हिंगोली शहरातील एका बड्या मॉलमध्ये पिठाच्या बॅगमध्ये आळ्या निघाल्याच्या प्रकारानंतर अन्न व औषध प्रशासनाच्या अधिकाऱ्यांनी गुरुवारी ता. 11 दुकानात जाऊन पिठाचे तीन नमुने तपासणीसाठी घेतले या शिवाय इतर खाद्य पदार्थांचे 45 अनौपचारिक नमुनेही घेण्यात आले. मात्र या कारवाईची कानोकान खबरही कोणाला लागू दिली नाही. एवढेच नव्हे तर कारवाई करणाऱ्या अधिकाऱ्यांनी आपला मोबाईल नंबर कोणालाही देऊ नका अशी सूचना वजा तंबीच सहकारी अधिकारी व कार्यालयाला दिली आहे. हिंगोली येथील एका बड्या मॉलमधे एका ग्राहकाने गव्हाच्या पिठाचे पाकिट घेतले. सदर पाकिट घरी जाऊन फोडल्यानंतर त्यात काही आळ्या निघाल्या. त्यामुळे ग्राहकाने पाकिट जसेच्या तसे आणून मॉलच्या व्यवस्थापकाला दाखविल्यानंतर त्याने उडवा उडवीची उत्तरे दिली. याप्रकारानंतर त्या ग्राहकाने परभणी येथून चालणाऱ्या अन्न व औषध प्रशासनाकडे तोंडी तक्रार केली. मात्र सदर मॉल बड्या कंपनीचा असल्याने अधिकारीही नमुने घेण्यासाठी धजावत नव्हते. पण आयुक्त तुकाराम मुंढे यांच्याकडून कारवाईच्या धास्तीने अधिकारी गुरुवारी ता. 11 हिंगोलीत आले त्यांनी संबधित मॉलला भेट दिली अन तीन नमुने काढले या शिवाय इतर खाद्य पदार्थ्यांचे अनौपचारीक नमुने घेतले अन अधिकाऱ्यांनी हिंगोलीतून काढता पाय घेतला. विशेष म्हणजे एरव्ही लहान कारवाईची रंगवून माहिती देणाऱ्या अधिकाऱ्यांनी सदर कारवाईची मात्र कोणाला कानोकान खबरही होऊ दिली नाही. या शिवाय आपला मोबाईल नंबर कोणालाही देऊ नका अशी सूचना वजा तंबीही त्यांनी सहकारी अधिकाऱ्यांना तसेच कार्यालयातील कर्मचाऱ्यांना दिली. त्यामुळे या कारवाईची माहिती गोपनीय का ठेवली जात आहे याबाबत उलट सुलट चर्चा सुरु झाली आहे. या संदर्भात अन्न व औषध प्रशासनाचे सहाय्यक आयुक्त पवन खताळ यांच्याशी संपर्क साधला असता त्यांनी सदर मॉल मधून तीन नमुने तपासणीसाठी घेतले तसेच इतर अनौपचारिक 45 नमुने घेतल्याचे सांगितले. या कारवाईबाबत जिल्हा माहिती अधिकारी कार्यालयास कळविल्याचेही त्यांनी स्पष्ट केले.
Source link
हिंगोलीतील बड्या मॉलच्या पिठात आळ्या:ग्राहकाच्या तक्रारीनंतर अन्न व औषध प्रशासनाचा छापा
