रोटरी क्लब नागपूरने ग्रामीण भागातील महिलांना आर्थिकदृष्ट्या सक्षम करण्यासाठी आणि त्यांना स्वतःचा लघुउद्योग सुरू करण्यास प्रोत्साहन देण्यासाठी पुढाकार घेतला आहे. या अंतर्गत घुईखेड व परिसरातील ४१ महिलांना प्रत्येकी १० हजार रुपयांची बिनव्याजी आर्थिक मदत पुरवण्यात आली. हा मदत वाटप कार्यक्रम घुईखेड येथील श्रीमती कमलाबाई टावरी इंग्लिश स्कूलच्या सभागृहात पार पडला. यावेळी निरजा शुकुल, रागिणी साहू, प्रशांत भिलकर, डॉ. रतन बगाडे, निलेश राठी, टिमी बावा आणि सरपंच वर्षलता हेमंत जाधव यांची प्रमुख उपस्थिती होती. निवड झालेल्या लाभार्थ्यांमध्ये घुईखेड, जावरा, निमगव्हाण आणि येरड येथील गरजू व उद्योजक महिलांचा समावेश आहे. या बिनव्याजी आर्थिक मदतीमुळे संबंधित महिलांना विविध प्रकारचे लघुउद्योग सुरू करण्यासाठी आवश्यक प्रारंभिक भांडवल उपलब्ध झाले आहे. या योजनेच्या प्रभावी अंमलबजावणीत नागपूरच्या श्रीमती कमलाबाई टावरी बहुउद्देशीय शिक्षण संस्थेने महत्त्वपूर्ण भूमिका बजावली. परिसरातील गरजू तसेच उद्योग करण्याची इच्छा आणि क्षमता असलेल्या महिलांना या योजनेचा लाभ मिळावा, यासाठी संस्थाप्रमुख कृष्णकुमार टावरी यांनी विशेष प्रयत्न केले. ग्रामीण भागातील अनेक महिलांकडे विविध कौशल्ये असूनही, आर्थिक अडचणींमुळे त्यांना स्वतःचा व्यवसाय सुरू करता येत नाही. अशा महिलांना मिळालेल्या या बिनव्याजी सहाय्यामुळे त्यांना घरगुती उद्योग, खाद्यपदार्थ निर्मिती, शिवणकाम, सेवा उद्योग तसेच इतर लघुउद्योग सुरू करण्यास मोठी मदत होणार आहे. या उपक्रमातून एकूण ४ लाख १० हजार रुपयांचे आर्थिक सहाय्य ४१ महिलांना प्रत्येकी १० हजार रुपये याप्रमाणे धनादेशाद्वारे वितरित करण्यात आले. हा उपक्रम केवळ आर्थिक मदतीपुरता मर्यादित नसून, ग्रामीण महिलांच्या स्वावलंबन, उद्योजकता आणि महिला सक्षमीकरणाला चालना देणारा ठरला आहे. या बिनव्याजी मदतीमुळे महिलांना व्यवसाय सुरू करण्यासाठी मोठा आर्थिक आधार मिळाला आहे. यामुळे त्यांच्या उपजीविकेमध्ये सकारात्मक बदल अपेक्षित असून, भविष्यात कुटुंबाच्या उत्पन्नात वाढ होण्याबरोबरच रोजगाराच्या संधीही निर्माण होण्याची शक्यता आहे.
Source link
41 महिलांना लघुउद्योगासाठी बिनव्याजी आर्थिक सहाय्य:रोटरी क्लब नागपूरचा घुईखेड परिसरात स्तुत्य उपक्रम
