महाराष्ट्राच्या राजकारणात सध्या राष्ट्रवादी काँग्रेसच्या दोन्ही गटांच्या संभाव्य विलीनीकरणाचा मुद्दा पुन्हा एकदा चर्चेच्या केंद्रस्थानी आला आहे. दिवंगत उपमुख्यमंत्री अजित पवार यांच्या निधनानंतर राष्ट्रवादी काँग्रेसच्या राजकारणात अनेक घडामोडी घडत असून, दोन्ही पक्षांतील नेत्यांच्या भेटीगाठी आणि विधानांमुळे एकत्रीकरणाच्या चर्चांना अधिकच बळ मिळत आहे. अशातच खासदार सुप्रिया सुळे यांनी माध्यमांशी संवाद साधत या संपूर्ण विषयावर आपली भूमिका मांडली आहे. अजित पवार हयात असताना दोन्ही राष्ट्रवादी काँग्रेस पक्ष एकत्र आणण्याबाबत चर्चा झाली होती, याला सुप्रिया सुळे यांनी दुजोरा दिला. मात्र, अजित पवार यांच्या निधनानंतर या विषयाला आपल्यासाठी पूर्णविराम मिळाला असल्याचे त्यांनी स्पष्ट केले. त्यामुळे सध्या सुरू असलेल्या विलीनीकरणाच्या चर्चांवर सुप्रिया सुळे यांच्या विधानामुळे नवा राजकीय अर्थ काढला जात आहे. अजितदादा आमच्याशी विलीनीकरणाबाबत बोलले होते राष्ट्रवादी काँग्रेसच्या विलीनीकरणाच्या चर्चांबाबत बोलताना सुप्रिया सुळे म्हणाल्या की, अजित पवार हयात असताना दोन्ही पक्ष एकत्र येण्याबाबत चर्चा सुरू होती. अजितदादा यांच्याशी या विषयावर चर्चा झाली होती. त्यांनी माझ्याशी तसेच आमच्या पक्षातील इतर नेत्यांशीही याबाबत संवाद साधला होता. त्यामुळे ही चर्चा केवळ राजकीय वर्तुळातील अफवा नव्हती, तर त्याबाबत प्रत्यक्ष बोलणी झालेली होती. यावेळी त्यांनी 17 जानेवारी रोजी गोविंदबागेत झालेल्या घडामोडींचाही उल्लेख केला. त्या दिवशीचा व्हिडीओ प्रसारमाध्यमांना दाखवण्यात आला होता. त्यामुळे दोन्ही पक्ष एकत्र येण्याबाबत काय नियोजन सुरू होते, याची माहिती सर्वांनाच होती. हा विषय कोणापासून लपवून ठेवलेला नव्हता, असेही त्यांनी स्पष्ट केले. मात्र, अजित पवार यांच्या निधनानंतर परिस्थिती बदलली. आपला भाऊ गेल्यानंतर विलीनीकरणाच्या चर्चांना आपल्यासाठी पूर्णविराम मिळाला असल्याचे सुप्रिया सुळे यांनी सांगितले. त्यामुळे आता या विषयावर वेगळे काही बोलण्याचे कारण नसल्याचेही त्यांनी नमूद केले. विलीनीकरणाचा कोणताही प्रस्ताव आलेला नाही दोन्ही राष्ट्रवादी काँग्रेस पक्ष एकत्र येण्याबाबत सध्या चर्चा सुरू असल्या तरी आपल्याकडे अधिकृत स्वरूपात कोणताही प्रस्ताव आलेला नसल्याचे सुप्रिया सुळे यांनी स्पष्ट केले. माझ्याशी याबाबत कोणीही चर्चा केलेली नाही. त्यामुळे नेमक्या कोणत्या एकत्रीकरणाबाबत बोलले जात आहे, याची आपल्याला माहिती नसल्याचे त्यांनी सांगितले. त्यांच्या या विधानामुळे विलीनीकरणाबाबत सध्या दोन्ही पक्षांमध्ये प्रत्यक्ष चर्चा सुरू आहे का, याबाबत प्रश्न उपस्थित होत आहेत. एका बाजूला राष्ट्रवादी काँग्रेसच्या काही नेत्यांकडून अजित पवार यांच्या काळात विलीनीकरणाबाबत चर्चा झाल्याचे सांगितले जात आहे, तर दुसरीकडे सुप्रिया सुळे यांनी अजित पवार यांच्या निधनानंतर हा विषय संपल्याची भूमिका घेतली आहे. राष्ट्रवादीच्या आमदारांच्या शरद पवार भेटीबाबत काय म्हणाल्या? दरम्यान, राष्ट्रवादी काँग्रेसच्या काही आमदारांनी ज्येष्ठ नेते शरद पवार यांची भेट घेण्यासाठी वेळ मागितल्याची माहिती समोर आली होती. या भेटींच्या चर्चांबाबत सुप्रिया सुळे यांना विचारले असता त्यांनी त्यात काहीही नवीन नसल्याचे सांगितले. शरद पवार यांना देशातील विविध राजकीय पक्षांचे नेते नेहमीच भेटत असतात. अजित पवार यांनी स्वतंत्र गट स्थापन केल्यानंतरही त्या गटातील अनेक नेते, आमदार आणि मंत्री शरद पवार यांची भेट घेत आले आहेत. त्यामुळे अशा भेटींना वेगळे राजकीय महत्त्व देण्याची गरज नसल्याचे सुप्रिया सुळे यांनी स्पष्ट केले. राष्ट्रवादीच्या आमदारांनी शरद पवार यांची भेट घेण्याची इच्छा व्यक्त केली असेल, तर त्यात काहीही असामान्य नाही. या भेटींवरून विलीनीकरणाचे निष्कर्ष काढणे योग्य ठरणार नाही, अशी भूमिका त्यांच्या उत्तरातून दिसून आली. अमित शाह यांच्या भेटीवरही साधला निशाणा राष्ट्रवादी काँग्रेसमधील काही प्रमुख नेत्यांनी दिल्लीत जाऊन केंद्रीय गृहमंत्री अमित शाह यांची भेट घेतली होती. या भेटीत नेमकी काय चर्चा झाली आणि सुनेत्रा पवार या भेटीत सहभागी का नव्हत्या, अशा प्रश्नांवरही सुप्रिया सुळे यांना विचारण्यात आले. यावर त्यांनी हा संबंधित पक्षाचा अंतर्गत विषय असल्याचे सांगत प्रतिक्रिया देणे टाळले. कोण कुणाला भेटते, कोणत्या कारणासाठी भेटते, हा त्या पक्षाचा आणि संबंधित नेत्यांचा वैयक्तिक प्रश्न आहे. दुसऱ्यांच्या घरात आपण कशाला डोकावायचे, अशी भूमिका त्यांनी मांडली. त्यामुळे राष्ट्रवादी काँग्रेसमधील अंतर्गत घडामोडी आणि नेत्यांच्या दिल्ली दौऱ्याबाबत भाष्य करण्यास त्यांनी नकार दिला. विलीनीकरणाच्या चर्चेला पुन्हा पूर्णविराम? दरम्यान, अजित पवार यांच्या निधनानंतर दोन्ही राष्ट्रवादी काँग्रेस पक्षांच्या राजकीय भवितव्याबाबत अनेक शक्यता व्यक्त केल्या जात आहेत. सुनील तटकरे यांनी अजित पवार हयात असताना विलीनीकरणाबाबत चर्चा झाल्याचे सांगितल्यानंतर या विषयाला पुन्हा महत्त्व प्राप्त झाले होते. त्यातच शरद पवार यांची प्रफुल्ल पटेल आणि पार्थ पवार यांनी घेतलेली भेट, तसेच राष्ट्रवादीच्या इतर नेत्यांच्या हालचालींमुळे राजकीय चर्चांना वेग आला. उपमुख्यमंत्री सुनेत्रा पवार यांना याबाबत विचारले असता, ‘जशी वेळ येईल, तशा तुम्हाला सगळ्या गोष्टी समजतील,’ असे सूचक विधान त्यांनी केले होते. त्यामुळे विलीनीकरणाबाबत भविष्यात काही राजकीय निर्णय होणार का, याकडे सर्वांचे लक्ष लागले होते. मात्र, आता सुप्रिया सुळे यांनी अजित पवार यांच्या निधनानंतर आपल्यासाठी विलीनीकरणाचा विषय संपल्याचे स्पष्ट केले आहे. अजित पवार हयात असताना चर्चा झाली होती, पण त्यांच्या पश्चात कोणताही प्रस्ताव आपल्याकडे आलेला नाही, असे त्यांनी ठामपणे सांगितले. त्यामुळे राष्ट्रवादीच्या दोन्ही गटांतील संभाव्य एकत्रीकरणाबाबत आगामी काळात संबंधित नेते काय भूमिका घेतात, हे पाहणे महत्त्वाचे ठरणार आहे. हेही वाचा…. दोन्ही राष्ट्रवादी काँग्रेसच्या विलिनीकरणाबाबत 18 जानेवारीला बैठक झाली होती:एकत्र येण्याचं ठरलं होतं, हर्षवर्धन पाटलांनी सांगितला बैठकीतील घटनाक्रम राज्याच्या राजकारणात सध्या राष्ट्रवादी काँग्रेसच्या दोन्ही गटांच्या विलिनीकरणाचा मुद्दा पुन्हा एकदा चर्चेच्या केंद्रस्थानी आला आहे. उपमुख्यमंत्री अजित पवार यांच्या निधनानंतर दोन्ही राष्ट्रवादी काँग्रेस एकत्र येणार का, याबाबत राजकीय वर्तुळात वेगवेगळे तर्कवितर्क लढवले जात आहेत. राष्ट्रवादी काँग्रेसचे अध्यक्ष शरद पवार यांच्या भेटीगाठी वाढल्या असून, उपमुख्यमंत्री सुनेत्रा पवार यांनीही योग्य वेळी योग्य निर्णय घेतला जाईल, असे सूचक विधान केले आहे. या पार्श्वभूमीवर माजी मंत्री हर्षवर्धन पाटील यांनी विलिनीकरणाच्या प्रक्रियेबाबत महत्त्वाचा खुलासा केला आहे. दोन्ही राष्ट्रवादी काँग्रेस एकत्र येण्याबाबत यापूर्वीच निर्णय झाला होता. 18 जानेवारी रोजी यासंदर्भात बैठक झाली होती आणि त्या बैठकीला आपण स्वतः उपस्थित होतो, असे त्यांनी स्पष्ट केले. सविस्तर वाचा….
Source link
अजितदादा जिवंत असेपर्यंत विलीनीकरणाची चर्चा सुरू होती:निधनानंतर विषय संपला, सुप्रिया सुळेंनी भूमिका केली स्पष्ट
