मराठा आरक्षण आंदोलनाचे केंद्रबिंदू ठरलेले मनोज जरांगे पाटील यांचा पारंपरिक दसरा मेळावा आज (मंगळवार, दि. 20) बीड जिल्ह्यातील श्री क्षेत्र नारायणगडावर शेकडो एकर विस्तीर्ण परिसरात प्रचंड जनसागराच्या उपस्थितीत पार पडत आहे. आज सकाळी ठीक 10 वाजता मनोज जरां
.
शेकडो एकर परिसरावर मेळाव्याचे नियोजन; लाखोंच्या जेवणाची व निवासाची सोय
नारायणगडावरील दसरा मेळाव्याची तयारी अंतिम टप्प्यात पोहोचली असून भाविक आणि समाजबांधवांसाठी भव्य नियोजन करण्यात आले आहे. मेळाव्यासाठी राज्यभरातून लाखोंच्या संख्येने वाहने येण्याची शक्यता लक्षात घेऊन गडाच्या चोहोबाजूंनी शेकडो एकर शेतजमिनीवर प्रशस्त पार्किंग झोन तयार करण्यात आले आहेत.
अन्नदान व जलव्यवस्था
महाराष्ट्राच्या कानाकोपऱ्यातून येणाऱ्या लाखो समाजबांधवांसाठी महाप्रसादाची (जेवण), शुद्ध पिण्याच्या पाण्याची आणि दूरवरून आदल्या दिवशीच दाखल झालेल्या लोकांसाठी निवासाची चोख व्यवस्था आयोजकांनी केली आहे.
हायटेक स्टेज व साऊंड सिस्टिम
विशाल मैदानावरील शेवटच्या व्यक्तीपर्यंत जरांगे पाटलांचा आवाज स्पष्ट पोहोचावा यासाठी शेकडो एकर परिसरात अत्याधुनिक साऊंड सिस्टीम, भव्य एलईडी स्क्रीन्स आणि स्वागत फ्लेक्स उभारण्यात आले आहेत.
मेळाव्याच्या पूर्वसंध्येला जरांगेंचा घणाघात- नेत्यांच्या बंगल्यांना कोट्यवधी, मग शेतकऱ्यांना 5,000 का?
सोमवारी अंकुशनगर येथील निवासस्थानी घेतलेल्या पत्रकार परिषदेत आणि त्यापूर्वी सोमठाणा गडावरील रेणुका मातेच्या दर्शनानंतर मनोज जरांगे पाटील यांनी दुष्काळग्रस्त शेतकऱ्यांच्या प्रश्नावरून राज्य सरकारवर टीकेची झोड उठवली. “दुष्काळामुळे शेतकऱ्यांचे कंबरडे मोडले आहे. विहिरी कोरड्या पडल्या असून पिके जळून खाक झाली आहेत. अशा वेळी शेतकऱ्यांच्या जखमेवर मलम लावण्यासाठी हेक्टरी किमान 1 लाख रुपयांचे थेट अनुदान देणे गरजेचे होते. मात्र सरकारने अवघे 5,000 रुपये जाहीर करून शेतकऱ्यांची क्रूर थट्टा केली आहे. मंत्र्यांच्या बंगल्यांच्या सजावटीवर आणि गाड्यांवर हजारो कोटींची उधळपट्टी करणारे सरकार शेतकऱ्यांना मदत करताना हात आखडता का घेते?” असा संतप्त सवाल त्यांनी केला.
आंदोलनावरून लक्ष विचलित करण्याचा डाव
“शेतकऱ्यांचे मोर्चे आणि जनआक्रोश दडपण्यासाठी दिवाळीपूर्वी 5,000 रुपयांचा तुकडा टाकून दिशाभूल केली जात आहे. ही रक्कम मिळवण्यासाठीही शेतकऱ्यांना कागदपत्रे आणि बँकांच्या रांगेत उभे राहावे लागत आहे, हा बळीराजाचा अपमान आहे,” असा आरोप त्यांनी केला.
शेतकरी कोणत्याही जातीचा असो, आत्महत्या करू नका!
शेतकऱ्यांच्या आर्थिक विवंचनेवर अत्यंत हळहळ व्यक्त करताना जरांगे पाटील म्हणाले, “शेतात उभे राहिल्यानंतर आजची भीषण परिस्थिती पाहून छाती फाटते. मात्र, माझ्या एकाही शेतकरी बांधवाने हताश होऊन आत्महत्येसारखे टोकाचे पाऊल उचलू नये. शेतकरी मराठा असो, ओबीसी असो वा कोणत्याही जाती-धर्माचा; मातीशी इमान राखणारा तो आधी शेतकरी आहे. आपण सर्वांनी एकजूट दाखवून या संकटाचा मुकाबला केला पाहिजे आणि सरकारकडून आपला हक्काचा वाटा खेचून आणला पाहिजे.”
पंकजा मुंडेंच्या गाव दत्तक विधानावर भाष्य
भाजप नेत्या पंकजा मुंडे यांनी अंतरवाली सराटी गाव दत्तक घेण्याच्या मुद्द्यावर विचारले असता त्यांनी स्पष्ट मत मांडले. “गावाचा सर्वांगीण विकास होणार असेल तर कोणालाही गाव दत्तक घेण्यास आमचा आक्षेप असण्याचे कारण नाही. मात्र केवळ राजकीय आश्वासने नकोत. वडीगोद्री ते अंतरवाली सराटी रस्त्याचे चौपदरीकरण व दुभाजक उभारणे, अंतर्गत सिमेंट रस्ते व पेव्हर ब्लॉक बसवणे, शाळा, मंदिर व मशिदी परिसराचे सुशोभीकरण करणे आणि सर्वात महत्त्वाचे म्हणजे गावातील देशी दारूचे दुकान कायमचे हद्दपार करून अंतरवालीला आदर्श गाव बनवावे,” असे त्यांनी सुचवले.
मला घेरण्याचे षड्यंत्र, पण समाज एकसंध!
“सरकार मला चारही बाजूंनी घेरण्याचा आणि एकटे पाडण्याचा प्रयत्न करत आहे. ज्यांना समाजाने डोक्यावर घेतले, त्यातीलच काही जण आपल्या विरोधात षड्यंत्र रचत आहेत. मात्र हे संकट तात्पुरते असून समाजबांधवांनी संयम आणि एकजूट कायम ठेवावी,” असा इशारा त्यांनी दिला.
राजकीय चिखलफेक टाळणार
आजच्या मेळाव्यात कोणत्याही खालच्या पातळीवरील राजकीय चिखलफेकीला थारा न देता दुष्काळ, शेतकरी, आरक्षण आणि मराठा समाजाची पुढील दिशा यावरच लक्ष केंद्रित करणार असल्याचे जरांगे पाटलांनी स्पष्ट केले आहे. शिंदे गटाकडून मेळाव्याला झालेला विरोध आणि मराठा आरक्षणाची प्रलंबित मागणी या पार्श्वभूमीवर आज सकाळी 11 वाजता नारायणगडावरून मनोज जरांगे पाटील काय रणशिंग फुंकतात, याकडे अवघ्या महाराष्ट्राचे डोळे लागले आहेत.
—————————————————————————
हेही वाचा…
मुंबई पोलिसांची कामगिरी:‘टायगर’वरील तिन्ही हल्लेखोर ‘एआय’मुळे 15 तासांतच कोटा रेल्वेस्थानकात जेरबंद, एआय फेस रिकग्निशनने शूटर्सची प्रत्येक हालचाल टिपली
बॉलीवूड अभिनेता टायगर श्रॉफवर गोळीबार करणाऱ्या रिहान ऊर्फ सुक्का, रितिक कुर्मी आणि एका अल्पवयीन अशा तिन्ही शूटरना एआय फेस रिकग्निशन तंत्रामुळे घटना घडल्यापासून १५ तास ३० मिनिटांत म्हणजे सोमवारी सकाळी १०.३० वाजेच्या सुमारास राजस्थानातील कोटा रेल्वे स्थानकावर जेरबंद करण्यात आले. येथे वाचा संपूर्ण बातमी
