जिल्हा परिषदेने बालहक्क संरक्षणासाठी एक कृती कार्यक्रम आखला आहे. यात बालस्नेही पंचायत, बालविवाह प्रतिबंध आणि सखी सावित्री समित्यांच्या प्रभावी अंमलबजावणीवर भर दिला जाईल. महाराष्ट्र राज्य बालहक्क संरक्षण आयोगाचे अध्यक्ष संजय विष्णू पुराणिक यांच्या अध्यक्षतेखाली जिल्हा परिषदेच्या मुख्य कार्यकारी अधिकारी यांच्या दालनात झालेल्या आढावा बैठकीत हे निर्णय घेण्यात आले. या बैठकीला आयोगाच्या सदस्या गितांजली बुटी, शुभांगी तांबट तसेच सदस्य संजय लाखे, अतुल देसाई आणि प्रविण भुजाडे उपस्थित होते. मुख्य कार्यकारी अधिकाऱ्यांनी जिल्ह्यातील सर्व गावांमध्ये ग्राम बाल संरक्षण समित्यांच्या (व्ही-सीपीसी) नियमित बैठका घेऊन त्यांचे इतिवृत्त आणि फोटो जमा करण्याच्या सूचना दिल्या. ग्राम बाल विकास समित्या अधिक प्रभावीपणे काम करतील यावर बैठकीत भर देण्यात आला. गावातील मुलांवर होणारे अन्याय, अत्याचार आणि बालहक्कांचे उल्लंघन यांसारखी प्रकरणे समित्यांच्या माध्यमातून समोर यावीत, यासाठी योग्य वातावरण निर्माण करण्याचे निर्देश देण्यात आले. यामुळे वेळेत प्रतिबंधात्मक कार्यवाही करणे शक्य होईल. बालविवाह प्रतिबंधक कायद्याची प्रभावी अंमलबजावणी आणि जनजागृती करण्याबाबतही बैठकीत चर्चा झाली. बालविवाहामुळे मुलांच्या आरोग्यावर, शिक्षणावर आणि कुपोषणावर वाईट परिणाम होऊ शकतो. त्यामुळे बालविवाह रोखण्यासाठी मोठ्या प्रमाणावर जनजागृती करण्यासोबतच, प्रत्येक अंगणवाडी केंद्रावर बालविवाह प्रतिबंधाबाबत जनजागृतीपर फलक लावण्यात येणार आहेत. प्रत्येक शाळेत सखी सावित्री समिती स्थापन करून मुलांना त्यांच्या समस्या व्यक्त करण्यासाठी सुरक्षित व्यासपीठ उपलब्ध करून देण्याच्या सूचना शिक्षण विभागाला देण्यात आल्या. शाळांमध्ये संवाद पेटीच्या माध्यमातून विद्यार्थ्यांना त्यांच्या समस्या, अडचणी आणि भावना व्यक्त करण्याची संधी दिली जाईल. यामुळे मुलांशी प्रभावी आणि संवेदनशील संवाद साधण्यावर भर दिला जाईल. या बैठकीला महिला व बालविकास विभागाचे उपमुख्य कार्यकारी अधिकारी विलास मरसाळे आणि शिक्षणाधिकारी (प्राथमिक) सिद्धेश्वर काळुसे उपस्थित होते.
Source link
बालहक्क संरक्षणासाठी जिल्हा परिषदेने आखला कृती कार्यक्रम:बालस्नेही पंचायत, बालविवाह प्रतिबंध व सखी सावित्री समित्या प्रभावीपणे राबवण्यावर भर
