पुणे महानगर परिवहन महामंडळाने (पीएमपीएमएल) पावसाळी पर्यटनाला चालना देण्यासाठी ‘वर्षा सहल’ विशेष पर्यटन बस सेवा सुरू केली आहे. पुणे महानगरपालिकेच्या महापौर मंजुषा नागपुरे यांच्या हस्ते स्वारगेट बसस्थानक येथे या सेवेचे उद्घाटन करण्यात आले. यावेळी पीएमपीएमएलचे संचालक अजय खेडेकर उपस्थित होते. नागरिकांना पावसाळ्यातील निसर्गसौंदर्याचा आनंद सुरक्षित आणि किफायतशीर पद्धतीने घेता यावा, या उद्देशाने ही बस सेवा सुरू करण्यात आली आहे. या सेवेद्वारे पर्यटकांना मुळशी धरण, पळसे धबधबा आणि इतर निसर्गरम्य छायाचित्रण स्थळांना भेट देण्याची संधी मिळणार आहे. प्रवाशांसाठी सुरक्षित, आरामदायी आणि नियोजनबद्ध प्रवासाची सुविधा उपलब्ध करून देण्यात आली आहे. उद्घाटनप्रसंगी बोलताना महापौर मंजुषा नागपुरे म्हणाल्या, “पीएमपीएमएलचा हा उपक्रम पुणेकर आणि पर्यटकांसाठी अत्यंत उपयुक्त आहे. या विशेष पर्यटन बस सेवेमुळे पावसाळी पर्यटनाला निश्चितच चालना मिळेल. सुरक्षित, किफायतशीर आणि नियोजनबद्ध पर्यटनाची संधी उपलब्ध करून देण्याचा हा एक चांगला उपक्रम आहे.” त्यांनी पुणे महानगरपालिकेतील सर्व महिला नगरसेविकांसाठीही या सेवेची स्वतंत्र सहल आयोजित करण्याची सूचना केली. पीएमपीएमएलचे संचालक अजय खेडेकर यांनी महामंडळाच्या पर्यटन बस सेवेचे महत्त्व सांगितले. नागरिकांनी मोठ्या संख्येने या सेवेचा लाभ घ्यावा, असे आवाहन त्यांनी यावेळी केले. या कार्यक्रमाला वाहतूक व्यवस्थापक यशवंत हिंगे, जनसंपर्क अधिकारी नागेश गायकवाड यांच्यासह पीएमपीएमएलचे अनेक अधिकारी व कर्मचारी उपस्थित होते. महामंडळाने पुणेकरांना आवाहन केले आहे की, पावसाळ्यातील निसर्गरम्य स्थळांचा सुरक्षित, आनंददायी आणि संस्मरणीय अनुभव घेण्यासाठी पीएमपीएमएलच्या ‘वर्षा सहल’ विशेष पर्यटन बस सेवेचा लाभ घ्यावा.
Source link
पीएमपीएमएलची ‘वर्षा सहल’ पर्यटन बस सेवा सुरू:महापौर मंजुषा नागपुरे यांच्या हस्ते स्वारगेट येथे उद्घाटन
