महायुतीचे उमेदवार प्रवीण पोटे यांनी नामांकन दाखल केल्यानंतर पालकमंत्री चंद्रशेखर बावनकुळे यांनी माध्यमांशी संवाद साधला. यावेळी बोलताना ते म्हणाले की, अमरावती मतदारसंघातील महायुतीचा विजय आतापर्यंतच्या विजयांमध्ये सर्वात मोठा असेल. बावनकुळे यांनी दावा केला की, भाजप, शिंदे सेना आणि अजित पवार यांच्या नेतृत्वाखालील महायुतीचे उमेदवार म्हणून पोटे मैदानात आहेत. कोरोना काळात त्यांनी मोफत आरोग्य सेवा पुरवली, तसेच मतदारसंघात सतत जनसंपर्क ठेवला आणि विकास कामे केली. त्यामुळे यावेळी भाजपला विक्रमी मताधिक्य मिळेल. माजी खासदार नवनीत राणा आणि आमदार रवी राणा यांच्याबाबत विचारलेल्या प्रश्नावर बावनकुळे यांनी स्पष्ट केले की, दोघेही प्रगल्भ नेते आहेत. काही स्थानिक मतभेद असले तरी ते महायुतीसोबतच राहतील. शिवसेनेचे बाजोरिया यांच्या उमेदवारीबद्दल बोलताना ते म्हणाले की, त्यांनी अद्याप अर्ज दाखल केलेला नाही. समजा काही नाराजीपोटी त्यांनी नामांकन दाखल केले तरी, त्यांची नाराजी ४ जूनपूर्वी दूर होईल, असा विश्वास त्यांनी व्यक्त केला. या निवडणुकीत एकूण पाच उमेदवार रिंगणात आहेत. भाजपकडून प्रवीण पोटे, वंचित बहुजन आघाडीकडून निलेश विश्वकर्मा, अपक्ष म्हणून विप्लव बाजोरिया आणि प्रशांत महल्ले यांनी सोमवारी नामांकन दाखल केले. महाविकास आघाडीचे उमेदवार म्हणून नागपूरचे उद्योजक हर्षजीत देशमुख यांनी शनिवारीच उमेदवारी दाखल केली होती. देशमुख यांचा एक अर्ज काँग्रेसतर्फे तर दुसरा अपक्ष होता. त्यांचा राहिलेला बी फॉर्म सोमवारी निवडणूक यंत्रणेकडे सादर करण्यात आल्याने ते आता काँग्रेसचे अधिकृत उमेदवार बनले आहेत. राज्यातील जागावाटपाचा निर्णय महायुतीच्या प्रमुख नेत्यांनी एकमताने घेतला आहे. त्यानुसार, भारतीय जनता पक्ष ११, शिवसेना (शिंदे गट) ४ आणि राष्ट्रवादी काँग्रेस (अजित पवार गट) २ जागांवर निवडणूक लढवणार आहे. महायुतीचे सर्वच उमेदवार निवडून येतील, असा विश्वास बावनकुळे यांनी व्यक्त केला. महायुतीमध्ये कोणतेही मतभेद नसून, जागावाटपाचा फॉर्म्युला स्थानिक राजकीय परिस्थिती आणि मतदारसंघातील ताकद लक्षात घेऊन ठरवण्यात आल्याचे त्यांनी स्पष्ट केले.
Source link
अमरावतीतील महायुतीचा विजय सर्वात मोठा असेल:राणा दाम्पत्य महायुतीसोबतच राहतील – पालकमंत्री चंद्रशेखर बावनकुळे
