हिंगोलीत चोरट्यांचा हैदोस!:तिरुपती नगर परिसरात घरांची 'रेकी' करून दोन दुचाकी पळवल्या; सीसीटीव्ही फुटेज समोर

हिंगोली शहरातील तिरुपती नगर भागात चोरट्यांनी दोन दिवसाची वाहने पळविल्याची घटना घडली आहे. यावेळी चोरट्यांनी परिसरातील घरांची रेकी केल्याचे सीसीटीव्ही फुटेज मध्ये दिसून येत आहे हिंगोली शहरातील तिरुपती नगर भागामध्ये शुक्रवारी तारीख 26 पहाटे अडीच वाजण्याच्या सुमारास पाच चोरट्यांनी प्रवेश केला. तोंडाला रुमाल बांधून आलेल्या चोरट्यांनी पायाचा आवाज येऊ नये यासाठी पायातील चपला व बुट काढून हातात घेतली होती. या चोरट्यांनी परिसरातील बहुतांश घराची रेकी केली. चोरट्यांनी काही घरांच्या संरक्षण भिंतीवरून उड्या मारून आत प्रवेश केला. मात्र कुठेही चोरी करण्यात चोरट्यांना संधी मिळाली नाही. यावेळी चोरट्यांनी तिरुपती नगरातील रहिवासी असलेले विजय लोथे यांच्या घराजवळ उभ्या केलेल्या दोन दुचाकी पळविल्या. शुक्रवारी सकाळी लोथे यांनी पाहणी केली असता घरासमोरील दोन्ही दुचाकी पळविल्याचे दिसून आले. हिंगोली शहर पोलिस ठाण्याची संपर्क साधून या घटनेची माहिती दिली. हिंगोली शहर पोलिस ठाण्याचे निरीक्षक देवेंद्रसिंह ठाकूर, सहाय्यक पोलिस उपनिरीक्षक संजय मार्के, जमादार अशोक धामणे, गणेश लेकुळे यांच्या पथकाने घटनास्थळी भेट देऊन पाहणी केली. यावेळी पोलिसांनी सीसीटीव्ही फुटेजची तपासणी केली. यावेळी चोरटे तिरुपती नगर परिसरात फिरत असल्याचे दिसून आले. चोरट्यांनी तोंडाला रुमाल बांधल्यामुळे त्यांचे चेहरे स्पष्टपणे ओळखू येत नसल्याचे सांगण्यात आले आहे. पोलिसांनी परिसरातील सीसीटीव्ही फुटेज ताब्यात घेतली असून त्यावरून आता चोरट्यांची ओळख पटविण्याची प्रयत्न सुरू केले आहेत. याप्रकरणी हिंगोली शहर पोलिस ठाण्यात अद्याप पर्यंत गुन्हा दाखल झालेला नाही.दरम्यान या घटनेमुळे परिसरात एकच खळबळ उडाली असून पोलिसांनी रात्रीच्या वेळी परिणामकारक गस्त सुरू करावी अशी मागणी नागरीकांतून केली जात आहे



Source link