नागपूर येथील ७० वर्षीय निवृत्त बँक कर्मचारी श्रीकांत सहस्रबुद्धे यांनी २५ लाख ५१ हजार रुपये ‘आर्मी सेंट्रल वेल्फेअर फंड’साठी दान केले आहेत. त्यांनी उत्तर महाराष्ट्र आणि गुजरात सब एरियाचे जनरल ऑफिसर कमांडिंग, मेजर जनरल नवतेज एस. सोहल (सेना पदक) यांच्याकडे हा धनादेश सुपूर्द केला. या दानामागे एक भावनिक पार्श्वभूमी आहे. श्रीकांत सहस्रबुद्धे यांनी ही रक्कम स्वतःसाठी आणि त्यांच्या पत्नी अंजली सहस्रबुद्धे यांच्यासाठी बाजूला ठेवली होती. निवृत्तीनंतर पत्नीसोबत जगभ्रमंती करण्याचे या दांपत्याचे स्वप्न होते, ज्यासाठी त्यांनी आयुष्यभर बचत केली होती. मात्र, श्रीकांत यांच्या निवृत्तीच्या अवघ्या सहा महिने आधी त्यांच्या पत्नीचे निधन झाले. यामुळे जगभ्रमंतीचे त्यांचे स्वप्न अपूर्ण राहिले. श्रीकांत यांची मुले आपापल्या आयुष्यात स्थिरावलेली आहेत. पत्नीच्या निधनानंतर या पैशांचा विनियोग कसा करावा, यावर सहस्रबुद्धे कुटुंबीयांनी विचार केला. अखेर, ज्या पैशांनी स्वतःचे स्वप्न पूर्ण होणार नव्हते, त्या पैशांनी देशाचे रक्षण करणाऱ्या जवानांच्या कुटुंबांना मदत करण्याचा निर्णय त्यांनी घेतला. श्रीकांत सहस्रबुद्धे म्हणाले, “माझी मुले व्यवस्थित स्थिरावलेली आहेत. त्यामुळे आम्ही सर्वांनी मिळून हा पैसा एका पवित्र आणि सत्कार्यासाठी वापरण्याचा निर्णय घेतला. देशासाठी प्राणांची आहुती देणाऱ्या जवानांपेक्षा मोठे कार्य दुसरे काय असू शकते?” श्रीकांत सहस्रबुद्धे यांनी दान केलेला हा निधी ‘आर्मी सेंट्रल वेल्फेअर फंड’मध्ये जमा करण्यात आला आहे. देशाचे रक्षण करताना शहीद झालेल्या जवानांच्या परिवारासाठी (वीरनारी), दिव्यांग सैनिकांच्या पुनर्वसनासाठी आणि कर्तव्यावर असलेल्या जवानांच्या कल्याणासाठी या निधीचा उपयोग केला जातो.
Source link
निवृत्त बँक कर्मचाऱ्याने 25.51 लाख रुपये सैन्याला दिले:पत्नीसोबतच्या जगभ्रमंतीचे स्वप्न अपूर्ण राहिल्याने घेतला हा निर्णय
