माजी आमदार आणि काँग्रेस नेते धीरज देशमुख यांनी मराठवाड्यातील शेतकऱ्यांच्या रखडलेल्या पीक विम्यासाठी आणि दुष्काळ जाहीर करण्याच्या मागणीसाठी विभागीय आयुक्तांना निवेदन दिले. २०२३-२४ चा पीक विमा ७२ तासांच्या तांत्रिक कारणांमुळे नाकारण्यात आला होता. धाराशिवमधील शेतकऱ्यांना उच्च न्यायालयाच्या निर्देशानुसार पीक विमा मिळाला, त्याच धर्तीवर मराठवाड्यातील सर्व शेतकऱ्यांना पीक विमा मिळावा, अशी मागणी देशमुख यांनी केली. धीरज देशमुख यांनी छत्रपती संभाजीनगर विभागाच्या विभागीय आयुक्तांना दिलेल्या निवेदनात, शेतकऱ्यांचे पीक विमा दावे नाकारणे अन्यायकारक असल्याचे म्हटले आहे. अतिवृष्टी आणि नैसर्गिक आपत्तीमुळे नुकसान होऊनही, केवळ ७२ तासांच्या आत नुकसानीची माहिती दिली नाही या तांत्रिक कारणावरून अनेक दावे रद्द करण्यात आले आहेत. महसूल विभागाचे पंचनामे, कृषी विभागाचे अहवाल आणि इतर शासकीय नोंदींमधून नुकसान स्पष्ट दिसत असतानाही, ही अट लावणे चुकीचे आहे. मुंबई उच्च न्यायालयाच्या औरंगाबाद खंडपीठानेही व्यापक आपत्तीच्या काळात ७२ तासांची अट कठोरपणे लागू करणे योग्य नसल्याचे म्हटले आहे. मराठवाड्यात सध्या गंभीर दुष्काळसदृश परिस्थिती आहे. २०२६ च्या खरीप हंगामात अपुरा पाऊस, दीर्घकाळ कोरडा कालावधी, कमी झालेली जमिनीतील आर्द्रता आणि भूजल पातळी खालावल्यामुळे भीषण स्थिती निर्माण झाली आहे. सोयाबीन, कापूस, तूर, मूग, उडीद, मका आणि बाजरी या पिकांचे मोठे नुकसान झाले आहे. यामुळे शेतकरी आर्थिक अडचणीत सापडले आहेत. या निवेदनात धीरज देशमुख यांनी काही प्रमुख मागण्या केल्या आहेत. यात कागदोपत्री तांत्रिकतेऐवजी पंचनामे आणि अधिकृत हवामान नोंदींच्या आधारे पीक विम्याचे पात्र दावे मंजूर करावेत, अशी मागणी आहे. तसेच, प्रत्यक्ष पाहणी करून गावनिहाय सर्वेक्षण करून बाधित तालुके आणि गावे दुष्काळग्रस्त घोषित करावीत. शेतकऱ्यांची कर्जवसुली तातडीने थांबवून पीक कर्जाचे पुनर्गठन करावे आणि नवीन पीक कर्जाची उपलब्धता सुनिश्चित करावी. मराठवाड्यासाठी विशेष दुष्काळ निवारण पॅकेज आणि ‘मराठवाडा रब्बी पुनर्बांधणी विशेष योजना’ तातडीने मंजूर करावी, अशी मागणीही त्यांनी केली आहे.
Source link
रखडलेला पीक विमा मंजूर करा- धीरज देशमुख:मराठवाड्यातील शेतकऱ्यांचे 72 तासांच्या तांत्रिक कारणाने नाकारलेले दावे मान्य करण्याचीही मागणी
