निकमार विद्यापीठ, पुणे येथे तिसरा दीक्षान्त समारंभ उत्साहात पार पडला. या समारंभात १२ अभ्यासक्रमांतील एकूण १,३६९ विद्यार्थ्यांना पदव्या प्रदान करण्यात आल्या. उत्कृष्ट शैक्षणिक कामगिरी करणाऱ्या १२ विद्यार्थ्यांना सुवर्णपदकांनी गौरविण्यात आले. तसेच, २०२३ मध्ये प्रवेश घेतलेल्या विद्यापीठाच्या पहिल्या पीएच.डी. संशोधकाला पदवी प्रदान करण्यात आली. त्यामुळे हा समारंभ विद्यापीठाच्या शैक्षणिक वाटचालीतील महत्त्वाचा टप्पा ठरला. विद्यापीठाच्या मुख्य सभागृहात झालेल्या या समारंभाला विद्यापीठाचे अध्यक्ष डॉ. विजय गुपचुप, एल अँड टीचे वरिष्ठ उपाध्यक्ष व मुख्य मानव संसाधन अधिकारी डॉ. सी. जयकुमार, महानिदेशक डॉ. तपश कुमार गांगुली आदी उपस्थित होते. सरस्वती वंदनेने कार्यक्रमाची सुरुवात झाली. डॉ. गुपचुप यांच्या हस्ते समारंभाचे उद्घाटन करण्यात आले. कुलगुरू डॉ. अनिल अग्रवाल यांनी पदवीधर विद्यार्थ्यांचे स्वागत करून त्यांना शपथ दिली. विद्यापीठाच्या पहिल्या पीएच.डी. संशोधकाला पदवी मिळणे ही अभिमानाची बाब असल्याचे त्यांनी नमूद केले. विद्यार्थ्यांनी विद्यापीठात आत्मसात केलेले ज्ञान आणि मूल्ये व्यावसायिक जीवनात जपावीत, असे आवाहनही त्यांनी केले. डॉ. सी. जयकुमार यांनी विद्यार्थ्यांना मार्गदर्शन करताना समर्पण, प्रामाणिकपणा, नवोन्मेष आणि व्यावसायिक जबाबदारीचे महत्त्व अधोरेखित केले. वास्तविक जीवनातील आव्हानांना सामोरे जाताना ज्ञानाचा उपयोग करावा, शाश्वत शहरी विकासात योगदान द्यावे आणि राष्ट्रनिर्मितीत सक्रिय भूमिका बजावावी, असे त्यांनी सांगितले. समारंभात विविध अभ्यासक्रमांतील विद्यार्थ्यांना निमंत्रित मान्यवरांच्या हस्ते पदव्या प्रदान करण्यात आल्या. एनसीबीचे महासंचालक डॉ. एल. पी. सिंह आणि एसआरटीएम विद्यापीठ, नांदेडचे कुलगुरू डॉ. मनोहर जी. चास्कर यांनीही विद्यार्थ्यांना मार्गदर्शन केले. कुलसचिव (प्रभारी) डॉ. आदिनाथ दमाले यांनी आभार मानले.
Source link
निकमार विद्यापीठाच्या दीक्षान्त समारंभात 1,369 विद्यार्थ्यांना पदव्या:12 विद्यार्थ्यांना सुवर्णपदके; पहिल्या पीएच.डी. संशोधकाला पदवी प्रदान
