शहरातील सीना नदीकाठी असलेल्या श्री वारुळाचा मारुती मंदिर परिसरात नागपंचमीनिमित्त भरलेल्या यात्रेच्या उत्साहात कुस्ती मैदानाचे आयोजन करण्यात आले होते. आमदार संग्राम जगताप यांच्या सहकार्याने हिंदुत्व प्रतिष्ठान व नालेगाव ग्रामस्थांच्यावतीने नगरसेवक महेश लोंढे यांच्या पुढाकारातून झालेल्या या कुस्ती मैदानात राज्यभरातील नामवंत कुस्तीपटूंनी सहभाग घेत लाल मातीच्या आखाड्यात आपल्या कुस्ती कौशल्याचे दर्शन घडविले. तोडीस तोड कुस्तीपटू आमनेसामने आल्याने एकापेक्षा एक रंगतदार कुस्त्या पाहण्याची पर्वणीच कुस्तीप्रेमींना मिळाली. रात्री उशिरापर्यंत सुरू असलेल्या या कुस्ती मैदानाला प्रेक्षकांनी मोठी गर्दी केली होती. मुख्य कुस्तीत सोलापूरच्या माऊली कोकाटेने पंढरपूरच्या माऊली जमदाडेला चितपट करत विजय मिळविला. कोकाटेने केलेल्या दमदार डावाने नालेगावचा आखाडा टाळ्यांच्या कडकडाटाने दुमदुमून गेला. कुस्तीप्रेमींनी विजयी कुस्तीपटू याचे उत्स्फूर्त स्वागत करत त्याच्या पाठीवर कौतुकाची थाप दिली. सीना नदीकाठी असलेले श्री वारुळाचा मारुती मंदिर हे शहरातील अतिशय पुरातन व जागृत देवस्थान म्हणून ओळखले जाते. दरवर्षी नागपंचमीच्या निमित्ताने या ठिकाणी मोठी यात्रा भरते. यात्रेच्या पार्श्वभूमीवर कुस्ती मैदान आयोजित करण्याची नालेगावची जुनी परंपरा आहे. शहरासह विशेषतः नालेगाव परिसराला कुस्तीची समृद्ध परंपरा लाभली असून या परंपरेला पुढे नेत नवोदित कुस्तीपटूंना प्रोत्साहन मिळावे, त्यांना मोठ्या आखाड्याचा अनुभव मिळावा आणि कुस्तीची संस्कृती जपली जावी, या उद्देशाने यंदाही भव्य कुस्ती मैदानाचे आयोजन करण्यात आले. आखाड्यात लहान-मोठ्या अनेक कुस्त्या रंगल्या. प्रत्येक कुस्तीमध्ये कुस्तीपटूंनी आपल्या ताकदीसोबतच डावपेच, चपळाई आणि तंत्रशुद्ध कुस्तीचे प्रदर्शन केले. त्यामुळे मैदानावर उपस्थित असलेल्या प्रेक्षकांमध्ये प्रत्येक कुस्तीबद्दल उत्सुकता निर्माण झाली होती. मैदानातील सर्वाधिक आकर्षण ठरलेली एक नंबरची कुस्ती सोलापूरचा माऊली कोकाटे आणि पंढरपूरचा माऊली जमदाडे यांच्यात झाली. दोघांनी सुरुवातीपासूनच सावध आणि आक्रमक खेळ करत एकमेकांचा अंदाज घेण्यास सुरुवात केली. काही वेळ डावपेचांचा खेळ रंगला. अखेर सोलापूरच्या माऊली कोकाटेने योग्य संधी साधत दमदार डाव टाकला आणि पंढरपूरच्या माऊली जमदाडेला चितपट केले. कोकाटेच्या या विजयी डावानंतर आखाड्याभोवती उपस्थित असलेल्या हजारो कुस्तीप्रेमींनी टाळ्यांचा कडकडाट करत जल्लोष केला. विजयी मल्लाला मानाची चांदीची गदा आमदार संग्राम जगताप यांच्या हस्ते देण्यात आली. शहरातील कुस्तीपटूंना आंतरराष्ट्रीय दर्जाच्या सुविधा मिळवून देण्यासाठी सर्वतोपरी सहकार्य करण्याचे आश्वासन आमदार संग्राम जगताप यांनी दिले. विजयी मल्लांना रोख स्वरूपात बक्षिसे देण्यात आली. उपविजेत्यांचाही पारितोषिक देऊन गौरव केला. नामवंत कुस्तीपटू हजर या मैदानासाठी राज्यभरातूनच नव्हे तर देशभरातून अनेक नामांकित मल्ल आणि वस्ताद मंडळी उपस्थित होती. कुस्ती पाहण्यासाठी परिसरातील मैदान प्रेक्षकांनी खचाखच भरले होते. मल्लांच्या प्रत्येक डावाला आणि विजयी चितपटला प्रेक्षकांकडून उत्स्फूर्त दाद मिळत होती. यावेळी ज्येष्ठ पैलवान मारुती खंडागळे यांचा ग्रामस्थांच्यावतीने विशेष सन्मान करण्यात आला. मैदानात पंच म्हणून संभाजी लोंढे, उपमहाराष्ट्र केसरी अनिल गुंजाळ, अर्जुन शेळके, बंडू शेळके, सारंग वाघ, युवराज करंजुले, अजय म्हस्के आणि दादा पांडूळे यांनी काम पाहिले.
Source link
नालेगावच्या आखाड्यात कुस्तीचा थरार; सोलापूर येथील माऊली कोकाटे विजेता:कुस्तीप्रेमींची तुफान गर्दी, प्रेक्षकांच्या कडकडाटात पटकावली मानाची गदा
