दिवाळीच्या मंगलमय पहाटे सुरेल गीतांचा आनंद घेत संगीतप्रेमींनी सणाचा उत्साह द्विगुणित केला. बोरीवली येथील प्रबोधनकार ठाकरे नाट्यमंदिरात मंगळवार, 10 नोव्हेंबर रोजी ‘अनुबोध’ आणि ‘नवचैतन्य प्रतिष्ठान’ यांच्या संयुक्त विद्यमाने ‘स्वरत्रिवेणी’ या विशेष दिवाळी पहाट कार्यक्रमाचे आयोजन करण्यात आले होते. या कार्यक्रमात ज्येष्ठ आणि ख्यातनाम गायिका लता मंगेशकर, आशा भोसले आणि सुमन कल्याणपूर यांच्या अजरामर गीतांचा सुरेल नजराणा सादर करण्यात आला. या गीतांनी उपस्थित रसिकांना जुन्या आठवणींमध्ये रमवले. या संगीत सोहळ्यात गायिका अर्चना गोरे, धनश्री देशपांडे, मधुरा कुंभार आणि गायक शार्दुल कवठेकर यांनी आपल्या सुमधुर आवाजात या तिन्ही दिग्गज गायिकांची लोकप्रिय गीते सादर केली. त्यांच्या गायनातून लता मंगेशकर, आशा भोसले आणि सुमन कल्याणपूर यांच्या वैशिष्ट्यपूर्ण गायकीचा अनुभव रसिकांना घेता आला. एकापेक्षा एक सरस गीतांच्या सादरीकरणामुळे कार्यक्रमात सुरेल वातावरण निर्माण झाले. ‘ऋतू हिरवा’, ‘जिवलगा’, ‘मलमली तारुण्य माझे’, ‘झिमझिम झरती श्रावणधारा’ आणि ‘परवशता पाश दैवे’ यांसारख्या लोकप्रिय गीतांना रसिकांनी विशेष दाद दिली. प्रत्येक गाण्यानंतर टाळ्यांच्या कडकडाटात कलाकारांचे कौतुक करण्यात आले. जुन्या मराठी आणि हिंदी गीतांच्या आठवणींना उजाळा देणाऱ्या या कार्यक्रमाने दिवाळीच्या पहाटेला संगीताची अनोखी किनार लाभली. अभिनेता आणि निवेदक विघ्नेश जोशी यांच्या रसाळ आणि खुमासदार निवेदनामुळे कार्यक्रमाची रंगत अधिकच वाढली. गाण्यांशी संबंधित आठवणी, कलाकारांची वैशिष्ट्ये आणि निवेदनातील सहजता यामुळे रसिकांची कार्यक्रमाशी नाळ जोडली गेली. संगीत संयोजनाची जबाबदारी संजय मराठे यांनी सांभाळली. कार्यक्रमाची सांगता ‘ने मजसी ने’ या अजरामर गीताने करण्यात आली. या गीताने उपस्थित रसिकांना भावूक करत सुरेल संगीत सोहळ्याची सांगता झाली. या कार्यक्रमाचे आयोजन भूषण पाटील, सुबोध खेर, अनुप चलकरण, मनोज नायर आणि अनिल परब यांनी केले होते. दिवाळीच्या पहाटे आयोजित करण्यात आलेल्या या विशेष संगीत मैफलीला बोरीवली परिसरातील मोठ्या संख्येने संगीतप्रेमी रसिक उपस्थित होते. दिग्गज गायिकांच्या अजरामर गीतांची आठवण करून देणारा ‘स्वरत्रिवेणी’ हा कार्यक्रम बोरीवलीकरांसाठी दिवाळीची एक अविस्मरणीय संगीत मेजवानी ठरला. हेही वाचा…. ‘उद्ध्वस्त करतो, बघून घेतो’ अशा धमक्या चालणार नाहीत:मी सुद्धा पाटील’, सतेज पाटलांचा चंद्रकांत पाटलांना इशारा गोकुळ दूध संघाच्या अध्यक्षपदाच्या निवडणुकीनंतर कोल्हापूरमधील राजकीय वातावरण चांगलेच तापले आहे. महायुतीचे राजेश पाटील यांची अध्यक्षपदी निवड झाल्यानंतर भाजप आणि काँग्रेस नेत्यांमध्ये आरोप-प्रत्यारोपांच्या फैरी झडत आहेत. भाजप नेते आणि मंत्री चंद्रकांत पाटील यांनी काँग्रेस आमदार सतेज पाटील यांच्यावर टीका करत मुख्यमंत्री देवेंद्र फडणवीस यांनी केवळ डोळे वटारले, तरी त्यांचे राजकीय साम्राज्य एका दिवसात उद्ध्वस्त होईल, असा इशारा दिला होता. त्यांच्या या विधानाला सतेज पाटील यांनी जोरदार प्रत्युत्तर दिले आहे. सरकारी पदाचा आणि सत्तेचा वापर करून धमक्या देऊ नका. ‘उद्ध्वस्त करतो, बघून घेतो’ अशा धमक्या माझ्याजवळ चालणार नाहीत. मीसुद्धा पाटील आहे, अशा शब्दांत त्यांनी चंद्रकांत पाटलांना सुनावले. सविस्तर वाचा….
Source link
बोरीवलीत ‘स्वरत्रिवेणी’तून रंगली सुरेल दिवाळी पहाट:लता, आशा, सुमन यांच्या अजरामर गीतांनी रसिक मंत्रमुग्ध
