Investigation cell increased, SIT status report submitted, hearing in Supreme Court today

अयोध्येतील राम मंदिर देणगी चोरी प्रकरणाच्या तपासाबाबत विशेष तपास पथकाने (एसआयटी) आपला स्टेटस रिपोर्ट बंद लिफाफ्यात सर्वोच्च न्यायालयात दाखल केला आहे. आता या प्रकरणासोबतच दाखल करण्यात आलेल्या तपासाची मागणी करणाऱ्या याचिकांवर सरन्यायाधीश सूर्यकांत यांच्या खंडपीठासमोर सोमवारी सुनावणी होणार आहे.

दुसरीकडे, आरोपी रमाशंकर ऊर्फ टिन्नू यादव आणि मनीष यादव यांच्या चौकशीतून तपासाचे अनेक महत्त्वाचे धागेदोरे पोलिसांच्या हाती लागले आहेत. या माहितीच्या आधारे आता दान चोरीच्या रकमेचा वापर, जमिनींची खरेदी-विक्री, गुंतवणूक, व्हीआयपी पासचा गैरवापर, भरती प्रक्रियेतील गडबड आणि ट्रस्टशी संबंधित अनेक पैलूंचा समांतर तपास सुरू केला आहे. टिन्नू व मनीष यांच्याकडून चोरीबाबत अनेक धागेदोरे मिळाले आहेत.

जमीन खरेदी, बांधकाम कंपनी तपासाच्या फेऱ्यात

टिन्नू यादवचा मुलगा रवी यादव याच्या नावावर सहादतगंज भागात जमीन खरेदी केल्याची माहिती पोलिसांना मिळाली आहे. टिन्नूच्या पत्नीच्या नावावर चालणारी सौंदर्य कन्स्ट्रक्शन कंपनी देखील तपासाच्या फेऱ्यात आहे. चोरीची रक्कम कायदेशीर दाखवण्यासाठी या कंपनीचा वापर केल्याची शक्यता आहे. जीएसटी विभागाकडून माहिती गोळा करण्याची तयारी सुरू आहे.

राहुल व खरगेंचे पंतप्रधानांना पत्र; चौकशीची मागणी

श्रीराम जन्मभूमी तीर्थ क्षेत्र ट्रस्टची पुढील बैठक मंगळवार, २२ जुलै रोजी प्रस्तावित आहे. एसआयटीचा अंतिम अहवाल मिळाल्यानंतर बैठकीत शिफारसी, सुधारणा आणि पुढील कारवाईवर चर्चा होऊ शकते. तपास सुरू आहे. अंतिम निष्कर्ष अधिकृत अहवालानंतरच समोर येतील.

लोकसभेचे विरोधी पक्षनेते राहुल गांधी व काँग्रेस अध्यक्ष मल्लिकार्जुन खरगे यांनी पंतप्रधान नरेंद्र मोदी यांना देणगी चोरीप्रकरणी पत्र लिहिले आहे. त्यांनी लिहिले की, आम्ही विनंती करतो की आपण तातडीने ट्रस्टच्या आर्थिक व्यवहारांची स्वतंत्र व व्यापक चौकशीचे आदेश द्यावेत, ज्यामध्ये रोख रक्कम, सोन्यासह सर्व देणग्यांच्या व्यवस्थापनाचाही समावेश असावा.