मुंबई उच्च न्यायालयाच्या नागपूर खंडपीठाने शिक्षण विभागाचे 28 मार्च व 9 जूनचे आदेश रद्द केल्यामुळे विदर्भातील शाळा आता 30 जून रोजीच सुरू होणार आहेत. शिक्षण विभागाने 28 मार्च रोजी विदर्भासह राज्यातील सर्व शाळा 15 जून पासून सुरू करण्याचे निर्देश दिले होते, मात्र त्यास विदर्भातील शिक्षक संघटना व पालकांनी तीव्र विरोध केला होता. 15 जून रोजी विदर्भातील तापमान पुरेसे कमी होत नसल्याचे आणि या भागासाठी आधीपासूनच 26 जूनची तारीख निश्चित असल्याचे कारण पुढे करत काही संघटना थेट नागपूर खंडपीठात गेल्या होत्या, आणि अखेर न्यायालयाने शिक्षण विभागाचे आदेश रद्द करत विदर्भातील शाळांसाठी 30 जूनची तारीख कायम केली आहे. 9 जून रोजी शिक्षण विभागाने सुधारित आदेश काढत विदर्भातील शाळा 22 जूनपासून सुरू होतील आणि 22 ते 30 जून दरम्यान सकाळच्या सत्रात शाळा भरवल्या जातील, असे जाहीर केले होते. मात्र आज नागपूर खंडपीठात झालेल्या सुनावणीत न्यायालयाने शिक्षण विभागाला कडक शब्दांत सुनावले. विदर्भातील शाळांसाठी आधीच 26 जूनची तारीख निश्चित असताना वारंवार नवनवे आदेश काढून गोंधळ का निर्माण केला जातो, असे खंडपीठाने स्पष्टपणे खडसावले. अखेर नागपूर खंडपीठाने विदर्भातील शाळांसाठी 30 जून ही तारीख निश्चित करताना, शिक्षण विभाग व त्यांच्या अधिकाऱ्यांनी यापूर्वीच्या शासन निर्णयाविरोधात जाऊन कोणतीही कृती करू नये, असे स्पष्ट निर्देशही दिले आहेत. विदर्भातील तापमानाचा संभाव्य धोका विचारात घेऊन उन्हाळी सुट्टी आणि शाळा सुरू करण्याच्या वेळापत्रकात बदल करण्यात आला असून, 30 जून 2026 पर्यंत विदर्भातील सर्व शाळा सकाळच्या सत्रातच भरवल्या जाणार आहेत. त्यानंतर 1 जुलै 2026 पासून शाळा नियमित वेळेत सुरू होतील, असे स्पष्ट करण्यात आले आहे. माध्यमिक शिक्षण संचालक डॉ. महेश पालकर आणि प्राथमिक शिक्षण संचालक डॉ. शरद गोसावी यांनी संयुक्तपणे हे परिपत्रक जारी केले आहे. विदर्भात मान्सून दाखल होण्यास अद्याप काही दिवसांचा कालावधी शिल्लक असल्याने तापमान विद्यार्थ्यांच्या आरोग्याच्या दृष्टीने अनुकूल नसल्याचे स्पष्ट झाले आहे. या पार्श्वभूमीवर विदर्भातील राज्य मंडळाच्या प्राथमिक, माध्यमिक आणि उच्च माध्यमिक शाळा 30 जूनपासूनच सुरू करण्याचा निर्णय घेण्यात आला आहे.
Source link
विदर्भातील शाळा आता 30 जूनलाच सुरू होणार:उच्च न्यायालयाचा निर्णय, नागपूर खंडपीठाने अधिकाऱ्यांना खडसावले
