्ह्यात भूकंपाचे अनेक धक्के नोंदवले गेले. 8 ऑगस्टला 4.3 रिश्टर स्केलचा धक्का बसला. सप्टेंबरच्या पहिल्या आठवड्यात 1.9 ते 3.7 रिश्टर स्केल तीव्रतेचे सात धक्के जाणवले. यात जीवितहानी झाली नव्हती. कुंभमेळ्याच्या काळात धोका टाळण्यासाठी अभ्यास हाती घेतल्याचे वृत्तात म्हटले आहे. जीएसआयचे महासंचालक डॉ. दिनेश गणवीर यांनी दिलेल्या माहितीनुसार, संस्थेचे विशेष पथक नाशिकमध्ये आहे. पथकाने त्र्यंबकेश्वर परिसरात सुमारे 750 किलोमीटरच्या परिघात चार आधुनिक यंत्रे बसवली आहेत. ही यंत्रे सलग तीन महिने, 24 तास भूगर्भातील सूक्ष्म कंपनांची नोंद घेतील. विशेष संगणकीय प्रणालीच्या मदतीने या हालचालींचे विश्लेषण केले जाणार आहे. अभ्यासाच्या अहवालातून कुंभमेळ्यासाठी उभारले जाणारे रस्ते, पूल, घाट, पाणीपुरवठा आणि वीज यंत्रणा किती क्षमतेची व भूकंपरोधक असावी, याचे निकष प्रशासनाला मिळतील. नैसर्गिक आपत्तीच्या वेळी कोणते भाग अधिक सुरक्षित आहेत, याचे नियोजनही करता येईल.
Source link
नाशिक-त्र्यंबकेश्वरचा भूकंपाचा अभ्यास सुरू:कुंभमेळ्यातील 2.25 कोटी भाविकांच्या सुरक्षेसाठी जीएसआयचे पथक तैनात; अहवाल डिसेंबरअखेर
