प्रतिनिधी | चांदूरबाजार वाढत्या उन्हाची तीव्रता लक्षात घेता, बसस्थानक परिसरात येणाऱ्या प्रवाशांना थंडगार पिण्याचे पाणी मिळावे या उद्देशाने चांदूरबाजार ऑटो युनियनच्या वतीने पाणपोई सुरू करण्यात आली आहे. या पाणपोईचे रीतसर उद्घाटन आयपीएस अधिकारी सागर भामरे यांच्या हस्ते उत्साहात पार पडले. ऑटो युनियनचे अध्यक्ष मुमताजिर उर्फ मोंटू खान यांच्या मार्गदर्शनाखाली गेल्या पाच वर्षांपासून हा स्तुत्य उपक्रम दरवर्षी उन्हाळ्यात राबवला जातो. या पाणपोईच्या माध्यमातून बसस्थानक परिसरात येणाऱ्या नागरिकांना आणि प्रवाशांना सकाळपासून संध्याकाळपर्यंत थंडगार पाणी उपलब्ध करून दिले जाते. वाढत्या तापमानात प्रवाशांची पाण्यासाठी होणारी वणवण थांबवून त्यांना दिलासा देण्याचे काम या उपक्रमाद्वारे होत आहे. उद्घाटन प्रसंगी उपस्थित नागरिकांनी आणि प्रवाशांनी ऑटो युनियनच्या या सामाजिक जाणिवेचे भरभरून कौतुक केले. या कार्यक्रमाला प्रवासी मित्र मंडळाचे मदन भाटे, सुमित हरकूट व शरद केदार प्रामुख्याने उपस्थित होते. दरम्यान सामाजिक बांधिलकी जपून नागरिकांच्या सेवेसाठी असे जनहिताचे उपक्रम ऑटो युनियनतर्फे यापुढेही सातत्याने राबवण्यात येतील, अशी ग्वाही ऑटो युनियनचे अध्यक्ष मुमताजिर उर्फ मोंटू खान यांनी दिली आहे. हा उपक्रम यशस्वी करण्यासाठी ऑटो युनियनचे अनिस अहमद, अश्विन टेकाडे, नसीम अली, शेख रहेमत नसुल्लाखान, सादिक शाह, शेख जावेद, विजय मानकर, वहिदा भाई, यश निंबोरकर, शुभम निंबोरकर यांसह युनियनच्या अनेक सदस्यांनी परिश्रम घेतले. ऑटो युनियनच्या या उपक्रमाचे संपूर्ण तालुक्यात स्वागत होत आहे.
Source link
ऑटो युनियनतर्फे चांदूरबाजार बसस्थानक परिसरात पाणपोई:आयपीएस अधिकारी सागर भामरे यांची यावेळी उपस्थिती
