अमरावती जिल्ह्यातील मंगरुळ चव्हाळा येथील प्रश्नचिन्ह आदिवासी आश्रमशाळा आणि फासे पारधी समाजातील विद्यार्थ्यांच्या प्रश्नांसाठी मतिन भोसले यांच्या नेतृत्वात सोमवारी पालकमंत्री चंद्रशेखर बावनकुळे यांना निवेदन देण्यात आले. समृद्धी महामार्गाच्या खोदकाम आणि बांधकामामुळे आश्रमशाळेचे नुकसान झाले आहे. यावेळी समाजातील नागरिक आणि शाळेचे विद्यार्थी उपस्थित होते. पालकमंत्री बावनकुळे यांनी आंदोलनकर्त्यांशी बोलून त्यांच्या अडचणी जाणून घेतल्या. फासे पारधी सुधार समिती, मंगरुळ चव्हाळा, ता. नांदगाव खंडेश्वर, जि. अमरावती ही नोंदणीकृत बहुउद्देशीय संस्था आहे. संस्थेने समाजाच्या शैक्षणिक आणि सर्वांगीण विकासासाठी प्रस्ताव शासनाला दिले आहेत. मतिन भोसले यांच्या म्हणण्यानुसार, दोन वर्षांपूर्वी मुख्यमंत्र्यांकडे दिलेल्या प्रस्तावांवर अद्याप कार्यवाही झालेली नाही. सोमवारी शासनाकडे पाच प्रमुख प्रस्ताव सादर करण्यात आले. प्रश्नचिन्ह आदिवासी फासे पारधी आश्रमशाळेसाठी १० एकर शेतजमीन देणे, समाजातील गरीब आणि वंचित विद्यार्थ्यांसाठी स्थानिक पातळीवर महाविद्यालयीन शिक्षणाची सोय करणे, तसेच इयत्ता पहिली ते चौथीच्या विद्यार्थ्यांना शिकवण्यासाठी आणखी एका शिक्षकाची नियुक्ती करणे, या मागण्या त्यात आहेत. कला, वाणिज्य आणि विज्ञान शाखांच्या वर्गांना मान्यता देण्याची मागणीही करण्यात आली. हे प्रस्ताव मुख्यमंत्र्यांच्या माध्यमातून केंद्र सरकारकडे पाठवून लवकर मंजुरी द्यावी, अशी मागणी मतिन भोसले यांनी केली. मंगरुळ चव्हाळा येथील फासे पारधी वस्तीतील ९० पात्र लाभार्थींना घरकुल देण्याची मागणीही करण्यात आली. समृद्धी महामार्गामुळे प्रश्नचिन्ह आदिवासी आश्रमशाळेची इमारत पाडण्यात आली. तिच्या नव्या बांधकामासाठी नुकसानभरपाई म्हणून ६ कोटी रुपये मंजूर करण्याचा प्रस्तावही देण्यात आला. पालकमंत्री चंद्रशेखर बावनकुळे म्हणाले, “या मागण्यांवर शासनाला धोरणात्मक निर्णय घ्यावा लागेल. यापूर्वी मुख्यमंत्र्यांना दिलेले निवेदन आणि आजची मांडणी याबाबत मी त्यांच्याशी चर्चा करेन. प्रश्नांची दखल घेऊन ते सोडवण्यासाठी पावले उचलली जातील.”
Source link
फासे पारधी समाजाने पालकमंत्र्यांना मागण्यांचे निवेदन दिले:आश्रमशाळेसाठी जमीन, शिक्षक आणि इमारतीसाठी 6 कोटींची मागणी
