महागाईने आधीच होरपळून निघालेल्या सर्वसामान्यांना आता आणखी एक आर्थिक फटका बसणार आहे. राज्यातील दूध उत्पादक व व्यावसायिक कल्याणकारी संघाच्या पुण्यात झालेल्या बैठकीत दूध दरात प्रति लिटर चार रुपयांनी वाढ करण्याचा निर्णय घेण्यात आला आहे. विशेष म्हणजे, अलीकडेच निवडणुकीमुळे चर्चेत आलेल्या ‘गोकुळ’ दूध संघानेही भाववाढीचे संकेत दिले आहेत, तर ‘अमूल’ आणि ‘मदर डेअरी’ने आधीच आपले दर वाढवले आहेत. पुण्यातील कात्रज डेअरीच्या कार्यालयात राज्यातील 45 सहकारी आणि खासगी दूध ब्रँडच्या प्रतिनिधींची बैठक पार पडली. या बैठकीत गाय आणि म्हशीच्या दुधाच्या दरात प्रति लिटर चार रुपयांची वाढ करण्याचे एकमताने ठरले. डिझेल आणि साखरेचे वाढलेले दर, बाहेरील दूध ब्रँड्सची वाढती स्पर्धा आणि डीलर रेट्समुळे ही दरवाढ अटळ असल्याचे दूध उत्पादकांचे म्हणणे आहे. यासोबतच दुग्धजन्य पदार्थांच्या दरातही सुमारे 10 टक्के वाढ करण्याचा निर्णय या बैठकीत घेण्यात आला आहे. गोकुळ दुधाचेही दर वाढणार ‘अमूल’ आणि ‘मदर डेअरी’ पाठोपाठ आता कोल्हापूरच्या गोकुळ दूध संघानेही दरवाढीच्या हालचाली सुरू केल्या आहेत. गोकुळचे नूतन चेअरमन राजेश पाटील यांनी तसे स्पष्ट संकेत दिले असून, शनिवारी होणाऱ्या नव्या कार्यकारिणीच्या पहिल्याच बैठकीत दूध दरवाढीवर शिक्कामोर्तब होण्याची शक्यता आहे. वाढती महागाई आणि इंधन दरवाढीमुळे हा निर्णय घेतला जाण्याची शक्यता वर्तवली जात आहे. अमूल आणि मदर डेअरीची आधीच दरवाढ 12 नोव्हेंबरपासून ‘अमूल’ने आपल्या दुधाच्या दरात 2 ते 4 रुपयांची वाढ लागू केली आहे. अमूलचे ‘ताजा टोन्ड दूध’ 2 रुपयांनी, तर ‘अमूल गोल्ड’ 4 रुपयांनी महागले आहे. याच धर्तीवर ‘मदर डेअरी’नेही आपल्या दरांमध्ये 2 ते 4 रुपयांची वाढ केली असून, या कंपन्यांच्या दरवाढीचा थेट परिणाम ग्राहकांच्या मासिक बजेटवर होणार आहे. दरवाढीची प्रमुख कारणे देशातील वाढती महागाई हे या दूध दरवाढीचे मुख्य कारण मानले जात आहे. हिरवा आणि सुका चारा, पशुखाद्य, आणि पॅकेजिंगच्या दरात झालेली मोठी वाढ दूध उत्पादकांना अडचणीत आणत आहे. याशिवाय मालवाहतुकीच्या खर्चात झालेली वाढ हेदेखील एक प्रमुख कारण आहे. वाढत्या उत्पादन आणि वाहतूक खर्चामुळेच दूध उत्पादक कंपन्यांनी दरवाढीचा हा निर्णय घेतला असून, यामुळे सर्वसामान्यांच्या खिशाला मोठी कात्री लागणार आहे.
Source link
सर्वसामान्यांना महागाईचा आणखी एक फटका!:राज्यात दुधाच्या दरात प्रति लिटर 4 रुपयांची वाढ, दूध उत्पादक संघाचा निर्णय
