हिंगोली तालुक्यातील डिग्रस कऱ्हाळे येथे जेसीबीच्या पैशाच्या कारणावरून सख्खा भाऊ व भाच्यांनी दिलेल्या मानसिक त्रासाला कंटाळून महिलेने शेतात गळफास घेऊन आत्महत्या केल्याची घटना घडली आहे. याप्रकरणी शनिवारी ता. 30 हिंगोली ग्रामीण पोलिस ठाण्यात चौघांवर गुन्हा दाखल झाला आहे. पोलिसांनी दिलेल्या माहितीनुसार, डिग्रस कऱ्हाळे येथील जगन भिसे व त्याच्या मामाचा मुलगा वैजनाथ कऱ्हाळे या दोघांनी मिळून जेसीबी मशीन घेतली होती. सुमारे 28 लाख रुपयांच्या जेसीबी मशीनसाठी दोघांनी प्रत्येकी साडेचार लाख रुपयांचा भरणा केली होता. त्यानंतर जेसीबीने कामे करून हप्ते फेडले होते. जेसीबीमशीनचे हप्ते फिटल्यानंतर मशीन दोघांपैकी कोणीही अर्धे पैसे देऊन ठेऊन घेण्याचे ठरले होते. त्यानुसार जेसीबी मशीनचे हप्ते पूर्ण झाल्यानंतर जगन यांनी मशीनचे अर्धे पैसे देऊन मशीन ठेवायची असे सांगितले. त्यासाठी 12.50 लाख रुपये देखील वैजनाथ याला दिले होते. मात्र वैजनाथ याने मशीन दिली नाही. त्यावरून दोघांमध्ये वादाला तोंड फुटले. सदर वाद विकोपाला गेल्यानंतर गावातील काही मंडळींनी एकत्रीत बसून वाद मिटविण्याचा प्रयत्न केला. मात्र त्यामध्येही तोडगा निघाला नाही. या प्रकरणामुळे जगन यांची आई सुर्यकांताबाई भिसे (60) ह्या मानसिक त्रासातच होत्या. त्यातच वैजनाथ व इतरांनी त्यांना धमकी दिली. या त्रासाला कंटाळून सुर्यकांताबाई यांनी शुक्रवारी ता. 29 दुपारी चार वाजता शेतात जाऊन झाडाला गळफास घेऊन आत्महत्या केली. या घटनेची माहिती मिळाल्यानंतर जगन व त्यांच्या कुटुंबियांनी घटनास्थळी धाव घेतली. तसेच हिंगोली ग्रामीण पोलिस ठाण्याचे पोलिस निरीक्षक शामकुमार डोंगरे, उपनिरीक्षक राहुल घुले यांच्यासह पोलिसांच्या पथकाने भेट दिली. या प्रकरण जगन भिसे यांनी दिलेल्या तक्रारीवरून हिंगोली ग्रामीण पोलिसांनी वैजनाथ कऱ्हाळे, प्रकाश कऱ्हाळे, गणेश कऱ्हाळे, ज्ञानबा नामदेव कऱ्हाळे यांच्या विरुध्द गुन्हा दाखल केला आहे. उपनिरीक्षक राहुल घुले, जमादार आशिष उंबरकर, सुधीर ठेंबरे पुढील तपास करीत आहेत.
Source link
भाऊ अन् भाच्यांच्या त्रासाला बहीण कंटाळली!:हिंगोली तालुक्यात वृद्ध महिलेने शेतात संपवले जीवन, चाैंघांवर हिंगोली ग्रामीण पोलिस ठाण्यात गुन्हा दाखल
