काँग्रेसने ‘संघटन सृजन’ अभियानांतर्गत पुणे शहरासाठी प्रथमच पूर्व आणि पश्चिम असे दोन शहराध्यक्ष नियुक्त केले आहेत. काँग्रेस नेते आणि माजी राज्यमंत्री डॉ. विश्वजित कदम यांनी शनिवारी सांगितले की, हे नवनियुक्त शहराध्यक्ष सर्वांना सोबत घेऊन पक्षाचे काम अधिक मजबूत करतील. पुणे शहर पूर्वच्या अध्यक्षपदी माजी महापौर प्रशांत जगताप यांची, तर पश्चिमच्या अध्यक्षपदी माजी महापौर आणि माजी आमदार दीप्ती चवधरी यांची नियुक्ती करण्यात आली आहे. डॉ. कदम यांच्या उपस्थितीत या दोघांनीही अधिकृतपणे पदभार स्वीकारला. यावेळी गटनेते ॲड. चंदू कदम, वरिष्ठ प्रवक्ते गोपाळ तिवारी यांच्यासह अनेक नगरसेवक आणि पदाधिकारी उपस्थित होते. डॉ. कदम यांनी सांगितले की, ‘संघटन सृजन’ हे देशव्यापी अभियान महाराष्ट्रातून सुरू झाले आहे. केंद्रीय निरीक्षकांनी केलेल्या सविस्तर चर्चेच्या अहवालावर आधारित या दोन्ही अनुभवी नेत्यांची निवड करण्यात आली आहे. दीप्ती चवधरी यांनी विधान परिषदेतही काम केले आहे. हे दोन्ही शहराध्यक्ष पुणे काँग्रेसला निश्चितच नवी उभारी देतील, असा विश्वास त्यांनी व्यक्त केला. शहरातील वाहतूक कोंडी, बिघडलेली कायदा-सुव्यवस्था आणि पाणीटंचाई या सत्ताधारी भाजपच्या चुकांमुळे निर्माण झालेल्या समस्यांविरोधात काँग्रेस रस्त्यावर उतरून संघर्ष करेल, असेही डॉ. कदम यांनी स्पष्ट केले. नवनियुक्त शहराध्यक्षांनी यावेळी दावा केला की, पुण्याचे पुढील महापौर आणि खासदार काँग्रेसचेच असतील. काँग्रेस भवन येथे आयोजित पत्रकार परिषदेत डॉ. कदम यांनी राज्यातील महायुती सरकारवर तीव्र टीका केली. पुणे शहर, जिल्ह्यासह संपूर्ण राज्यात गुन्हेगारीच्या घटनांमध्ये मोठी वाढ झाली असून, महिला आणि लहान मुलांवरील अत्याचार थांबलेले नाहीत, अशी चिंता त्यांनी व्यक्त केली. “राज्यात कायदा व सुव्यवस्था राखणे ही गृहमंत्रालयाची जबाबदारी असते आणि गृहमंत्रीपद मुख्यमंत्र्यांकडेच असल्याने या सर्व परिस्थितीला मुख्यमंत्रीच जबाबदार आहेत,” असा थेट आरोप त्यांनी केला. अनेक प्रकरणांमध्ये केवळ जलदगती न्यायालयांची घोषणा झाली, पण प्रत्यक्षात किती जणांना न्याय मिळाला, असा सवाल करत त्यांनी राज्य सरकार झोपले आहे की जागे, असा टोला लगावला. इंधन दरवाढ आणि युवकांचा अपमान केंद्रातील भाजप सरकारने निवडणुका संपताच पेट्रोल-डिझेलच्या दरात वाढ करून सामान्य जनतेचे कंबरडे मोडले असल्याचा आरोप डॉ. कदम यांनी केला. “आखाती देशांतील युद्धजन्य परिस्थितीमुळे इंधन दरावर परिणाम होणार याची कल्पना असूनही सरकार केवळ निवडणुकांमध्ये मग्न होते आणि मतदान संपताच अवघ्या ४८ तासांत दरवाढ करण्यात आली,” असे ते म्हणाले. याशिवाय, देशातील युवा शक्तीला ‘झुरळ’ म्हणून हिणवणे हा युवकांचा अपमान आहे, असे सांगत त्यांनी सरकारवर निशाणा साधला आणि युवक काँग्रेसच्या पाठीशी खंबीरपणे उभे असल्याचे स्पष्ट केले. ‘नीट’ पेपरफुटीबाबत केंद्रावर निशाणा वैद्यकीय प्रवेशासाठी अत्यंत महत्त्वाची असलेल्या ‘नीट’ परीक्षेच्या पेपरफुटीवर बोलताना डॉ. कदम यांनी केंद्र सरकारला धारेवर धरले. नॅशनल टेस्टिंग एजन्सीच्या एकूणच कारभारावर प्रश्नचिन्ह उपस्थित करत, या पेपरफुटीमुळे लाखो प्रामाणिक विद्यार्थ्यांचे प्रचंड नुकसान झाले असल्याचे त्यांनी सांगितले. या प्रकरणातील दोषींवर तातडीने कठोर कारवाई झाली पाहिजे आणि भविष्यात असा कोणताही गैरप्रकार होणार नाही, याची हमी सरकारने द्यावी, अशी मागणी त्यांनी केली.
Source link
पुणे काँग्रेसला पूर्व-पश्चिम असे दोन शहराध्यक्ष:डॉ. विश्वजित कदम म्हणाले – 'संघटन सृजन'मुळे पक्षाला नवी उभारी मिळेल.
