Mumbai Wadala Accident: BEST Bus Hits Cars; 6 Injured

.

मिळालेल्या प्राथमिक माहितीनुसार, लोढा जंक्शन येथील सिग्नलवर एक BEST बस थांबली होती. तिच्या मागे एर्टिगा आणि क्रेटा या दोन कार उभ्या होत्या. सिग्नल सुरू होण्याची प्रतीक्षा करत असताना मागून आलेल्या दुसऱ्या BEST बसच्या चालकाचे अचानक वाहनावरील नियंत्रण सुटले. त्यानंतर बसने समोर उभ्या असलेल्या दोन्ही कारला जोरदार धडक दिली. धडक इतकी भीषण होती की, दोन्ही कारचे मोठ्या प्रमाणात नुकसान झाले. अचानक झालेल्या या अपघातामुळे परिसरात एकच गोंधळ उडाला. घटनास्थळी नागरिकांची गर्दी झाली होती.

या अपघातात एर्टिगा कारमधील चार जण जखमी झाले. त्यापैकी चालकाच्या पायाला गंभीर दुखापत झाली असून अन्य तीन प्रवाशांना किरकोळ दुखापत झाली आहे. तर क्रेटा कारमधील एक पुरुष आणि एका महिलेलाही दुखापत झाली. अशा प्रकारे दोन्ही वाहनांमधील एकूण सहा जण या अपघातात जखमी झाले आहेत. घटनेची माहिती मिळताच पोलीस आणि संबंधित यंत्रणांनी घटनास्थळी धाव घेतली. जखमींना तातडीने रुग्णालयात पोहोचवण्यात आले.

सर्व जखमींना सायन रुग्णालयात दाखल करण्यात आले असून त्यांच्यावर वैद्यकीय उपचार सुरू आहेत. अपघातानंतर काही काळ लोढा जंक्शन परिसरातील वाहतुकीचा वेग मंदावला होता. अपघातग्रस्त कार आणि बसमुळे रस्त्यावर वाहतुकीला अडथळा निर्माण झाला. त्यानंतर संबंधित यंत्रणांनी अपघातग्रस्त वाहने बाजूला करून वाहतूक पूर्ववत करण्याचे प्रयत्न केले.

दरम्यान, BEST बस चालकाचे वाहनावरील नियंत्रण नेमके कोणत्या कारणामुळे सुटले, याबाबत अद्याप स्पष्टता आलेली नाही. बसचा वेग, चालकाची स्थिती आणि अपघाताच्या वेळी नेमकी परिस्थिती काय होती, याची माहिती पोलीस घेत आहेत. या प्रकरणाचा तपास सुरू असून चौकशीनंतर अपघाताचे नेमके कारण स्पष्ट होणार आहे.

हेही वाचा…..

दहिसरमध्ये गुंदेचा शाळेजवळ भीषण आग:कांदरपाडा परिसरात धुराचे लोट, अग्निशमन दल घटनास्थळी

दहिसर येथील कांदरपाडा परिसरात आज भीषण आग लागल्याची घटना घडली. प्रभाग क्रमांक ७ अंतर्गत येणाऱ्या आरबीआय कॉलनीलगतच्या रस्त्यावर, प्रसिद्ध गुंदेचा शाळेच्या अगदी जवळ ही आग लागली. आगीमुळे परिसरात मोठ्या प्रमाणात धुराचे लोट पसरले असून नागरिकांमध्ये भीतीचे वातावरण निर्माण झाले आहे. सविस्तर वाचा….