दिवसभर वीजपुरवठा सुरळीत ठेवण्यासाठी धावपळ करणाऱ्या महावितरणच्या कर्मचाऱ्यांना आपल्या कलागुणांना सादर करण्यासाठी नाट्यस्पर्धेच्या माध्यमातून व्यासपीठ मिळाले आहे. छत्रपती संभाजीनगर येथील तापडिया नाट्यमंदिरात महावितरणच्या प्रादेशिक आंतरपरिमंडलीय नाट्यस्पर्धेला गुरुवारी (१ ऑक्टोबर) सुरुवात झाली. पहिल्याच दिवशी जळगाव आणि नांदेड परिमंडलाच्या कलाकारांनी सादर केलेल्या ‘वारी’ आणि ‘मिना’ या नाटकांना प्रेक्षकांचा उत्स्फूर्त प्रतिसाद मिळाला. स्पर्धेच्या उद्घाटनप्रसंगी महावितरणच्या छत्रपती संभाजीनगर प्रादेशिक कार्यालयाचे सहव्यवस्थापकीय संचालक गजेंद्र बावणे अध्यक्षस्थानी होते. यावेळी बोलताना त्यांनी सांगितले की, कर्मचाऱ्यांच्या दैनंदिन कामाचा ताण कमी करण्यासोबतच त्यांच्यातील कला आणि सर्जनशीलतेला प्रोत्साहन देणे गरजेचे आहे. नाट्यस्पर्धेसारख्या उपक्रमांमुळे कर्मचाऱ्यांना कामापलीकडे आपली कला दाखवण्याची संधी मिळते. त्यामुळे कलाकारांना प्रोत्साहन देण्यासाठी प्रेक्षकांनी त्यांच्या प्रयोगांना मनापासून दाद द्यावी, असे आवाहन त्यांनी केले. मान्यवरांची उपस्थिती उद्घाटन सोहळ्याला जळगाव परिमंडलाचे मुख्य अभियंता आय. ए. मुलाणी, नांदेड परिमंडलाचे मुख्य अभियंता राजाराम माने आणि छत्रपती संभाजीनगर परिमंडलाचे प्रभारी मुख्य अभियंता मनीष ठाकरे प्रमुख अतिथी म्हणून उपस्थित होते. यावेळी त्यांनीही कर्मचाऱ्यांच्या कलागुणांना प्रोत्साहन देण्यासाठी अशा उपक्रमांचे महत्त्व स्पष्ट केले. नाट्यस्पर्धेच्या निमित्ताने महावितरणच्या विविध विभागांमध्ये काम करणारे कर्मचारी एकत्र आले आहेत. वीजपुरवठा, ग्राहकांच्या तक्रारी, तांत्रिक अडचणी आणि इतर दैनंदिन जबाबदाऱ्या सांभाळताना येणाऱ्या ताणातून काही काळ बाहेर पडण्यासाठी ही स्पर्धा महत्त्वाचे व्यासपीठ ठरत आहे. ‘वारी’मधून जीवनप्रवासाचा संदेश स्पर्धेच्या पहिल्या सत्रात जळगाव परिमंडलाने समीर मोने लिखित ‘वारी’ हे नाटक सादर केले. संत ज्ञानेश्वर, संत नामदेव आणि संत तुकाराम यांच्या विचारांचा संदर्भ घेत माणसाच्या जीवनप्रवासावर या नाटकातून भाष्य करण्यात आले. माणसाचा जन्म झाल्यापासून त्याच्या आयुष्याच्या शेवटापर्यंतचा प्रवास हा एका वारीप्रमाणेच सुरू असतो. या प्रवासात संत-महात्म्यांच्या शिकवणीतून आणि त्यांच्या अनुभवातून माणसाने बोध घ्यावा, तसेच स्वतःच्या अस्तित्वाची जाणीव ठेवत पुढे जावे, असा संदेश नाटकातून देण्यात आला. कलाकारांचा अभिनय, नेपथ्य आणि संगीत यामुळे ‘वारी’चा प्रयोग प्रभावी ठरला. नाटकातील आशय आणि सादरीकरणाला प्रेक्षकांकडून चांगला प्रतिसाद मिळाला. ‘मिना’मध्ये महावितरण कर्मचाऱ्यांचे वास्तव दुसऱ्या सत्रात नांदेड परिमंडलाने प्रमोद देशमुख लिखित ‘मिना’ या नाटकाचा प्रयोग सादर केला. या नाटकातून महावितरणमध्ये काम करणाऱ्या अभियंते आणि तांत्रिक कर्मचाऱ्यांच्या दैनंदिन कामाचे वास्तव मांडण्यात आले. वीज ग्राहकांना वेळेत आणि योग्य सेवा देताना कर्मचाऱ्यांना अनेक अडचणींचा सामना करावा लागतो. ग्राहकांच्या विविध अपेक्षा, वीजपुरवठा सुरळीत ठेवण्याची जबाबदारी, तक्रारींचे निराकरण तसेच वीजचोरीविरोधात कारवाई करताना येणारे अडथळे या विविध विषयांना नाटकातून हात घालण्यात आला. या अडचणींवर कर्मचारी कशाप्रकारे मार्ग काढतात, हेही नाटकातून दाखवण्यात आले. दोन्ही नाटकांमध्ये सशक्त कथानक, कलाकारांचा अभिनय, नेपथ्य आणि संगीत यांचा चांगला मेळ पाहायला मिळाला. त्यामुळे पहिल्याच दिवशी नाट्यस्पर्धेची उत्सुकता वाढली असून पुढील प्रयोगांकडेही रसिकांचे लक्ष लागले आहे. परीक्षकांसह अधिकारी उपस्थित स्पर्धेसाठी डॉ. दिलीप घारे, योगिता महाजन आणि पद्मनाभ पाठक हे परीक्षक म्हणून उपस्थित आहेत. याशिवाय प्रभारी महाव्यवस्थापक प्रवीण गायकवाड, अधीक्षक अभियंता महेश पवार, विजय मोरे, बीना सावंत, शुभांगी कटकधोंड, उपसंचालक शशांक देशमुख, सहायक महाव्यवस्थापक प्रदीप सातपुते, शंकर कुलकर्णी यांची उपस्थिती होती. स्वागत समितीचे अध्यक्ष राजेंद्र नाहटा आणि सचिव मधुसूदन मराठे यांनीही आयोजनात सहभाग घेतला. अविनाश सानप यांनी सूत्रसंचालन, तर ज्ञानेश्वर आर्दड यांनी आभार प्रदर्शन केले. हेही वाचा…. अभिजित दीपकेंकडून शिवाजी महाराजांचा अपमान?:‘कॉकरोच’च्या फोटोवरून नितेश राणेंचा संताप, माफी मागण्याची मागणी कॉकरोच जनता पार्टीकडून 2 ऑक्टोबर रोजी मुंबईतील शिवाजी पार्क येथे प्रस्तावित आंदोलनाच्या पार्श्वभूमीवर राजकीय वातावरण तापले आहे. भाजप आमदार नितेश राणे यांनी कॉकरोच जनता पार्टीचे संस्थापक अभिजित दीपके यांच्यावर गंभीर आरोप करत छत्रपती शिवाजी महाराजांचा कथित अवमान केल्याचा दावा केला आहे. दीपके यांनी सोशल मीडियावर शेअर केलेल्या एका फोटोवरून राणे यांनी आक्षेप घेतला असून, या प्रकाराबद्दल त्यांनी माफी मागावी, अशी मागणी केली आहे. सविस्तर वाचा….
Source link
महावितरणच्या नाट्यस्पर्धेतून वीज कर्मचाऱ्यांच्या कलागुणांना वाव:‘वारी’ आणि ‘मिना’ने पहिल्याच दिवशी रंगत वाढवली
