गणेशोत्सवाच्या उत्साही वातावरणानंतर मुंबईतील समुद्रकिनारे स्वच्छ ठेवण्याच्या सामाजिक बांधिलकीतून के.पी.बी. हिंदुजा कॉलेज ऑफ कॉमर्सच्या विद्यार्थ्यांनी दादर चौपाटीवर विशेष स्वच्छता मोहीम राबवली. ‘#AftertheCelebration’ या संकल्पनेअंतर्गत आयोजित या उपक्
.
हिंदुजा फाउंडेशनच्या मार्गदर्शनाखाली चालणाऱ्या या स्वायत्त महाविद्यालयाच्या विद्यार्थ्यांनी मुंबई विद्यापीठ, बृहन्मुंबई महानगरपालिका (BMC), महाराष्ट्र शासन आणि कोस्टल गार्ड यांच्या संयुक्त विद्यमाने ही मोहीम पार पाडली. राष्ट्रीय सेवा योजनेच्या (NSS) माध्यमातून विसर्जनानंतर चौपाटीवर जमा झालेला कचरा गोळा करून समुद्रकिनारा पूर्ववत करण्यासाठी विद्यार्थ्यांनी दिवसभर परिश्रम घेतले.
कचऱ्याचे वर्गीकरण व संकलन
विसर्जनानंतर किनाऱ्यावर पडलेली निर्माल्याची फुले, प्लास्टिक, सजावटीचे साहित्य, कापड आणि इतर टाकाऊ वस्तू गोळा करून त्यांचे योग्य वर्गीकरण करण्यात आले. अशा गोळा केलेल्या कचऱ्याच्या अनेक पिशव्या महापालिकेच्या यंत्रणेकडे सुपूर्द करण्यात आल्या.
“जबाबदार नागरिक घडवणे हेच उद्दिष्ट”
या उपक्रमाबाबत बोलताना के.पी.बी. हिंदुजा कॉलेजचे प्राचार्य डॉ. नवीन एम. पंजाबी म्हणाले, “शैक्षणिक संस्था म्हणून आमची जबाबदारी विद्यार्थ्यांना केवळ व्यावसायिक शिक्षणापुरती मर्यादित न ठेवता एक जबाबदार नागरिक घडवण्याची आहे. समुद्रकिनाऱ्यावरील प्लास्टिक आणि कचरा सागरी जीवसृष्टी व परिसंस्थेला मोठी हानी पोहोचवतो. अशा मोहिमांमुळे विद्यार्थ्यांना पर्यावरण रक्षणाचे महत्त्व समजते आणि शहरासाठी सकारात्मक योगदान देण्याची संधी मिळते.”
गेल्या अडीच दशकांपासून (25 वर्षे) विद्यार्थ्यांच्या छोट्याशा पुढाकाराने सुरू झालेली ही मोहीम आज संस्थेची एक परंपरा बनली आहे. संस्थापक स्व. परमानंद दीपचंद हिंदुजा यांच्या समाजसेवेच्या विचारांवर आधारित, कॉलेजतर्फे रक्तदान शिबिरे आणि वृक्षारोपण यांसारखे विविध सामाजिक उपक्रमही नियमितपणे राबवले जातात.
