उपचारासाठी आलेल्या महिला रुग्णावर अत्याचार करून व्हिडिओ सोशल मीडियावर प्रसारित केल्याच्या प्रकरणात फुलंब्री पोलिसांनी २४ तासांच्या आत कारवाई केली आहे. याप्रकरणी डॉ. रामदास महादू तरटे(५४) आणि भाजपचे फुलंब्री शहराध्यक्ष उत्तम भागाजी ढोके (५४) या दोघांना अटक करण्यात आली असून न्यायालयाने त्यांना दोन दिवसांची पोलिस कोठडी सुनावली आहे. पीडित महिलेने २० ऑक्टोबर रोजी दिलेल्या तक्रारीनुसार, फुलंब्री येथील समर्थ क्लिनिकमध्ये डोकेदुखीच्या उपचारासाठी दिलेल्या गोळ्यांमुळे गुंगीच्या अवस्थेत असताना तिच्यावर अत्याचार करण्यात आला.तसेच या घटनेचा व्हिडिओ बनवून तो प्रसारित करून बदनामी करण्यात आली.या तक्रारीवरून फुलंब्री पोलिसांनी दोन्ही आरोपींविरुद्ध भारतीय न्याय संहितेसह ॲट्रॉसिटी कायद्यानुसार गुन्हा दाखल केला आहे. पोलिस अधीक्षक प्रकाश जाधव आणि अपर पोलिस अधीक्षक प्रशांत स्वामी यांच्या मार्गदर्शनाखाली उपविभागीय पोलिस अधिकारी पूजा नागरे, प्रभारी पोलिस उपअधीक्षक डॉ.सोनाली पाईकराव, पोलिस उपनिरीक्षक सुग्रीव चाटे, अंमलदार अनिल शिंदे, दिनकर पांढरे व कौतिक चव्हाण यांनी ही कारवाई पार पाडली. या प्रकरणाचा पुढील तपास उपविभागीय पोलिस अधिकारी पूजा नागरे करत आहेत. तपासादरम्यान घटनेशी संबंधित पुरावे, डिजिटल स्वरूपातील माहिती आणि इतर आनुषंगिक बाबींची नियमानुसार पडताळणी करण्यात येत आहे. पीडितेला त्वरित न्याय व आरोपींना कठोर शिक्षा द्या डॉक्टरांसारख्या पवित्र पेशाला आणि लोकप्रतिनिधीसारख्या जबाबदार पदाला काळिमा फासणारी फुलंब्रीतील ही घटना अत्यंत भयानक आणि संतापजनक आहे. पीडित महिलेवर झालेला अत्याचार आणि व्हिडिओ व्हायरल करून केलेली बदनामी मानवतेला कलंकित करणारी आहे. पोलिसांनी २४ तासांत अटक केली असली तरी या नराधमांना कठोर शिक्षा देऊन पीडितेला त्वरित न्याय मिळायलाच हवा, अशी मागणी नागरिकांतून होत आहे.
Source link
24 तासांत कारवाई:महिलेवर अत्याचार; डॉक्टर,भाजप शहराध्यक्षाला अटक, फुलंब्रीत उपचारासाठी आली होती महिला
